Ethiopian Digital Library

በሸገር ራዲዮ 102.1 ላይ የሰማሁት አንድ ታሪክ ደስ ስላለኝ ላካፍላችሁ

ገርጂ አካባቢ የሚኖሩ አባትና ልጅ የወደቀ ገንዘብ ያገኛሉ(911 ዶላር እና 11 ብር)።ከገንዘቡ ጋር የፓስፖርት ኮፒም አብሮ ነበር።ለሰውየው ለመመለስ አስበው በፓስፖርቱ ላይ በተጠቀሰው ስም ያፈላልጉት ገቡ።አጡት። ከፎቶው እንደተረዱት ባለገንዘቡ 'ፈረንጅ ' ነው።

ሁለት አመት ሙሉ ነጭ ሲያዩ እያስቆሙ ስሙን እየጠየቁ ከፎቶው እያመሳከሩ አፈላለጉት። የሰፈር ሰው ሁሉ 'ስለምን ትሞኛላችሁ?! ገንዘቡን ተጠቀሙበት!' አላቸው።የሰው ሃቅ አንነካም አሉ።እንደውም በመሃል ልጅየው ታሞ ሆስፒታል ገባ።ኦፕራሲዮን ይደረግ ተባለ። ገንዘብ ከየት ይምጣ?!
'አባዬ በዛ በፈረንጁ ገንዘብ ልታከም?' አላቸው።

አባት 'አላህ በሰው ሃቅ እንድታተከም አይፈቅድም!ፈቃዱ ከሆነ በጥበቡ ያድንሃል! ' አሉት።ያ ችግርም ታለፈ ።
ከሰሞኑ ገንዘቡን የጣለውን ሰው አገኙት። ህንዳዊ ነው።ያችኑ 911 ዶላርና አብራ የነበረችውን 11 ብር ሰጡት።
ምን ሊል እንደሚችል ገምቱ።

ጋዜጠኛው ሰዎቹንም እሱንም አፈላልጎ ኢንተርቪው አደረጋቸው።
ጠዋት ወደ ስራ እየሄድኩ ህንዳዊው ለኢትዮጵያውያን ያለውን አድናቆት ሲገልጽ እየሰማሁት ልቤ ሲሞቅ ይሰማኝ ነበር!!
አንዳንዴ እንደዚህ አይነት ታሪኮችን ስሰማ ያ የድሮው የኢትዮጵያዊ ጨዋነት እንዳልጠፋ አስብና ደስ ይለኛል።

ከዘገባው የገረመኝ 'ታሪኩን የሰሙ በውጭ የሚኖሩ ኢትዮጵያውያን ለአባትና ለልጅ ገንዘብ አሰባስበው 200 ዶላር ላኩላቸው! ' የሚለው ነው።ሰዎቹ በዚህ ደስ ቢላቸውም እኔ ግን ብዙም ደስ አላለኝም። ማድነቅም በትላልቅ ሚዲያዎች ላይ ማቅረብም ያለብን የእነኚህን አይነቶቹን ሰዎች ነበርኮ!
ብዙ ሰዎች የወደቀ ገንዘብ አግኝተው መልሰዋል። የነኚህ ግን ይለያል።ሁለት አመት ሙሉ ያውም ድህነትና ችግር እየፈተነህ?!ሃቁን ለባለሃቁ መመለስ!!
አቅራቢው ጋዜጠኛ ወንድሙ ሃይሉ ነው።

Andualem Buketo

@Ethiopian_Digital_Library
@Ethiopian_Digital_Library

ሁሉም መስፈርቱን አላሟሉም

የትምህርትና ሥልጠና ባለሥልጣን፣ በአዲሱ የመመዘኛ መስፈርት በድጋሚ ከተመዘገቡ 273 የግል ከፍተኛ የትምህርት ተቋማት መካከል አንድም የትምህርት ተቋም መስፈርቱን ሳይሟላ እንደቀሩ መናገሩን ጠቅሶ ዘግቧል።

ኾኖም የትምህርት ተቋማቱ መስፈርቶቹን እንዲያሟሉ የ45 ቀናት የጊዜ ገደብ እንደተሠጣቸው ባለሥልጣኑ ገልጧል ተብሏል።

ባለሥልጣኑ አዲስ ባወጣው የከፍተኛ ትምህርት ተቋማት መመዘኛ መሠረት 84 ተቋማት ባለመመዝገባቸው እንደተሠረዙ የባለሥልጣኑ ሃላፊዎች መናገራቸውን ዘገባው ጠቅሷል።

የግል ከፍተኛ የትምህርት ተቋማቱ ሃላፊዎች፣ የባለሥልጣኑን መመዘኛ መስፈርቶች ለማሟላት አስቸጋሪ እንደኾነባቸው ገልጸዋል ተብሏል።

@Ethiopian_Digital_Library
@Ethiopian_Digital_Library

በአማራ ክልል በጦርነቱ ጉዳት የደረሰባቸውን ትምህርት ቤቶችን መልሶ ለመገንባት ከ100 ቢሊየን ብር በላይ ያስፈልጋል ተባለ

ጉዳት የደረሠባቸውን ትምህርት ቤቶች መልሶ ለመገንባት ከ100 ቢሊየን ብር በላይ እንደሚያስፈልግ የአማራ ክልል ትምህርት ቢሮ አስታወቀ፡፡
ከሰሜኑ ጦርነት ጀምሮ አሁን በክልሉ ባለው የጸጥታ ችግር ምክንያት በርካታ ትምህርት ቤቶች መጎዳታቸውን የቢሮው ዕቅድ ዝግጅትና ክትትል ዳይሬክተር ዘመነ አበጀ ተናግረዋል፡፡

ለአብነትም በምሥራቅ ጎጃም ዞን ከ400 በላይ ትምህርት ቤቶች ሙሉ በሙሉ መውደማቸውን ጠቅሰዋል፡፡

በአጠቃላይ በክልሉ ጉዳት የደረሰባቸውን ትምህርት ቤቶች ወደ አገልግሎት ለመመለስ 112 ቢሊየን ብር እንደሚያስፈልግም ተናግረዋል፡፡

ቢሮው ባስጠናው ጥናት መሠረት ይህ ገንዘብ ትምህርት ቤቶችን ከመገንባትና መጠገን በተጨማሪ ተጓዳኝ የትምህርት ሥራዎችን ለማከናወን የሚውል ነው ብለዋል፡፡

@Ethiopian_Digital_Library
@Ethiopian_Digital_Library

የአምስተኛ ክፍል ተማሪ የሆነው ታዳጊ ወላጅ አባቱ አደንዛዥ እፅ እንደሚጠቀም ለፖሊስ ጥቆማ በመስጠቱ አባት በቁጥጥር ስር ዋሉ

በቻይና የቤት ስራውን ባለማጠናቀቁ በአባቱ የተገሰጸው የ10 አመቱ ልጅ ፖሊስ በመጥራት አባቱ አደንዣዥ እፅ እንደሚወስድ በመናገር ወላጁን ተበቅሏል።

አስገራሚው ክስተት ያጋጠመው በዚህ ወር መጀመሪያ ላይ በቻይና ዮንግኒንግ ግዛት ውስጥ ነበር። የ10 አመቱ ታዳጊ የቤት ስራውን በሰዓቱ ስላልጨረሰ በአባቱ ከፍተኛ ተግሳፅ ከደረሰበት በኋላ ከቤት ወጥቶ በቀጥታ በአቅራቢያው ወደሚገኝ ሱቅ ሄዶ ስልክ በመጠቀም ሪፖርት አድርጓል።

የአምስተኛ ክፍል ተማሪ የሆነው ታዳጊው 110 ወደ ቻይና የድንገተኛ አደጋ ስልክ በመደወል አባቱ ህገወጥ ዕፅ በቤት ውስጥ እንደሚጠቀም የሚያሳይ ማስረጃ አለኝ በማለት ለፖሊስ ጥቆማ ሰጥቷል። ከዚያም ፖሊስ እስኪመጣ ተረጋግቶ በመጠበቅ ፍተሻ እንዲያካሂዱ እና የሰጠውን መረጃ እንዲያረጋግጡ አድርጓል። በፍለጋው ወቅት ፖሊሶች በልጁ ቤት በረንዳ ላይ ስምንት የደረቁ የአደንዣዥ እፅ አበባ እንዳገኙና የልጁ አባት መግዛቱን አምኗል።

ነገር ግን ለመድኃኒትነት አገልግሎት ብቻ ሊጠቀምባቸው እንዳቀደም አክሏል። የተገኘበት እፅ እንደ አደገኛ እፅ የሚመድበ በመሆኑ ህግ በመጣሱ መፀፀቱን ገልጿል፣ነገር ግን ሳያውቅ ይህን እንዳደረገ አጥብቆ ተናግሯል። ፖሊስ ማስረጃዎቹን እና ተጠርጣሪውን በአቅራቢያው ወደሚገኝ ጣቢያ በመውሰድ ጉዳዩን ለፀረ አደንዛዥ እፅ ብርጌድ አስተላልፏል። የቻይና ፖሊስ ያልተለመደ እፅ በመጠቀም ያለፈቃድ ማምረት ወይም መያዝ ህገወጥ መሆኑን እና አጥፊዎች የወንጀል ቅጣት እንደሚጠብቃቸው አስጠንቅቋል።

@Ethiopian_Digital_Library
@Ethiopian_Digital_Library

የመሬት መንቀጥቀጡ እንደቀጠለ ነው! ዛሬ ከፍተኛ የተባለ የመሬት መንቀጥቀጥ ተከስቷል።

@Ethiopian_Digital_Library
@Ethiopian_Digital_Library

ከትምህርት ላይ እጃችሁን አንሱ

ይህ ያለ ዕውቀት የማይኖርበት ዘመን ነው። ትምህርት ለኢትዮጵያ ከማንኛውም አገር በላይ ያስፈልጋታል። ከዓለም አካሄድ የምንለይበት ምክንያት የለንም። ከአንደኛ ደረጃ እስከ ዩኒቨርስቲ ያለው ትምህርት እንደሚያስፈልግ ማስገንዘብ የሚያስፈልግበት ጊዜ ላይ ነን። ከሊቅ እስከ ደቂቅ ትምህርት እንደማያስፈልግ በሚናገርበት በአሁኑ ወቅት ስለ ትምህርት አስፈላጊነት መናገር ይኖርብናል። መምህራን ሆነው ሳይቀር ትምህርት ምን ይሰራል የማይሉ በርካቶች አጋጥመውኛል።

አዲስ አበባ ዩኒቨርስቲ ሲከፈት ዶክተር እጓለ ገብረዮሐንስ በሬዲዮ ስለ ዩኒቨርስቲ ምንነትና አስፈላጊነት ተናግረው ነበር። ይህም ንግግራቸው 'የከፍተኛ ትምህርት ዘይቤ' በሚል ርዕስ በመጽሐፍ መልኩ ታትሟል። ትምህርት የሚያስፈልገው ለዕውቀትና ሠናይት (መልካም ለማድረግ) መሆኑን በሰፊው ገልጸዋል። በቅርብ ዓመታት ከላይ እስከታች ትምህርትን የሚያጠፉ ተግባራት በግልጽና በረቂቅ መንገድ እየተካሄዱ ነው። ትምህርት ለዓመታት የማይማሩ በሚሊዮኖች የሚቆጠሩ ልጆች በአገሪቱ አሉ።

በጥድፊያ የተጀመረና በቂ ዝግጅት ያልተደረገበት የትምህርት ፖሊሲ ተተግብሯል። መጽሐፍ ሳይደርስ፣ መምህር ሳይዘጋጅ ወዘተ አዲስ ፖሊሲ ተተግብሯል። መጽሐፍን ያህል ነገር በአንድ ወር አዘጋጁ ሲባል የሚጠቅምም የማይጠቅምም ነገር ማጨቅ እየተለመደ ይሄዳል። ይህ ከሚሆን ጊዜ ተሰጥቶት ቢሆን ጥሩ ነበር። ካልሆነ ትምህርት ሊባል አይችልም።

በሌላ መንገድ 12ኛ ክፍል ተፈትኖ የሚያልፈው ተማሪ ተመጥኖ አንድ ዩኒቨርስቲ ቢያስተምረው የሚበቃ ከሰላሳ ሺህ ያልበለጠ ተማሪ ዩኒቨርስቲ እንዲቀላቀል ተደረገ። በዚህ ሁኔታ መምህሩ ሥራ እንዲፈታ ተደረገ። ይህንን መሠረት አድርጎ የሠራተኛ ቅነሳ እንዲደረግ በረቂቅ መንገድ ይሠራል። ዲፓርትመንቶች እንዲዘጉ ይወሰናል።

ይህ ሲደረግ ተጠንቶ ወይም በዲሞክራሲያዊ አካሄድ ባለድርሻ አካላት ተጠይቀው አይደለም። የኢትዮጵያ ህዝብ በሰላሳ ዓመት ውስጥ 200 ሚሊዮንን ያልፋል። ያን ጊዜም ሆነ አሁን ዩኒቨርስቲ ያስፈልጋል። ዕውቀት ያስፈልጋል።

ምሩቃን ባለሙያዎች ያስፈልጋሉ። ባይሆን መመረቅና ሥራ መያዝን ለመነጠል መስራት ይቻላል። የበጀትንም ጉዳይ ማስተካከል ይቻላል። የግልንም ሆነ የመንግሥትንም ዩኒቨርስቲዎችንና ኮሌጆችን በህግና መመሪያ ብዛት መዝጋትና ማስቸገር ለማንኛውም አገር አይጠቅምም። ይህንንም አስመልክቶ መጠየቅ ከሁሉም ዜጋ የሚጠበቅ ነው።

አንድ ሚኒስትር ወይም የዩኒቨርስቲ ፕሬዚዳንት ዩኒቨርስቲ እዘጋለሁ ሲል በዝምታ ማለፍ ያልተገባ ነው። ግልጽ እንዲሆን የምፈልገው ጉዳዩ የመምህራን ሥራ ማጣት ብቻ አሳስቦኝ እንዳልሆነ ነው። መምህራን ሥራ ቢለቁ እንኳን ከዚህ የተሻለ እንጂ ያነሰ ገቢ እንደማያገኙ አስባለሁ። ሁሉም አካላት ተመካክረውና አስበውበት ለትምህርት አስፈላጊው ትኩረት እንደሚሰጥ ተስፋ አደርጋለሁ። ሐሳባችሁን ስጡኝ። እንወያይበት።

Mezemir Girma

@Ethiopian_Digital_Library
@Ethiopian_Digital_Library

የመምህራን የመውጫ ምዘና የካቲት 1/2017 ዓ.ም ይሰጣል

በመምህርነት ሙያ ከዲፕሎማ ወደ መጀመሪያ ዲግሪ የትምህርት ደረጃ ማሻሻያ ስልጠና በክረምት መርሐግብር ስትከታታሉ ለቆይታችሁ መምህራን የመውጫ ምዘና የካቲት 1/2017 ዓ.ም ይሰጣል።

የምዘና ፈተናው በየአቅራቢያችሁ ባሉ አሰልጣኝ ዩኒቨርሲቲዎች የሚሰጥ መሆኑን ትምህርት ሚኒስቴር አሳውቋል። ምዘና የምትወስዱበት ተቋም/ዩኒቨርሲቲ በቀጣይ በክልል/ከተማ አስተዳደር ትምህርት ቢሮዎች በኩል ይገለፅላችኋል ተብሏል።

@Ethiopian_Digital_Library
@Ethiopian_Digital_Library

ዲላ ዩኒቨርስቲ፣ ሙስሊም ሴት ተማሪዎች በሒጃብ ምክንያት ከትምህርት ታግደዋል ተብሎ የተሠራጨው መረጃ "መሠረተ ቢስ" ነው ሲል በፌስቡክ ገጹ ባስተላለፈው መልዕክት አስተባብሏል።

ዩኒቨርስቲው "ብዝኀነትን" አክብሮ የሚሠራ የትምህርት ተቋም መኾኑን ገልጧል።

ኾኖም ሙስሊም ሴት ተማሪዎች ካለፈው ሰኞ ጀምሮ ሒጃብ በመልበሳቸው ምክንያት ወደ ዩንቨርስቲው ቅጥር ግቢ እንዳይገቡ ታግደው በመስጂዶች ለማደር እንደተገደዱ መናገራቸውን ዶይቸቨለ ዘግቧል።

ሰኞ'ለት 44 ሴት ሙስሊም ተማሪዎች ከስግደት ሲመለሱ፣ የግቢው ጸጥታ አካላት ሒጃባችኹን ካላወለቃችኹ አትገቡም እንዳሏቸው ተማሪዎቹ መግለጣቸውንም ዘገባው ጠቅሷል።

የኢትዮጵያ እስልምና ጉዳዮች ጠቅላይ ምክር ቤት ዋና ሥራ አስኪያጅ ከማል ሐሩን፣ ምክር ቤቱ በጉዳዩ ላይ ከትምህርት ሚንስቴር ሃላፊዎች ጋር በመነጋገር ለችግሩ ዘላቂ መፍትሄ ለማስገኘት እንዲቻል አንድ የጋራ መድረክ ለማካሄድ ቀጠሮ እንደተያዘ ተናግረዋል ተብሏል። #DW

@Ethiopian_Digital_Library
@Ethiopian_Digital_Library