ዳጉ-ጆርናል/Dagu-Journal

አሜሪካ በሱዳን ጦርነት የኬሚካል ጦር መሳሪያ ጥቅም ላይ ውሏል አለች

👉 አሜሪካ ከጁን 6 ጀምሮ ተግባራዊ የሚሆን ማዕቀብ በሱዳን ላይ ልትጥል እንደምትችል ይጠበቃል

አሜሪካ በሱዳን ላይ እኤአ በ2024 የኬሚካል ጦር መሳሪያ መጠቀሟን ካረጋገጠች በኋላ በሀገሪቱ ላይ ማዕቀብ እንደምትጥል የውጭ ጉዳይ ሚኒስቴር መስሪያ ቤቷ አስታውቋል። እ.ኤ.አ. በ 1991 በኬሚካል እና ባዮሎጂካል የጦር መሳሪያዎች ቁጥጥር እና ጦርነት ማስወገጃ ህግ (CBW Act) ላይ መሰረት ያደረገው ውሳኔ ሱዳን አካል የሆነችበትን የኬሚካል የጦር መሳሪያ ኮንቬንሽን (ሲደብሊውሲ)ን የማቴቴታከብር መሆኑን ከማረጋገጡ ጋር ተያይዞ ለኮንግረሱ ቀርቧል።

የመምሪያው ቃል አቀባይ ታሚ ብሩስ በሰጡት መግለጫ “ዩናይትድ ስቴትስ የሱዳን መንግስት ሁሉንም የኬሚካል ጦር መሳሪያዎች መጠቀም እንዲያቆም እና በCWC ስር ያሉትን ግዴታዎች እንዲወጣ ትጠይቃለች" ብሏል። የ15 ቀን የኮንግረስ ማሳወቂያ ጊዜን ተከትሎ፣ በፌደራል መዝገብ ላይ ማስታወቂያ ከታተመ በኋላ፣ ማዕቀቡ ከጁን 6፣ 2025 ጀምሮ ተግባራዊ ይሆናል ተብሎም ይጠበቃል። እርምጃዎቹ ዩኤስ ወደ ሱዳን የምትልካቸው ምርቶች ላይ እና የአሜሪካ መንግስት የብድር መስመሮችን የማግኘት ገደቦችን ያካትታል።

ዩናይትድ ስቴትስ ለኬሚካል ጦር መሳሪያ መስፋፋት አስተዋፅዖ ያደረጉ አካላትን ተጠያቂ ለማድረግ ቁርጠኝነቷን በድጋሚ የገለፀች ሲሆን የሱዳን ኬሚካላዊ የጦር መሳሪያዎች መጠቀም ምርመራ የተደረገውም ሪፖርቶችን ተከትሎ ነው ተብሏል።

በጥር 16 2025 ላይ የወጣው የኒውዮርክ ታይምስ ዘገባ እንደሚያመለክተው የዩናይትድ ስቴትስ ከፍተኛ ባለስልጣናት የሱዳን ጦር ሀገሪቱን ለመቆጣጠር በሚዋጋው የፈጣን ድጋፍ ሰጪ ሀይሎች ቡድን ላይ ቢያንስ ሁለት ጊዜ ኬሚካላዊ የጦር መሳሪያ ተጠቅሟል ይላል። የኬሚካል ጦር መሳሪያዎች ጥቃቱ ከመሀል ሱዳን ርቀው በሚገኙ አካባቢዎች ላይ በሰፈሩ የአር.ኤስ.ኤፍ ታጣቂዎች ላይ ያነጣጠረ እንደነበርም ተዘግቧል።

በሚሊዮን ሙሴ
#ዳጉ_ጆርናል

የአፍሪካ ህብረት ፍልስጤማውያንን ወደ አፍሪካ ለማፈናቀል በሚደረገው ጥረት ደስተኛ እንደማይሆን አስታወቀ

የአፍሪካ ህብረት ፍልስጤማውያንን ወደ አፍሪካ ለማባረር በሚደረገው ሙከራ ደስተኛ ሊሆን አይችልም ሲሉ የአንጎላ የውጭ ጉዳይ ሚኒስትር ቴቴ አንቶኒዮ ተናግረዋል። "በእርግጠኝነት የሁለት መንግስታት መፍትሄ፣ ሁለት መንግስታት ጎን ለጎን እና የተባበሩት መንግስታት ድርጅት የፀጥታው ምክር ቤት ውሳኔዎችን እንጠብቃለን ሲል አንቶኒዮ ከአውሮፓ ህብረት የውጭ ጉዳይ ፖሊሲ ኃላፊ ካጃ ካላስ ጋር በጋራ በሰጡት ጋዜጣዊ መግለጫ ላይ ተናግረዋል። ይህው የተነገረው በብራሰልስ ሶስተኛውን የአውሮፓ ህብረት እና የአፍሪካ ህብረት የሚኒስትሮች ስብሰባ ላይ ነው።

እኛ ለክልሉ ቅርብ ነን እናም ቢያንስ ለእነዚያ ሰዎች ስቃይ ግድየለሾች አይደለንም ብለዋል። አንቶኒዮ “የአፍሪካ ህብረት መርህ ሁል ጊዜ ግጭት በሚፈጠርበት ቦታ ሁሉ እና ለፍልስጤም ህዝብ ጎን ይቆማል” ብለዋል ። የአፍሪካ ህብረት ለጉባኤው ብቸኛ ቋሚ ተጋባዥ የፍልስጤም ባለስልጣን ሊቀመንበር መሆኑን ገልፀው ለህብረቱ "የፍላጎት ጥያቄ ፣ ትልቅ ጉዳይ" ነው ብለዋል ። ካላስ በበኩሏ በአፍሪካ የሳህል ክልል ያለው ሁኔታ የአውሮፓ ህብረትን "በጣም ያሳስበዋል" በማለት ህብረቱ "በአዲሱ የሳህል ስትራቴጂ" ላይ እንደሚወያይ ተናግራለች።

እኔም የሁለትዮሽ ስብሰባዎችን አድርጌያለሁ፣ ከአፍሪካ ሀገራትም የእነርሱን አስተያየት ጠይቄያለሁ  ስትል የአውሮፓ ህብረት የውጭ ጉዳይ ፖሊሲ ኃላፊ ካጃ ካላስ ተናግራለች። በአህጉራዊ የሽምግልና ጥረቶቹ ለአፍሪካ ህብረት ድጋፉን ገልጻለች። እነዚህ ሁሉ ሂደቶች በአፍሪካም የአፍሪካ መሪ እና የአፍሪካ ባለቤትነት አላቸው ብላለች።፣ ካላስ በተጨማሪም በየቦታው "ውጊያ" አለ እናም "የተሳሳቱ መረጃዎች ሩሲያ በተለይም በአፍሪካ ውስጥ ከምትጠቀምባቸው መሳሪያዎች ውስጥ አንዱ ነው" በማለት ገልፀዋል ። አክለውም “የተሳሳቱ መረጃዎችን እና የውጭ መጥፎ ተጽዕኖዎችን ሁል ጊዜ መዋጋት አለብን” ብለዋል ።

በስምኦን ደረጄ
#ዳጉ_ጆርናል

47 የጤና ባለሙያዎች በቁጥጥር ስር መዋላቸውን ፌደራል ፖሊስ አስታወቀ

👉 የኢትዮጵያ ፌደራል ፖሊስ በወቅታዊ ጉዳይ ላይ አስመልክቶ ያወጣውን መግለጫ ሙሉ ይዘት እንደሚከተለው ቀርቧል።

ሰሞኑን የጤና ባለሙያዎች ያነሱትን የመብት ጥያቄ ሽፋን በማድረግ በሀገራችን ትርምስ እንዲፈጠር ከሚሠሩ ኃይሎች ጋር በማበር ሕገ ወጥ የሥራ ማቆም አድማ በማድረግ፣ በጤና ዘርፉ ላይ ሁከት በመፍጠር እና የታካሚዎችን ህይወት አደጋ ላይ በመጣል የተጠረጠሩ 47 የጤና ባለሙያዎችን የኢትዮጵያ ፌደራል ፖሊስ በቁጥጥር ሥር አውሎ ምርመራ ማጣራት ጀምሯል፡፡ 

እነዚህ ተጠርጣሪዎች የጤና ባለሙያዎች ያነሱትን የደመወዝ እና የጥቅማ ጥቅም ጥያቄ እንደሽፋን በመጠቀም ሕገ-ወጥ የሥራ ማቆም አድማ በማድረግ፤ ሌሎችም ሥራ እንዲያቆሙ ለአድማ በማነሳሰት፣ የታካሚዎች ሕይወት ለሞትና ለአደጋ እንዲጋለጥ በማድረግ ሁከትና ብጥብጥ በመፍጠር የተጠረጠሩ ናቸዉ፡፡

ተጠርጣሪዎቹ በተለያዩ የጤና ተቋማት የአድማ መረቦችን በመዘርጋት፤ የጤና ባለሙያ ያልሆኑ አካላትን ነጭ ጋዋን በማስለበስ የሆስፒታል ቅጥር ግቢ ውስጥ ገብተዉ ሁከት እንዲፈጥሩ በማድረግ፣ ያልተገባ ወሬ በመንዛት እና በተለያየ መንገድ ሰላማዊ የሕክምና ሂደትን በማደናቀፍ የሕሙማንና የጤና እርዳታ የሚያስፈልጋቸውን ሰዎች ሕይወት አደጋ ላይ እንዲወድቅ በማድረግ፣ በመንግሥት የሕክምና አገልግሎት እና ትምህርት በሚሰጥባቸው ተቋማት ውስጥ ሰላማዊ የመማር ማስተማር ሂደት እንዲስተጓጎል አድርገዋል፡፡

እንዲሁም ሙያቸውን አክብረው በሥራ ላይ በተገኙ ባልደረቦቻቸው ላይ ዛቻ እና ማስፈራራት ከማድረስ ባለፈ ሁከት እንዲፈጠር ሙከራዎችን አድርገዋል ያላቸውን 47 ተጠርጣሪዎች በመረጃና በማስረጃ በመለየት በቁጥጥር ሥር አውሎ ምርመራ እያካሄደ እንደሚገኝ የኢትዮጵያ ፌደራል ፖሊስ አስታውቋል።

የኢትዮጵያ ፌደራል ፖሊስ የጤና ባለሙያዎቹ የሙያው ሥነ-ምግባርና ሕግ በማይፈቅደው ሁኔታ የዜጎችን ሕይወት ለሞትና ለአደጋ በማጋለጥ ሥራ ማቆም፣ ሌሎችም ሥራ እንዲያቆሙ ማነሳሳት እና ማስፈራራት፣ የወንጀል ተግባር መሆኑን እየገለፀ ሌሎችም ከዚህ ተግባር እንዲቆጠቡ ያሳስባል። 

በዚህ አጋጠሚ ሕዝባቸውን እና ሕግ አክብረው አገልግሎት እየሰጡ ላሉ የጤና ባለሙያዎች ፖሊስ አስፈላጊውን ጥበቃ እንደሚያደርግ እያረጋገጠ፤ ከዚህ ውጭ ሁከትና ብጥብጥን ለማስፋፋት በሚንቀሳቀሱ አካላት ላይ ፖሊስ እየወሰደ ያለውን ሕጋዊ እርምጃ አጠናክሮ እንደሚቀጥል ያሳውቃል።

#ዳጉ_ጆርናል

ከውድቀት ማግስት የመዓርግ እድገት ያገኙት የፓኪስታን ጦር ኢታማጆር ሹም እያነጋገሩ ነው

👉 የሀገሪቱ መንግስት የጦር አዛዡን የፊልድ ማርሻልነት መዓርግ ቢሰጣቸውም የሀገሬው ሰው ግን የከሸፉ ማርሻል "ፌይልድ ማርሻል" ሲል እየጠራቸው መሆኑም ተነግሯል።

ከህንድ ጋር ገብተውበት የነበረው ግጭት ጋብ ካለ በኃላ የፓኪስታን መንግስት የሀገሪቱ ጦር አዛዥ ለሆኑት ለጀነራል አሲም ሙኒር የፊልድ ማርሻልነት መአርግ ቢሰጥም ጀነራሉ ግን አዲሱ መአርግ ለትችት ዳርጓቸዋል። በጠቅላይ ሚኒስተር ሸህባዝ ሻሪፍ የሚመራው የፓኪስታን ካቢኔ የጄነራሉን ሹመት ያፀደቀ ሲሆን ይህም በሀገሪቱ ይህንኑ የፊልድ ማርሻልነት ማዓርግ ያገኙ ሁለተኛው ሰው እንዲሆኑ አድርጓቸዋል። በፓኪስታን ለመጀመርያ ጊዜ የፊልድ ማርሻልነት ማዓርግ የተሰጣቸው ሞሀመድ አይብ ከሓን በመባል የሚታወቁት የጦር አዛዥ ሲሆኑ ጊዜው ደግሞ እኤአ በ1959 ነበር።

ታድያ ከአምስት አስርት ዓመታት በኃላ በቅርብ ጊዜው ጦርነት የላቀ የአመራር በቃትና አፈፃፀም አስመዝግበዋል የተባሉት ጀነራል ሙኒር በተለይ የሲንዶር ዘመቻን የመሩበት መንገድ ይህንን የፊልድ ማርሻልነት መዓርግ አሰጥቷቸዋል ተብሏል። ነገር ግን በርካቶች በአስር ቀናት ውግያ ሊፈረካከስ ከጫፍ ደርሶ የነበረን ጦር የመራን ጀነራል የመዓርግ እድገት መስጠት ስድብ ነው ሲሉ ተደምጠዋል። አክለውም ጀነራሉ ፊልድ ማርሻል የተባሉት መሬት ላይ ባልታዩ ስኬቶች ወይም በሐሰተኛ ሪፖርት ነው ብለዋል።

የጀነራሉን ሹመት ተከትሎ በተለይ ኤክስ ላይ መነጋገርያ ለመሆን የቻለ ሲሆን እራሱን በራሱ ነው የሾመው መንግስት ከማፅደቅ ውጭ ምንም ለማለት አቅም የለውም ቢኖረው ጦርነቱ ወቅት ለተፈጠሩ ድክመቶች ተጠያቂ ሊያደርገው ነበር የሚገባው የሚሉ አስተያየቶችም ተስተጋብተዋል።

ሌሎች አስተያየት ሰጪዎች ደግሞ ምንም እንኳ ፓኪስታን በአስር ቀናት ጦርነቱ ሙሉ የበላይነት ተወስዶባት የነበረ ቢሆንም የሀገሪቱ መንግስት ግን ራሱን እንደ ድል አድራጊ አድርጎ ይቆጥራል ለዚህም ነው የጦር አዛዡን ፊልድ ማርሻል ሲል የሰየመው እውነታው ግን ጀነራል ሙኒር ፊልድ ማርሻል ሳይሆኑ ፌይልድ ማርሻል ናቸው ሲሉ ተደምጠዋል።

በሚሊዮን ሙሴ
#ዳጉ_ጆርናል

የእንግሊዝ ፍርድ ቤት የቻጎስ ደሴቶችን ለሞሪሸስ ለማስረከብ የተደረገውን ስምምነት አገደ

የብሪታኒያ ከፍተኛ ፍርድ ቤት ዳኛ መንግስት የቻጎስ ደሴቶችን ሉዓላዊነት ወደ ሞሪሸስ እንዳያስተላልፍ ለጊዜው አግዶታል።ሐሙስ እለት የመጨረሻ ደቂቃ ላይ ትእዛዝ የሰጠዉ ፍርድ ቤቱ ስምምነቱ ከሞሪሸስ መንግሥት ተወካዮች ጋር ይፈረማል ተብሎ ከመጠበቁ ከሰዓታት በፊት ነበር።

የከፍተኛ ፍርድ ቤት ውሳኔ ተቀባይነት ያገኘው በቻጎስ በሚገኘው በዲያጎ ጋርሺያ ወታደራዊ ካምፕ ውስጥ በተወለዱ ሁለት የእንግሊዝ ዜጎች በሆኑት በርናዴት ዱጋሴ እና በርትሪስ ፖምፔ ደሴቶቹ በብሪታንያ ቁጥጥር ስር እንዲቆዩ ከጠየቁ በኃላ ነዉ። የከፍተኛ ፍርድ ቤት ዳኛ ጁሊያን ዝይ የብሪቲሽ መንግስት ማንኛውንም “የሚያጠናቅቅ ወይም ህጋዊ አስገዳጅ እርምጃ እንዳይወስድ ለጊዜው አግዶት የነበረው የብሪቲሽ ህንድ ውቅያኖስ ግዛት፣ እንዲሁም የቻጎስ ደሴቶች በመባልም የሚታወቀው ለውጭ መንግስት” ማዛወርን በሚመለከት ድርድሩን ለመደምደም ነዉ።

ከ1814 ጀምሮ ክልሉን የተቆጣጠረችው እንግሊዝ በ1965 የቻጎስ ደሴቶችን ከሞሪሸስ በመለየት የብሪቲሽ የህንድ ውቅያኖስ ግዛትን መፍጠር ችላለች። እ.ኤ.አ. በ1970ዎቹ መጀመሪያ ላይ መንግስት በትልቁ ደሴት ላይ ለሚገኘው የዲያጎ ጋርሺያ አየር ማረፊያ መንገድ ለማድረግ ወደ 1,500 የሚጠጉ ነዋሪዎችን ወደ ሞሪሸስ እና ሲሸልስ አስወጥቷል።

በጥቅምት ወር መንግስት ደሴቶቹን ለሞሪሸስ ለማስረከብ እና ብሪታንያ እና ዩናይትድ ስቴትስ በ99 አመት የሊዝ ውል መሰረት የዲያጎ ጋርሺያ ቤዝ መጠቀማቸውን እንዲቀጥሉ የሚያስችል ረቂቅ ስምምነት አስታውቋል።በስምምነቱ ላይ ምክክር በማድረግ የአሜሪካ ፕሬዝዳንት ዶናልድ ትራምፕ አስተዳደር አፅድቆታል። ይሁን እንጂ ስምምነቱን ማጠናቀቅ ያልተቻለ ሲሆን በሞሪሸስ የመንግስት ለውጥ የተነሳ ዘግይቷል።

በስምኦን ደረጄ
#ዳጉ_ጆርናል

በካርቱም ያጋጠመው የውሃ ቀውስ ተከትሎ በሱዳን የኮሌራ ወረርሺኝ መባባሱ ተገለፀ

የሱዳን የጤና ጥበቃ ሚኒስቴር በኦምዱርማን ካራሪ አካባቢ እና ከካርቱም በስተደቡብ በምትገኘው ጃባል አውሊያ የኮሌራ በሽታ መከሰቱን አስታውቋል። በካርቱም ግዛት ውስጥ ከፍተኛ የውሃ አቅርቦት ችግር ያጋጠመ ሲሆን ግንቦት 14 ቀን የፈጣን ድጋፍ ሰጪ ሃይሎች በኦምዱርማን ሶስት የኃይል ማመንጫ ጣቢያዎችን ላይ ጥቃት በመፈፀሙ በመዲናዋ መብራት እንዲቋረጥ ካደረገ በኋላ ቀውሱ ተባብሷል።

የካርቱም ነዋሪዎች ንፁህ ካልሆኑ ምንጮች ለምሳሌ ጥልቀት ከሌለው ጉድጓዶች ወይም በቀጥታ ከአባይ ወንዝ ውሃ ቀድቶ በመጠቀም ለበሽታዎች መስፋፋት አስተዋጽኦ አደርጓል ተብሏል። "በሦስት ሳምንታት ውስጥ 51 ሞትን ጨምሮ 2ሺ323 አዳዲስ የኮሌራ በሽታዎች ተመዝግበዋል የሚለው የሱዳን ጤና ሚኒስቴር ከእነዚህ ውስጥ 90 በመቶ የሚሆኑት በካርቱም ግዛት በተለይም በካራሪ እና ጄቤል ኦሊያ ናቸው" ሲል የጤና ሚኒስቴር የአደጋ ጊዜ ኦፕሬሽን ማእከል በሰጠው መግለጫ አስታውቋል።

ሚኒስቴሩ ሱዳን በክልሎች የተለያዩ የኢንፌክሽን እና የሞት አደጋዎችን ጨምሮ የዴንጊ ትኩሳት፣ ወባ፣ ሄፓታይተስ፣ ኩፍኝ እና ዲፍቴሪያን ጨምሮ ሌሎች የጤና ችግሮች እንዳጋጠሟት ገልጿል። የጤና ሚኒስቴር በሽታን የመከላከል ዘዴዎችን በማስተማር የቤት ውስጥ ጉብኝት በማድረግ፣ ቲያትር እና ተንቀሳቃሽ ሲኒማ እንዲሁም የማህበረሰብ ውይይት በማዘጋጀት እና በመገናኛ ብዙሃን የግንዛቤ ማስጨበጫ መልእክቶችን በማሰራጨት ላይ ይገኛል።

መግለጫው አክሎም ከ 50 በመቶ በላይ አስፈላጊ የሆኑ መድሃኒቶች እና ለወረርሽኝ በሽታዎች የፍጆታ እቃዎች በብሔራዊ የሕክምና አቅርቦቶች ፈንድ መጋዘኖች ውስጥ ይገኛሉ ያለ ሲሆን በተጨማሪም፣ አንዳንድ ድርጅቶች በተወሰኑ ግዛቶች ውስጥ የራሳቸው አቅራቢዎች አሏቸው ብሏል። በግጭት ዞኖች ውስጥ እስከ 80 በመቶ የሚደርሱ እና 45 በመቶ ገደማ የሚሆኑት በሌሎች አካባቢዎች ያሉ የጤና ተቋማት በአቅርቦት እጥረት፣ በመብራትና በውሃ እጥረት እና የህክምና ባለሙያዎች ስራ በማቆማቸው ሳብያ ችግር ውስጥ ወድቀዋል ተብሏል።

በሚሊዮን ሙሴ
#ዳጉ_ጆርናል

የጉራጌ ዞን ገቢዎች መምሪያ ባለፉት ዘጠኝ ወራት የስነምግባር ጥሰቶችን የፈፀሙ 26 ሞያተኞች ከስራ እስከማሰናበት የሚደርስ እርምጃ መውሰዱን አስታወቀ

በ2017 በጀት ዓመቱ ከመደበኛና ከማዘጋጃ ለመሰብሰብ የታቀደው ገቢ 3 ቢሊየን 672 ሚሊየን 186ሺ 772 ብር ነበር ሲሉ በጉራጌ ዞን ገቢዎች መምርያ የታክስ ትምህርት ድጋፍ ባለሞያ የሆኑት አቶ ይረፉ አባተ ተናግረዋል፡፡ ባለፉት በዘጠኝ ወራት ከ2 ቢሊዮን 754 ሚሊየን ብር ለመሰብሰብ ታቅዶ ከዚህም ውስጥ ባለፉት ዘጠኝ ወራት 2 ቢሊየን 322 ሚሊየን መሰብሰብ መቻሉን እና  ከታቀደው  84.34 በመቶ የሚሸፍን ማሳካት መቻሉን አቶ ይረፉ አባተ ለብስራት ሬድዮ ተናግረዋል።

ከዚህ ባሻገር መምርያው ባለፉት ዘጠኝ ወራት ውስጥ 26 ባለሙያዎች ላይ እርምጃ መውሰዱ የነገሩን ባለሞያው፤ ሞያተኞቹ በተለያዩ የስነምግባር ጥሰቶች በመሳተፍ እርምጃ የተወሰደባቸው ናቸዉ፡፡ ከ26ቱ አስሩ የቃል ማስጠንቀቅያ፣ ለሰባት ሞያተኞች የፅሑፍ ማስጠንቀቅያ፣ ሶስት ሞያተኞች ከስራ ሲሰናበቱ አንድ ሰራተኛ በደመዎዝ፣ አንዱ ደግሞ ከደረጃ ዝቅ ብሎ እንዲሰራ የቅጣት ውሳኔ ተሰጥቷል::አራት ጉዳዮች ደግሞ በሂደት ላይ ያሉ መሆናቸው ገልፀዋል።

ያለ ምክንያት ከስራ ቦታ መጥፋት፣ በተደጋጋሚ ከስራ ቦታ መቅረት፣ በደረሰኝ የተሰበሰበ ገቢ እጅ ላይ ማቆየት፣ ያለ ደርሰኝ ገቢ መሰብሰብ፣ የተሰጠን ኃላፊነት በአግባቡ አለመወጣትና የተሰጣቸው የስልጣን እርከን ተላልፈው ጉዳይ መፈፀም የመሳሰሉ የዲስፒሊን ጥሰቶች ለቅጣቶቹ ዋነኛ መንስኤዎች ናቸው።

የጉራጌ ዞን ገቢዎች መምርያ ከሞያተኞቹ በተጨማሪ በግብር ከፋዮች ላይ እንደየ ጥፋት መጠናቸው የተለያዩ የእርምት እርምጃዎች ወስዷል፡፡ ደረሰኝ ሳይቆርጡ ግብይንት ሲፈፅሙ የተገኙ 92 ግብር ከፋዮች ላይ በወሰደው እርምጃ በዘጠኝ ወሩ ውስጥ ከ2 ሚሊዮን 685 ሺ ብር በላይ ገቢ መሰብሰብ መቻሉን  አቶ ይረፉ አባተ ጨምረው ለብስራት ሬድዮ ተናግረዋል።

በሰብል አበበ
#ዳጉ_ጆርናል