ዳጉ-ጆርናል/Dagu-Journal

የጾታዊ ግንኙነት ጥያቄን አልተቀበልሽም በማለት በፍቅረኛዉ ላይ የግድያ ሙከራ የፈጸመዉ ግለሰብ በእስራት ተቀጣ

በደቡብ ምዕራብ ሸዋ ዞን ሰበታ አዋስ ወረዳ የወሲብ ጥያቄዬን አልተቀበለችም በማለት ፍቅረኛው ላይ የግድያ ሙከራ የፈፀመው ግለሰብ በእስራት መቅጣቱን የደቡብ ምዕራብ ሸዋ ዞን ፖሊስ መምሪያ ገልጿል። የደቡብ ምዕራብ ሸዋ ዞን ፖሊስ መምሪያ የኮሚኒኬሽን ፅህፈት ቤት ኃላፊ ምክትል ኢንስፔክተር ትግሉ ለገሰ እንደገለፁት ተከሳሽ ከድር ሁላላ የተባለው ግለሰብ ሰኔ 24 ቀን 2016 ዓ.ም ከቀኑ 11 ሰዐት ተኩል ላይ የ 25 አመት እድሜ ያላትን ፍቅረኛውን ወደ መኖሪያ ቤቱ በመጥራት የጾታዊ ግንኙነት ጥያቄ እንዳቀረበላት እና ወጣቷም ጊዜው አሁን እንዳልሆነ እና እርሷም ለዚህ ዝግጁ እንዳልሆነች የገለፀችለት መሆኑም ተረጋግጧል።

በዚህ በፍቅረኛው ምላሽ ንዴት የገባው ተከሳሽ በርካታ ብሮችን እየቆጠረ ለፍቅረኛው በማሳየት ለማባበል ቢሞክርም የብር ማሰሪያ ላስቲክ መሬት ላይ በመጣል የብር ማሰሪያውን አንስታ እንድትሰጠው በትዕዛዝ መልክ መጠየቁም ተገልፆል።የ25 አመቷ የግል ተበዳይ የሆነችው ወጣትም የብር ላስቲኩን ለማንሳት ከተቀመጠችበት ተነስታ ጎንበስ ስትል ተከሳሹ ያዘጋጀውን ስለታም ቢላ በቀኝ የጀርባ አጥንቷ ላይ በማሳረፍ እንደወጋትና ጉዳት እንዳደረሰባት በማስረጃ ተረጋግጧል። ጉዳት የደረሰባት ወጣት በወቅቱ ባሰማችው የድረሱልኝ ጩኸት የአካባቢ ሰዎች ደርሰው በፍጥነት ወደ ሰበታ ጤና ጣቢያ በማድረስ የህክምና አገልግሎት በማግኘቷ ህይወቷ ሊተርፍ ችሏል። ፖሊስ የድርጊቱ ፈፃሚ በክትትል ከተሸሸገበት በቁጥጥር ስር ሊያውለው መቻሉንም ገልፀዋል።

ተጎጂዋ ወጣት ተከታታይ የህክምና እርዳታ ካገኘች በኋላ ፖሊስ በማስረጃነት ቃሏን ተቀብሎ የምርመራ መዝገቡን በተገቢ የሰው ማስረጃ እና ወንጀሉ የተፈፀመበትን ቢላዋ በኤግዚቢትነት በመያዝ እንዲሁም ከአካባቢው ሰዎች ማስረጃ በማጠናከር የምርመራ መዝገብ አጠናቆ ለአቃቤ ህግ ልኳል።

አቃቤ ህግም ከፖሊስ የተላከውን የምርመራ መዝገብ ተመልክቶ በሰው መግደል ወንጀል ሙከራ አንቀፅ 540 እና አንቀፅ 27 ንዑስ አንቀፅ 1 መሠረት ክስ የመሠረተ ሲሆን ከአቃቤ ህግ የተመሠረተውን ክስ ሲከታተል የነበረዎ የደቡብ ምዕራብ ሸዋ ዞን ከፍተኛው ፍርድ ቤት ጥቅምት 29  ቀን 2017 ዓ.ም በዋለው ችሎት ተከሳሽ ከድር ሁላላ የሱፍ ጥፋተኛነቱ በአቃቤ ህግ ማስረጃ ሙሉ በሙሉ በመረጋገጡ በሰው መግደል ወንጀል ሙከራ  በሰባት አመት እስራት እንዲቀጣ የተወሰነበት መሆኑን ምክትል ኢንስፔክተር ትግሉ ለገሰ ገልፀዋል።

በሰመኃር አለባቸው
#ዳጉ_ጆርናል

በአሜሪካ የእንስሳት ድምፅ ረበሸኝ በማለት ለፖሊስ ቅሬታ ያቀረቡት አዛውንት የእንስሳ ድምፅ የመሰላቸው በቤታቸው ውስጥ በድብቅ የሚኖር ሰው ሆኖ ተገኘ

ከቤታቸው ስር የሚሰማው ድምፅ ከእንስሳት የተሰማ ነው ብለው ያሰቡ የካሊፎርኒያ አዛውንት ሴት ባቀረቡት ሪፖርት መሰረት እርቃኑን ከቤታቸው ስር የሚኖር ሰው በመገኘቱ ድንጋጤ ውስጥ ወድቀዋል።

በሎስ አንጀለስ ኤል ሴሬኖ ሰፈር ነዋሪ የሆኑት የ93 ዓመቷ አዛውንት ባለፉት ጥቂት ሳምንታት ከቤታቸው ስር መስማት የጀመሩት አስደንጋጭ ጩኸት የዱር እንስሳት ይሆናል ብለው ቢገምቱም የሰው መሆኑ ሲገነዘቡ በሕይወታቸው ላይ ከፍተኛ ድንጋጤ ፈጥሯል። አዛውንቷ እና ቤተሰባቸው ብዙውን ጊዜ በሌሊት ከቤታቸው ምድር ቤት ያልተለመዱ ድምፆችን ይሰሙ ነበር። እናም ውሻ ወይም የዱር አራዊት ናቸው ብለው ገምተው ነበር። ነገር ግን ባለፈው ሳምንት ሐሙስ ጩኸቱ በተለይ ጠንከር ያለ እና የእግር ኮቴ መሰማት ይጀምራል።

በስፍራው ላይ የሆነ ትክክል ያልሆነ ነገር እንዳለ መጠራጠር ጀመሩ፣ ጉዳዩን ለፖሊስ ባደረጉት ሪፖርይ መሰረት አንድ እርቃኑን እዛው ቤት ውስጥ ለረጅም ጊዜ ይኖር የነበረን ሰው ፖሊስ ባደረገው ፍተሻ ማግኘት ችሏል።ብዙውን ጊዜ ምሽት ላይ ከቤታችን ምድር ቤት ላይ በእንስሳት ድምፅ እንሳቀቅ ነበረ ሲሉ የቤት ባለቤቷ አዛውንት አማች ሪካርዶ ሲልቫ ለኤንቢሲ ሎስ አንጀለስ ተናግራለች። ድምፆቹ እንደ ማንኳኳት የሚመስሉ እና ባለቤቴ ወለሉ ላይ ሲራመድ፣ ከቤቱ ስር ሆነው ያንኳኩ ነበር፣ እናም የሆነ ችግር እንዳለ ይታውቅኃል ብላለች። ያልተጋበዘውን እንግዳ ከቤቱ ስር ማስወጣት ከፍተኛ ስራ የጠየቀ ሲሆን ምክንያቱ ደግሞ በግለሰቡ መውጣት ባለመፈለጉ የተነሳ ነው።

ፖሊስ ግለሰቡ ወደ ውጭ ወጥቶ ለማነጋገር ለሰዓታት ያህል አሳልፏል። ከዚያም በፖሊስ ውሾች ሊያስፈራሩት ሞክረዋል፣ ነገር ግን ምንም የተጨነቀ አይመስልም። በመጨረሻ ከቤቱ ምድር ቤት በአስለቃሽ ጭስ አስገድደው ለማስወጣት ችለዋል።በመጀመሪያ ለመውጣት ፈቃደኛ አልሆነም። የፖሊስ ውሾቹን አልፈራም እንዲሁም ሁለት አስለቃች የጋዝ ሙከራዎች አላስፈራሩትም ተብሏል።

ሪካርዶ ሲልቫ እንዳለችው ይህ በጣም ያልተለመደ እንግዳ ነገር ነው፣ ግን ደግሞ ምናልባት ያልተለመደ ላይሆን ይችላል፣በዚህ ዘመን ሰዎች መጠለያ እየፈለጉ በመሆኑ እንዲህ ዓይነት ውሳኔ ላይ ሊደርሱ ይችላሉ። እርቃኑን የነበረው ሰው የ27 ዓመቱ ኢሳክ ቤታንኮርት የተባለ ሲሆን ላለፉት ስድስት ወራት በኤል ሴሬኖ ቤት ውስጥ እንደኖረ ተጠርጥሯል። ቤተሰቡ አሁን ተመሳሳይ ችግሮች እንዳይከሰቱ ለመከላከል በጠቅላላው ቤት ስር ያለውን ባለ 2 ጫማ ከፍታ ያለው የመንሸራተቻ ቦታ ለመዝጋት አቅዷል።

በስምኦን ደረጄ
#ዳጉ_ጆርናል

በአዲስ አበባ ከተማ ባለፉት ሶስት ወራት አምስት የከባድ ማሽነሪ ማሠልጠኛ ተቋማት ታግደዋል

የአሽከርካሪ ተሽከርካሪ ፈቃድ እና ቁጥጥር ባለስልጣን የአሽከርካሪ ዘርፍ የ2017 ዓመት የመጀመሪያው ሩብ ዓመታት እቅድ አፈፃፀም መሰረት ለ 18 ሺ 10 አሽከርካሪዎች ብቃት ማረጋገጥ መቻሉን እንዲሁም  55 ሺ 8 መቶ 2 መንጃ ፈቃድ እንዲታደስ ተደርጓል፡፡ በተጨማሪም ባለፉት ሶስት ወራት ለ3 ሺ 4 መቶ 35 የኢንተርናሽናል መንጃ ፈቃድ አገልግሎት መሥጠት መቻሉን በባለስልጣኔ የኮምኒኬሽን ዳይሬክቶሬት ዳይሬክተር ወ/ሮ ሰርካለም አሰፋው ለብስራት ሬዲዮና ቴሌቪዥን ተናግረዋል፡፡

በዘርፉ የመልካም አስተዳደር ችግር ሆነው ለረጅም ጊዜ የቆዩ የደረጃ መንጃ ፈቃድ እድሳት የተግባር መለማመጃ ቦታ እንዲሁም የቀጠሮ እና የፈተና አጭር የፅሁፍ መልዕክት የነበሩ ክፍተቶች መፈታቱንም ተናግረዋል፡፡

ባለስልጣኑ 131 የአሽከርካሪ ማሰልጠኛ ተቋማት ድጋፍ እና ክትትል ማድረጉን አክለው ገልፀዋል።በተጨማሪም በተደረገው ክትትል ብቁ አሽከርካሪ ለማፍራት የተቀመጠውን አሰራር ተግባራዊ ያላደረጉ 5 የከባድ ማሽነሪ ማሠልጠኛ ተቋማት ፍቃድ መታገዱን ገልፀዋል። እንዲሁም አንድ ማሰልጠኛ ተቋም ህግ እና መመሪያ በመጣሱ ፍቃዱ ተሰርዞበታል ብለዋል። በአስራ አራት የባለስልጣኑ ሰራተኞች ላይ የዲሲፕሊን እርምጃ መወሰዱን ወ/ሮ ሰርካለም አሰፋ ጨምረው ለጣቢያችን ተናግረዋል፡፡

በሰመኃር አለባቸዉ
#ዳጉ_ጆርናል

ሱዳን የተባበሩት መንግስታት ድርጅት ውሳኔን አትቀበልም ሲሉ  ጀነራል አብደል ፈታህ አልቡርሃን ተናገሩ

የሉዓላዊው ምክር ቤት ፕሬዝደንትና የሱዳን ጦር ሃይሎች ዋና አዛዥ ጄኔራል አብደል ፈታህ አል ቡርሃን፣ የመንግስታቱ ድርጅት በሱዳን ላይ ያስተላለፈውን ውሳኔ በራሺያ ድምፅን በድሞፅ የመሻር መብት ተጠቅመው የፀጥታው ምክር ቤት ውሳኔን ውድቅ አድርገውታል።

በፖርት ሱዳን በተካሄደው የኤኮኖሚ ኮንፈረንስ ላይ ንግግር ያደረጉት አል-ቡርሃን የውሳኔ ሃሳቡን ለፈጣን የድጋፍ ሰጪ ሃይሎች የጦር መሳሪያ በማቅረብ ረገድ የውጭ ተዋናዮችን ሚና ባለመቀበል ተችተዋል። አል-ቡርሃን ሱዳን ከጦርነቱ በኋላ ከዓለም አቀፍ ተዋናዮች ጋር የሚኖራት ግንኙነት በግጭቱ ወቅት ባላቸው አቋም እንደሚወሰን አጽንኦት ሰጥተዋል።

አርኤስኤፍ ቀደም ሲል በጅዳ የተካሄደውን የተኩስ አቁም ስምምነት እንደገና ለማስታጠቅ እና የከተሞችን ከበባ ለማጠናከር ውሏል ሲሉ ከሰዋል። ጦር አዛዡ በውስጥ በኩል መፍትሄ ለመፈለግ እና የውጭ ጣልቃ ገብነትን እንደሚቃወሙ ገልፀው ጦራቸው በሱዳን ፈጣን ድጋፍ ሰጪ ኃይሎች ላይ ድል ለመጎናፀፍ መቃረቡን ተናግረዋል። አል-ቡርሃን የተኩስ አቁም ስምምነትን ለመቀበል ቅድመ ሁኔታዎችን ዘርዝረዋል።

የአርኤስኤፍ ኃይሎች ከተያዙ አካባቢዎች ሙሉ በሙሉ ለቀው እንዲወጡ እና በተመረጡ ካንቶን ቦታዎች እንዲሰበሰቡ አሳስበዋል።  ይህም የሰሜን ዳርፉር ዋና ከተማ የሆነችውን ኤል ፋሸር ከበባ ለማንሳት እና የዜጎችን እና የዕርዳታ አቅርቦት ነጻ እንቅስቃሴን ለማረጋገጥ ወሳኝ ነው ብለዋል። "ሱዳን የፈጥኖ ደራሽ ኃይሎች ከገባችባቸው አካባቢዎች በሙሉ መውጣትን የማያካትት ማንኛውንም የተኩስ አቁም ወይም ጦርነት ማቆም አትቀበልም" ሲለ አል-ቡርሃን ተደምጠዋል።

መንገዶችን ለመክፈት እና ሰብአዊ ተደራሽነትን ለማሳለጥ አርኤስኤፍ በተለዩ ቦታዎች መሰብሰብ እንዳለበትም አሳስበዋል። የአል-ቡርሃን አስተያየት የሱዳን መንግስት ግጭቱን በራሱ መንገድ ለመፍታት ያለውን ቁርጠኝነት የሚያጎላ ሲሆን ይህም የአለም አቀፍ ጣልቃ ገብነትን አለመቀበል እና በፈጣን ድጋፍ ሰጪ ኃይሎች ላይ ወታደራዊ ድልን ለማምጣት ትኩረት የሰጠ ነው ተብሎ ታምኖበታል።

በሚሊዮን ሙሴ
#ዳጉ_ጆርናል

በእንግድነት ለበርካታ ቀናት በመቆየቱ ወደ ቤቱ እንዲሄድ የተጠየቀው ግለሰብ በአባወራው ላይ የግድያ ሙከራ በመፈፀሙ በእስራት ተቀጣ

በማዕከላዊ ኢትዮጵያ ክልል በቀቤና ልዩ ወረዳ ከፍተኛው ፍርድ ቤት ጥቅምት 28 ቀን 2017 ዓ.ም በዋለው ችሎት የግድያ ሙከራ የፈጸመው ተከሳሽ ፈይሳ ቢፋ በእስራት መቀጣቱን ያሳያል።

የወንጀሉን ዝርዝር አቃቤ ህግ እንዳስረዳው ተከሳሽ ፈይሳ ቢፋ ሰውን ለመግደል በማሰብ ሚያዚያ 19 ቀን 2016 ዓ.ም በግምት ከሌሊቱ 7 ላይ በቀቤና ልዩ ወረዳ ልዩ ስሙ ጀረትማ ተብሎ በሚጠራው መንደር በግል ተበዳይ በአቶ ኢብራሂም ሀሰን መኖሪያ ቤት ውስጥ ተከሳሹ በእንግድነት ለማደር መግባቱን እና በርካያ ቀናትን በመቆየቱ ምክኒያት በቤቱ ባለቤት እንዲሄድ ቢጠየቅም አልሄድም በማለት ግጭቱ ተጀምሯል።

አልሄድም ከማለት ባለፈ እላፍ ንግግሮችን ተናግሮ አንደነበር የተበዳይ ባለቤት እንደተናገሩ የቀቤና ልዩ ወረዳ የወንጀል ጉዳዩች ከፍተኛ አቃቤ ህግ የሆኑት አቶ በያን ሙሳ በተለይ ለብስራት ሬዲዮ እና ቴሌቪዥን ተናግረዋል። በዕለቱ ተከሳሹ በቤቱ ውስጥ ለተለያዩ አገልግሎቶች የሚውለውን ቢላዋ በማንሳት የግል ተበዳዩን በስለት የቀኝ እጁ ሰዓት ማሰሪያው ላይ አንድ ጊዜ ሲቆርጠው በተጨማሪም የቀኝ እጁ አውራ ጣቱን፣ በቀኝ በኩል መንጋጋውን፣ የቀኝ ጆሮውንና ትከሻውን በቢላዋ በመውጋት ከፍተኛ ደም እንዲፈሰው በማድረግ የቀኝ እጁ ላይ የአጥንት ስብራት ያደረሰበት መሆኑን በክሱ ላይ ገልጿል።

አቃቤ ህግም በ1997 ዓ.ም ተሻሽሎ በወጣው የኤፌድሪ የወንጀል ህግ አንቀጽ 27/1 እና አንቀጽ 539 ስር የተደነገገውን ድንጋጌ ተላልፏል በሚል በከባድ የግድያ ሙከራ ወንጀል ክስፍቅር አቅርቦበታል።የክስ ሂደቱን ሲከታተል የቆየው የቀቤና ልዩ ወረዳ ከፍተኛ ፍ/ቤት የሰውና የሰነድ ማስረጃዎችን መርምሮ ተከሳሽ ፈይሳ ቢፋ በቀለ አቃቤ ህግ የከሰሰውን የከባድ የግድያ ሙከራ ወንጀል ህግ ድንጋጌውን 113 / 2/ መሠረት በማሻሻል ወደ ወንጀል ህግ ቁ  540 ድንጋጌ ወደተራ የግድያ ሙከራ ወንጀል በመቀየር ጥፋተኛ ብሎታል።

ፍርድ ቤቱም ግራ ቀኙን በማየት የቀረቡትን የቅጣት ማክበጃና ማቅለያ ምክንያቶችን በመመዘን ሌላውን ያስተምራል ተከሳሹንም ያርማል በሚል ተከሳሽ ፈይሳ ቢፋን በ5 ዓመት እስራት እንዲቀጣ መወሰኑን የቀቤና ልዩ ወረዳ የወንጀል ጉዳዩች ከፍተኛ አቃቤ ህግ የሆኑት አቶ በያን ሙሳ ጨምረው ለብስራት ሬዲዮ እና ቴሌቪዥን ተናግረዋል።

በሰብል አበበ
#ዳጉ_ጆርናል

በኦሮሚያ ክልል በአንድ ሳምንት ውስጥ በደረሰ የትራፊክ አደጋ የ13 ሰዎች ህይወት አለፈ

በኦሮሚያ ክልል ከህዳር 2 እስከ ህዳር 8 ቀን 2017 ዓ.ም ድረስ ባሉት ቀናቶች በደረሱ የትራፊክ አደጋዎች የ13 ሰዎች ህይወት ሲያልፍ ፣በ17 ሰዎች ላይ ከባድ እና በ10 ሰዎች ላይ ቀላል  የአካል ጉዳት ደርሷል፡፡

በአንድ ሳምንት ውስጥ በደረሰው አደጋ ከ12 ዓመት እስከ 65 ዓመት  የእድሜ ክልል ላይ  የሚገኙ ሰዎች ህይወታቸው ማለፉን የኦሮሚያ ክልል የትራፊክ ቁጥጥር ክፍል ባለሙያ የሆኑት ኢንስፔክተር መሰለ አበራ ለብስራት ሬዲዮና ቴሌቪዥን ተናግረዋል፡፡

በንብረት ላይ የደረሰው ወድመት በገንዘብ ሲተመን ከሦስት መቶ ሺ ብር በላይ የሚገመት ሲሆን የሞት አደጋዎቹ በተለያዩ ዞኖች እና ከተሞች የተከሰቱ ናቸው።

አደጋዎቹ የተከሰቱት በቀኑ እና በለሊቱ ክፍለ ጊዜ ሲሆን  አደጋውን ያደረሱት ወንድ  አሽከርካሪዎች ናቸው። የሞት አደጋዎች የደረሱት በጭነት፣ በህዝብ ማመላለሻ እና በባለ ሦስት እግር (ባጃጅ) ተሸከርካሪ የተከሰቱ መሆናቸው ተገልጿል፡፡

የአደጋዎቹ መንስኤዎቹ ያለመንጃ ፍቃድ ማሽከርከር ፣ከፍጥነት ወሰን በላይ ማሽከርከር፣ለእግረኛ ቅድሚያ አለመስጠት፣ የተሽከርካሪ የቴክኒክ ችግር፣ርቀትን ጠብቆ አለማሽርከር፣ ምልክቶችን አለማክበር ፣የጥንቃቄ ጉድለት መሆኑን  ኢንስፔክተር መሰለ አበራ ለብስራት ሬዲዮና ቴሌቪዥን ተናግረዋል::

በሳምራዊት ስዩም
#ዳጉ_ጆርናል

የእስራኤል ጠቅላይ ሚኒስትር ኔታንያሁ ከጋዛ ለተፈቱ ምርኮኞች የ5 ሚሊየን ዶላር ሽልማት አበረከቱ

የእስራኤል ጠቅላይ ሚንስትር ቤንያሚን ኔታንያሁ እንደተናገሩት ከጋዛ ለተፈቱ ምርኮኞች 5 ሚሊየን ዶላር ሽልማት እንደሚሰጥ እና በሃማስ የተያዙ እስራኤላውያንን ነፃ ለማውጣት በጦርነት ከታመሰው የፍልስጤም ግዛት እንዲወጡ ይደረጋል ሲሉ ተደምጠዋል። ኔታንያሁ ስጦታውን ይፋ ያደረጉት በትላንትናው እለት በጋዛ ባደረጉት አጭር ጉብኝት ላይ ሲሆን የእስራኤል ወታደራዊ ኔትዛሪም ኮሪደር  በእስራኤል ጦር ሰሜናዊ ጋዛን ከደቡብ ክፍል ለመገንጠል የሚያስችል ቁልፍ መንገድ ባሳዩበት ወቅት ነው።

ለእያንዳንድ ታጋቾች 5 ሚሊዮን ዶላር እንሰጣለን ሲሉ ኔታንያሁ በፍልስጤም ግዛት ባደረጉት አጭር ጉብኝት ተናግረዋል። ምርጫው ታጋቾችን ለሚያስለቅቁ በሙሉ ይህ ነው ግን ውጤቱ አንድ አይነት ይሆናል ሁሉንም ታጋቾች እንመልሳቸዋለን ብለዋል። እስራኤል 101 ምርኮኞች በጋዛ እንደሚቀሩ ገምታለች፣ ምንም እንኳን ከቁጥሩ ውስጥ አንድ ሶስተኛው አሁን ላይ እንደሞቱ ይታመናል። የኔታንያሁ የሽልማት ስጦታ በእስራኤል ውስጥ በምርኮኛ ቤተሰቦች እና ደጋፊዎቻቸው ዘንድ ያስቆጣ ሲሆን ጠቅላይ ሚኒስትሩ ከሃማስ ጋር የተኩስ አቁም ስምምነት እንዲደርሱ በመጠየቅ ምርኮኞች እንዲፈቱ ጠይቀዋል።

ኔታንያሁ ሁሉንም ምርኮኞች ለማስፈታት ብቸኛው መንገድ ወታደራዊ አማራጭ እንደሆነ እና እስራኤል በጋዛ ላይ ያካሄደችው ጦርነት አላማው እስኪሳካ ድረስ እንደሚቀጥል ደጋግመው ተናግረዋል።ቀደም ሲል ከሃማስ ጋር የተደረሰውን የእርቅ ስምምነት ለማፍረስ የናታንያሁ መንግስት የቀድሞ ረዳት የነበሩት ሚስጥራዊ መረጃዎችን ለውጭ ሚዲያ በማጋለጥ ተጠርጥረው በቁጥጥር ስር የዋሉት ሲሆን የታሳሪው ቤተሰቦች የኔታንያሁ መንግስት የተኩስ አቁም ስምምነት ላይ ለመድረስ በቂ እርምጃ አልወሰደም ሲሉ ከሰዋል።

በስምኦን ደረጄ
#ዳጉ_ጆርናል

በፈረንሳይ ባለቤቷ እያደነዘዘ ከ80 በላይ በሚሆኑ ወንዶች ለዓመታት ያስደፈራት ግለሰብ በዛሬዉ እለት በፍርድ ቤት የመጨረሻ ቃሏን ሰጠች

ከ10 ሳምንታት በፊት ፈረንሳይን እና መላዉ ዓለምን ያስደነገጠው የጅምላ አስገድዶ መድፈር ድርጊት ወደ መጨረሻው ምዕራፍ ተሸጋግሯል።ሰለባ የሆነችው ጂዜሌ ፔሊኮት ዛሬ ማክሰኞ ቃሏን ሰጥታለች፡፡ጥንዶች ዶሚኒክ እና ጊሴሌ ፔሊኮት አሁን በ70ዎቹ መጀመሪያ ላይ የሚገኙ ጡረተኞች ናቸው።ዶሚኒክ ፔሊኮት በወርሃ መስከረም በደቡባዊ አቪኞን ከተማ ከሌሎች 50 ሰዎች ጋር ለፍርድ ቀርቧል፡፡

በፍርድ ቤቱ ተገኝታ ስለ ጤንነቷ የተናገረችዉ ጊሴሌ በጭንቀት የተነሳ ከህይወቴ 10 አመታትን ተነጥቄያለሁኝ በጭራሽ ወዳጣሁት ዓመታት መመለስ አልችልም ስትል ለፍርድ ቤት ተናግራለች።"አሁን 72 አመቴ ነው እና ምን ያህል ጊዜ እንደቀረኝ አላውቅም" ስትል አክላለች:: በእነዚያ አስጨናቂ ዓመታት ረዥም የእግር ጉዞ በማድረግ ፣ ሙዚቃ በማዳመጥ እና ቸኮሌት በማጣጣም ጥሩ ስሜት እንዲሰማኝ ለማድረግ ሞከርኩ” ትላለች።" ወይ እሞታለሁ አልያም የአእምሮ ሆስፒታል የምገባ መስሎኝ ነበር።"ስትልም አክላለች፡፡

የቀድሞ ዶሚኒክ ፔሊኮት ሚስቱን በተለያዩ ወንዶች እንድትደፈር ሲያደርግ ለአስር አመታት ያህል አደንዛዥ ዕፅ መጠቀሙን አምኗል፡፡ለአምስት አስርት ዓመታት በትዳር አብራው የኖረችው ባለቤቷ ከ80 በላይ የሚሆኑ ወንዶችን በመጋበዝ እንዳስደፈራት እና ድርጊቱን እንደቀረጸው የተረዳችው ከፖሊስ ነው።በመድፈር ወንጀሉ ላይ የተሳተፉት ወንዶች ቁጥር ብዛት ፈረንሳይን አስደንግጧል።በቪዲዮው ላይ ከታዩት 83 ወንዶች መካከል ፖሊስ መለየት የቻለው 50ዎቹን ብቻ ነው።

ዕድሜያቸው ከ26 እስከ 68 ሲሆን፣ በተለያዩ ሙያዎች ውስጥ ያሉ ናቸው። የእሳት አደጋ ሠራተኞች፣ ፋርማሲስቶች፣ ነርስ፣ የእስር ቤት ጠባቂ፣ ጋዜጠኞች ተካተውበታል። በርካቶች የልጆች አባት እና ባለትዳሮች ናቸው።አንደኛው ኤችአይቪ በደሙ እያለ እያወቀ ስድስት ጊዜ እንደደፈራት ፖሊስ ይፋ አድርጓል።ምንም እንኳን ኤችአይቪ ባይተላለፍባትም ሌሎች በወሲብ በሚተላለፉ በሽታዎች ተይዛ እንደነበር የጤና ባለሙያ ምስክርነቱን ሰጥቷል። ከዚህም በተጨማሪ በርካታ የጤና እክሎች እንደተከሱባት ተገልጿል።

በስምኦን ደረጄ
#ዳጉ_ጆርናል