አሜሪካ መግታት በተሳናት የሎስ አንጀለሱ የሰደድ እሳት የሟቾች ቁጥር 24 ደረሰ። በአካባቢው ተጠናክሮ የቀጠለው ከባድ ንፋስ የሰደድ እሳቱን ሊያጠናክረው እንደሚችል መስጋታቸውን የአካባቢው ባለስልጣናት አስታውቀዋል።

የሰደድ እሳቱ ባደረሰው አደጋ እስካሁን ከሞቱት በተጨማሪ በአስራዎቹ የሚቆጠሩ ሰዎች የደረሱበት አልታወቀም ። በአደጋው እስከ 180 ቢሊዮን ዶላር የሚገመት ሀብት እና ንብረት ወደ አመድነት ተቀይሯል ነው የተባለው።

በአሜሪካ ሁለተኛ ትልቋን ከተማ ለአንድ ሳምንት ያህል እያቃጠለ የሚገኘው እሳቱ በሺዎች የሚቆጠሩ ቤቶች እና ህንጻዎችን ወደ አመድነት ቀይረዋል፤ ከ100 ሺ በላይ ሰዎችን ደግሞ ከመኖሪያቸው አፈናቅሏል ።
አሜሪካን እያሳሳበ የመጣው እስካሁን የደረሰው ውድመት እና ጥፋት ሳይሆን ከዚህ በኋላ ከባዱ ነፋስ እሳቱን አስፋፍቶ ከዚህም የከፋ ውድመት እንዳያደርስ ነው።

የሀገሪቱ ብሄራዊ ሜትሮሎጂ ትንበያ እንዳመለከተው ከነገ ማክሰኞ ጥር 6 ጀምሮ በሰዓት 110 ኪ/ሜ የሚገሰግስ ከባድ ንፋስ ሊከሰት ይችላል።

ይህ ደግሞ አሜሪካ በታሪኳ ካየቻቸው ብርቱ የሰደድ እሳት አደጋዎች አስከፊው ነው የተባለለትን የሎስ አንጀለሱ አደጋ ወደ ተቀሩ የከተማዋ ክፍሎች እንዳይዛመት አስግቷል።
አሜሪካ ከዓለማችን ግዙፍ የእሳት መከላከያ ብርጌድ ያላት ሃገር ብትሆንም አሁን የመጣባትን ብርቱ እሳት ለማስቆም ተፈትና ወድቃለች። ከሀገሪቱ ከተለያዩ ግዛቶች የእሳት መከላከያ ብርጌዶች በእሳት ማጥፋቱ ላይ መሰማራኃቸውን ዘገባዎች አመልክተዋል።
በተጨማሪም ጎረቤት ሀገር ሜክሲኮ የእሳት ማጥፊያ እና መከላከያ ቡድን ወደ ስፍራው መላኳ ተሰምቷል።

አሜሪካ ባላት ቴክኖሎጂ እና ግዙፍ የእሳት አደጋ መከላከያ ብርጌዷ እሳቱን ለማስቆም 24 ሰዓት እየሰራች ቢሆንም ተመራጩ ፕሬዚደንት ዶናልድ ትረምፕ የአካባቢውን ከመተቸት እና ከመዝለፍ አልተቆጠቡም።
ትራምፕ የአካባቢውን ባለስልጣናት «ብቃት የላችሁም» ሲሉ ወንጅለዋቸዋል።(DW)