የሽምብራ እሸት እየጠረጠሩ
አብሮ ወፍ ጥበቃ ማማ ላይ ተሰቅሎ
ካፊያውን በገሳ በአንድ ተጠልሎ
እሳት አቀጣጥሎ፣ በቆሎ ጠባብሶ፣
አየሁ አላየሁም፣ ሰማሁ አልሰማሁም …
በላልቶ አፍ አብሶ፣
ለስልሶ አስፈትሎ፣ የናት ኩታ ለብሶ
ላዋቂ ተልኮ ለልጅ ተጎናብሶ…
ደስ ይላል መስከረም!!!
ባንድ አብሮ ለመክረም…
ደስ ይላል መስከረም!!

ለቅኔ ዘረፋው… ጠፈፍ ሲል ፈፋው
የቆሎ ተማሪ..ያ ተመራማሪ፣
የወላዲት አምላክ የድንግል አዝማሪ፣
ያ ደበሎ ለባሽ… በእግዚትነ ማርያም
እባካችሁ ልባሽ፣ እባካችሁ ቁራሽ፡፡
እያለ ሲለምን ከጥንቅሹ ቅንጥሽ ማሩቴ ባይሰጠው..
አይቀር መደንገጡ አራሽ አባ ወራሽ አገር ያሰለጠው..! …የማይለወጠው!!
በዓይኑ እየመዘነ በልቡ የማይመርጠው፡፡
ገሩ ባላገሩ፣ ያ ባለሞፈሩ፣
ያ ባለዘገሩ፣
በሞቴ ነው ቋንቋው፣ ስሞት ነው ነገሩ!! "
ደስ ይላል መስከረም


[ ባለቅኔ ሙሉጌታ ተስፋዬ ]


@Samuelalemuu