በትምህርት ቤቶች አካባቢ አዋኪ ድርጊት ሲፈፅሙ በነበሩ ከ1ሺህ በላይ  የንግድ ድርጅቶች እርምጃ እንደተወሰደባቸው ተገለጸ

የአዲስ አበባ ከተማ ሰላም እና ፀጥታ አስተዳደር ቢሮ በጋራ ለመስራት ትስስር ከፈረሙ ባለድርሻ አካላት ጋር የ6 ወር እቅድ አፈፃፀም ግምገማ አካሂዷል፡፡

በከተማዋ በተለያዩ ትምህርት ቤቶች አካባቢ አዋኪ ድርጊት በፈጸሙ 1ሺህ 984 የንግድ ድርጅቶች ላይ አስተዳደራዊ እርምጃ መወሰዱን የቢሮው ምክትል ኃላፊ አቶ ተስፋዬ ደንድር ተናግረዋል።

በመዲናዋ  ሲከበሩ በነበሩ የአደባባይ ክብረ በዓላት ላይ የመዲናዋን ፀጥታ ሊያደፈርሱ ይችላሉ ተብለው የተጠረጠሩ 27 ሺህ 466 ተጠርጣሪዎች በ6 ወር ውስጥ መያዛቸውን ሃላፊው ገልፀዋል።

የሽብር ተግባር ለሚፈፅሙ አካላት መጠቀሚያ እንዳይውሉ ውሎና አዳራቸውን በጎዳና ላይ ያደረጉ 17ሺህ 563 ዜጎችን ቢሮው ወደማቆያ ማስገባቱንም ተናግረዋል።

በመድረኩ የተገኙት የቢሮው ኃላፊ ወ/ሮ ሊዲያ ግርማ አዲስ አበባን የደህንነት ስጋት የሌለባት ከተማ ለማድረግ እና ከተማዋን የሚመጥን ዘመናዊ የፀጥታ ተቋም ለመፍጠር በተሰሩ ስራዎች በርካታ ውጤቶች መገኘታቸውን ገልፀዋል።

በከተማዋ  ነዋሪ ላይ የሚፈፀሙትን ንጥቂያዎችን ለመከላከል ከአዲስ አበባ ፖሊስ ጋር በመሆን እንደሚሰራና በተለይም በመዲናዋ የሚስተዋለውን የኑሮ ውድነት ለማሻሻል ከባለድርሻ አካላት ጋር በመሆን እንደሚሰራ ተናግረዋል።

በቀጣይም በዲጂታል አሰራር የቁጥጥር ስራ ለማስጀመር ዝግጅቶች እየተጠናቀቁ መሆኑንም የቢሮው ኃላፊ ወ/ሮ ሊዲያ ግርማ ጠቁመዋል።
በመድረኩም በመዲናዋ በአፈጻጸማቸው ከፍተኛ ውጤት ላስመዘገቡ ተቋማት የዋንጫና የምስክር ወረቀት ሽልማት ተበርክቷል።

@zena_ethiopia24
@zena_ethiopia24