የኢፌዲሪ ፕሬዚዳንት ታየ አጽቀ ሥላሴ፣የመቄዶንያ አረጋውያንን ጎበኙ


• ፕሬዚዳንቱ የመቄዶንያ የበላይ ጠባቂ ለመሆን ተስማምተዋል



• ወጣቱ ባለሃብት በ2 ሚ. ብር ወጪ አረጋውያኑን ምሳ አብልቷል


የኢፌዲሪ ፕሬዚዳንት ታየ አጽቀ ሥላሴ፣ በአዲስ አበባ የሚገኘውን መቄዶንያ የአረጋውያንና አዕምሮ ሕሙማን መርጃ ማዕከል በዛሬው ዕለት ጎብኝተዋል።

በድርጅቱ የአረጋውያን ተወካይ በየዓመቱ ታህሳስ 18 በእሳቸው ስም እንዲሰየምና የድርጅቱ የበላይ ጠባቂ እንዲሆኑ የቀረበላቸውን ጥያቄ ተቀብለዋል።

“መቄዶንያ የአረጋውያንና አዕምሮ ሕሙማን መርጃ ማዕከል የሚሰራው በጎ ስራ ነውና፤ ሁሉም በአቅሙ ሊደግፈው ይገባል” ብለዋል፤ ፕሬዚዳንቱ፡፡

በመቄዶንያ እየተሰራ ያለው በጎ ስራ ብርታትን የሚሰጥ ነው ያሉት ፕሬዚዳንቱ፤ ማዕከሉ የበጎ አድራጎት ሥራውን ይበልጥ ተደራሽ እንዲያደርግ ሁሉም በሚችለው መደገፍ አለበት ብለዋል።

ከዚሁ ጋር ተያይዞ የመቄዶንያ የምንጊዜም አጋዡ ወጣቱ ባለጸጋ ምህረትአብ ሙሉጌታ፣ የፕሬዚዳንት ታዬ አፅቀስላሴን ጉብኝት ምክንያት በማድረግ፣ ከ2 ሚሊየን ብር በላይ ወጪ በመመደብ በድርጅቱ ለሚገኙ 8 ሺ የሚደርሱ አረጋውያን የምሳ ወጪያቸውን ሸፍኗል።

የመቄዶንያ መሥራቹ ዶ/ር ቢኒያም በለጠ ባደረገው ንግግር፤ “ወጣት ምረትአብ ሙሉጌታ ለድርጅታችን እያደረገ ያለው ነገር ቀላል የሚባል አይደለም፤ ዛሬም ሙሉ የምሳ ወጪ ስለሸፈነልን ከልብ እናመሠግናለን” ብሏል፡፡