የትግራይ ክልል እስልምና ጉዳዮች ከፍተኛ ምክር ቤት ክስ መሰረተ

የትግራይ ክልል እስልምና ጉዳዮች ከፍተኛ ምክር ቤት፣ በአክሱም ከተማ ትምህርት ቤቶች ሴት ሙስሊም ተማሪዎች ሂጃብ እንዳይለብሱ የከተማዋ ትምህርት ቢሮ የጣለውን እገዳ ለማስነሳት ጉዳዩን ወደ ፍርድ ቤት መውሰዱን ትናንት ምሽት ባወጣው መግለጫ አስታውቋል።

የክልሉ ትምህርት ቢሮ ችግሩን በመፍታት ረገድ ደብዳቤ ከመጻፍ ያለፈ ውጤታማ ሚና አልተጫወተም ያለው ምክር ቤቱ፣ በሂጃብ ምክንያት የ12ኛ ክፍል ሴት ሙስሊም ተማሪዎች ለዩኒቨርሲቲ መግቢያ ፈተና የመቀመጥ ዕድል ተነፍጓቸዋል በማለት ከሷል።

እገዳው የሙስሊም ተማሪዎችን መብት ብቻ ሳይኾን፣ ባጠቃላይ የሴቶችን ሰብዓዊ መብት የጣስ ድርጊት ነው በማለትም ምክር ቤቱ እገዳውን በድጋሚ አውግዞታል። የትምህርት ቢሮው ችግሩን በጥቂት ቀናት ውስጥ ካልፈታ፣ ቀጣይ ሕጋዊ ርምጃዎችን እንደሚወስድ ምክር ቤቱ ባለፈው ሳምንት አስጠንቅቆ ነበር።