እንቆቅልሾችህን ፍታ!

ሩቅ መጓዝ፣ ተዓምር መስራት፣ ድንቅ ማድረግ ከፈለክ ምርጫ በሌለው አማራጭ እንቆቅልሾችህን ፍታ፤ አስጨናቂዎችህን አስወግድ፤ መሰናክሎችህን ተሻገር፤ ከእንቅፋቶችህ ራቅ። ፍረሃት፣ ጭንቀት፣ አሉታዊነት፣ ሰበበኝነትና መጥፎ ልማዶች ዋንኞቹ እንቆቅልሾችህ ናቸው። ፈሪ ተዓምር ሲሰራ ያያል እንጂ ተዓር መስራት አይችልም፤ የሚጨነቅ ሰው ድንቅ ሲደረግ ይመለከታል እንጂ ድንቅ የሚያደርግ ማንነት አይኖረውም፤ ሰበበኛ እንቅፋቶቹን ይቆጥራል እንጂ በረከቶቹን አይመለከትም። በእንቆቅልሾችህ ተከበህ ተዓምረኛ ሳይሆን መደበኛውን ህይወትም ለመምራት ልትቸገር ትችላለህ። ሩቅ መጓዝ የሚፈልግ ሰው የመንገዱ ምቾት ሊያሳስበው ይገባል፤ ትልቅ ህልም ያለው ሰው በማንነቱ ላይ የሰለጠኑ ባህሪያትን ለይቶ ማወቅ ይጠበቅበታል፤ በተዓምረኛነቱ የሚተማመን ሰው መሰናክሎቹን ለማስወገድ ደፋርና ቁርጠኛ መሆን ይኖርበታል።

አዎ! ጀግናዬ..! እንቆቅልሾችህን ፍታ! በውስጥህ የያዝከውን ሸክም ልቀቅ፤ ከሚረብሹህ አስተሳሰቦች ተላቀቅ፤ ወደኋላ ከሚያስቀሩህ እሳቤዎች ነፃ ውጣ። በጨለማ መጓዝ አትችልምና ብረሃንህን ፈልገህ አግኘው፤ ከአሉታዊ ሰዎች ጋር ግብህን አትመታምና ከአዎንታዊዎቹ ጋር ተወዳጅ፤ የሚደግፉህንና የሚያበረታቱህን ምረጥ። መጥፎ ልማዶችህ ሳይቀየሩ ህይወትህን ስለመቀየር ብታስብ ከጭንቀትና መብሰልሰል በቀር የምታተርፈው ነገር የለም። ካንተ ብዙ ከሚጠብቁብህ፣ ዘወትር እጅ እጅህን ከሚያዩ፣ ከሚበዘብዙህ፣ ለእኔ ብቻ እንጂ ላንተን ከማያውቁ ሰዎች ጋር ሆነህ ለእራስህ ልትተርፍ አትችልም።

አዎ! ሩቅ አሳቢ ለትናንሾቹ ተግባሮቹ ትኩረት ይሰጣል፤ ጥቃቅን ክፍተቶቹን በጥንቃቄ ይሞላል፤ ላልተመቸው ጉዳይ በጊዜ መፍትሔ ይሰጣል፤ ከማይረዱትና ከማይደግፉት ሰዎች ለመነጠል ጊዜ አያጠፋም። ለእራስህ መሆን ካልቻልክ እንዲሁ እንደ ሸንኮራ ታኝከህ ትተፋለህ፤ እራስህን ካላስከበርክ መሳቂያ መሳለቂያ ትሆናለህ፤ ለህልምህ ዘብ ካልቆምክ በተራነትህ መዘባበቻና መሳለቂያ ትደረጋለህ። ልዩ ሃሳብ እንዳለው፣ ባለትልቅ ህልም ባለቤት እንደሆነ፣ ከፊቱ ትልቅ ስኬት እንደሚጠብቀው፣ ለራዕይው ከማንም በላይ እንደሚያስፈልገው ሰው ኑር። ቁጥብነትህ ሳቅ ጫወታን ጠልተህ አይደለም፤ ጥንቃቄህ አደጋዎችህ በዝተው አይደለም፤ ህልምን የመኖርን መንገድ ቀላልና የተደላደለ ለማድረግ በማሰብ ነው። እንቆቅልሾችህን ፍታ፤ በፍጥነት ወደ መዳረሻህ ተጓዝ።