LACHUU NA MARARU!

Akka aannaniif silgaa
Akka ilkaaniif irgaa
Tokkee uumaan lakkuu
Qaroo bitaaf mirgaa,

Agartuukee filtee
Tokko jaamsitaaree?
Guca ifa keetii
Qixxee dhaamsitaaree?

Ani.....
Sagal itti yaadee
Ol qabee gad-qabeen
Lachuu tokko taanaan
Filachuu dadhabeen

“Rabboo cimdiin uumee
Nuuf godhee wal-qixa,
Namni madaalchisee
Maalumaaf wal-fixaa?

Ballaanoo diida laalee
Akka lamaan hubatuu
Rabbiin caala beekamoo
Maaf kan namni gubatu?

Miilli tokko deemee
Gama naaf hin ga'uu,
An-tokko of jaamsinaan~kan hafe balleessuuf
Ormi naaf hin na’uu,
Lachuu qaama kooti
Miidhuun naaf hin ta’uu..

Agartuuwwan kooti
Lachuu na mararu,
Filee tokko miidhee
Nafa koo'n dararu.

Laambaa jireenyakoo
Egeree naaf ibsuu
Wal faanan banadha
Balaq godhee libsuu”
Jedheen murteeffadhe
Qaroowwankoo tiksuu!

✍️ Riyaad Raayyaa