ማኅበረ ቅዱሳን ( Mahibere Kidusan)

የቃሊቲ መካነ ብርሃን ቅዱስ ገብርኤል ቤተ ክርስቲያን የስብከተ ወንጌል ክፍልና የልማት ኮሚቴ  ሊቀ መንበር አባ ኃይለ ሚካኤል ወልደ ጻድቅ እንደተናገሩት “ሕንጻ ከመገንባት ይልቅ አስቀድሞ ሕንጻ ሥላሴን (የሰው ልጆችን) ማስተማርና ማነጽ እጅግ መልካም ነው” ያሉ ሲሆን በዚህም በጠረፋማው አካባቢ ምእመናንን የክርስቶስ ልጅነትን እንዲያገኙ ለማድረግ  በየአድባራቱ ደቀ መዛሙርትን ማምጣትና ማሠልጠን ወንጌልን ማስፋፋት እንዲቻል ያደርጋል በማለት ገልጸዋል።

ሠልጣኞች በቋንቋቸው የአከባቢያቸውን  ምእመናን ለማገልገል፣ ለማጽናትና አዳዲስ አማኒያንን ለማስጠመቅ የሚረዳቸውን ሥልጠና እየወሰዱ በመገኘታቸው ደስተኛ መሆናቸውን ገልጸው ይህን ሥልጠና ላዘጋጁ ማኅበረ ቅዱሳንን እና ባለድርሻ አካላትን አመስግነዋል።
አክለውም አካባቢያቸውን በጽናትና በትጋት እንደሚያገለግሉ ተተኪ መምህራኑ ቃል ገብተዋል።

ሥልጠናው በጥሩ ሁኔታ እየተሠጠና ወደ መጠናቀቁ እንደ ደረሰ የገለጹት የቃሊቲ ቅዱስ ገብርኤል ቤተ ክርስቲያን ሐመረ ሕይወት ሰንበት ት/ቤት ሰብሳቢ ኢንጂነር መላኩ ቀፀላ   ተተኪ መምህራንን ማፍራት በጠረፋማ አካባቢ የሚገኙ ምእመናንን ለማስተማር፣ ያመኑትን ለማጽናትና አዳዲስ አማንያንን ወደ ቤ/ክ ኅብረት ለመጨመር የሚጠቅም መሆኑን  ጨምረው ተናግረዋል።

ሥልጠናውን ከሚሰጡት መምህር መካከል መምህር አምባቸው ጸጋዬ እንዳሉት በጠረፋማው አካባቢ ቃለ እግዚአብሔርን ለምእመኑ ለማድረስ፣ የተዘጉ አብያተ ቤተ ክርስቲያንን ለማስከፈት፣ የስብከት ኬላዎችን ለመመስረት  ሰባኪያነ ወንጌልን አምጥቶ ማሠልጠን ወሳኝ ሚና ያለው በመሆኑ ሁላችንም የድርሻችንን ልንወጣ ይገባል በማለት ገልጸዋል።

21 ደቀ መዛሙርት በቃሊቲ አንቀጸ ብርሃን ቅድስት ማርያም ካቴደራልና 30 ደቀ መዛሙርት በቃሊቲ መካነ ብርሃን ቅዱስ ገብርኤል ቤተ ክርስትያን እየሠለጠኑ የሚገኙ ሲሆን መጪው እሁድ ማለትም መጋቢት 28 እንደሚመረቁ ተጠቁሟል።

በተጨማሪም ስለ አገልግሎቱ ሐሳብ አስተያየት ካላቸው ማንሳት እንደሚችሉ ም/ኃላፊው ገልጸው አገልግሎቱን በስፋት ለማስቀጠል አስፈላጊ የሆኑ ነገሮች ስለሚስፈልጉ ድጋፍ ማድረግ ለሚፈልጉ ምእመናን ጥሪ አቅርበዋል።