ወላድ እናት አሳፍሮ ወደ አዲስ አባባ ሲጓዝ የነበረ አምቡላንስ ከሌላ ተሽከርካሪ ጋር ተጋጭቶ የሶስት ሰዎች ህይወት አለፈ

በኦሮሚያ ክልል ሰሜን ሸዋ ዞን ውጫሌ ወረዳ ዱበር  ድልድይ ተብሎ በሚጠራው ስፍራ በደረሰ የትራፊክ አደጋ የሦስት ሰዎች ህይውት ማለፉ ተገልጿል።

የውጫሌ ወረዳ ፖሊስ ፅ/ቤት አዛዥ ረዳት  ኢንስፔክተር ብርሃኑ ኢንጅቡ ለብስራት ሬዲዮ እና ቴሌቪዥን  እንደገለፁት ሰኞ ታህሳስ 14 ማለዳ 2:30 ላይ ለከፍተኛ ህክምና ወላድ አሳፍሮ ወደ አዲስ አበባ ሲጓጓዝ የነበረ አምቡላንስ ተሽከርካሪ ከኋላ የነበረ አሽከርካሪ ገጭቶት ከመንገድ በማስወጣት 15 ሜትር ድልድይ ውስጥ በመክተቱ የአምቡላንስ አሽከርካሪውን  ጨምሮ የሶት ሰዎች ህይወት ማለፉን ተናግረዋል ።

የውጫሌ ከተማ ሆስፒታል ተሽከርካሪ ለከፍተኛ ህክምና ሪፈር የተባለች ወላድ እናት እና ሁለት አስታማሚዎችን ጭኖ ሲጓዝ በውጫሌ ወረዳ ዱበር  ድልድይ ሲደርስ ከጎጃም ወደ አዲስ አበባ ሲጓዝ የነበረ ኤፍ ኤስ አር የሆነ ጭነት ተሽከርካሪ ከኋላ ገጭቶት ወላዷን ጨምሮ የሦስት ሰዎች ህይወት ማለፉ ተገልጿል።

ከአደጋው የተፈው አንድ ግለሰብ በህክምና ላይ የሚገኝ ሲሆን አድጋውን ያደረሰው አሽከርካሪ በቁጥጥር ስር ውሎ ምርመራ ሲደረግበት ፍሬን እንቢ ብሎኝ ነው በማለት ቃሉን ለፖሊስ መስጠቱ የውጫሌ ወረዳ ፖሊስ ፅ/ቤት አዛዥ ረዳት ኢንስፔክተር ብርሃኑ ኢንጅቡ ጨምረው ለብስራት ሬዲዮ እና ቴሌቪዥን ተናግረዋል።

በሳምራዊት ስዩም