የዲያቆን አቤንኤዘር ተክሉ ገጽ

ወደ አዲስ ኪዳናዊ የመመለስ ተሐድሶ ያስፈልገናል!

ከዚህ ቀደም የጻፍኹትን ልጥቀስ፣

“ተሐድሶ፣ “ሐደሰ” ከሚለው የግዕዝ ቃል የወጣ ሲኾን፣ ትርጕሙ “አዲስ አደረገ” የሚለውን ትርጕም ታሳቢ ያደርጋል። በተገብሮ (Passive) “ተሐድሰ” ከሚለው ቃል ደግሞ፣ “ተሐድሶ” የወጣ ሲኾን፣ ትርጕሙ “አዲስ ኾነ” ማለት ነው። ስለዚህም ስያሜው ድርጊትን እንጂ ተቋማዊነትን ወይም አደረጃጀትን ፈጽሞ አያመለክትም።” [1]

ወደ ርዕሳችን ስንመለስ፣ ወደ አዲስ ኪዳናዊ የመመለስ ተሐድሶ ማለት፣ በጌታችንና በቅዱሳን ሐዋርያት ወደ ተሰጡት ትምህርቶች፣ ወደ ተኖሩ ልምምዶችና ትውፊቶች በመመለስና ብሎም አሠረ ፍኖታቸውን በመከተል እውነተኛ የሕይወትና የኑሮ ተሐድሶ ማምጣት የሚል ፅንሰ ዐሳብ በውስጡ የያዘ ነው። ይህ የሚኾንበት ዋነኛ ምክንያቱ፣ ቤተ ክርስቲያን በተለያዩ ዘመናት፤ በተለያዩ ታሪኮችና በተለያዩ ኹኔታዎች ውስጥ በማለፍዋ ምክንያት፣ ለተለያዩ እንግዳ ትምህርቶችና ልምምዶች ልትጋለጥ ትችላለች ወይም ተጋልጣ ታይታለች።
በአዲስ ኪዳን ምንባባት ውስጥ ጌታችን ኢየሱስ፣

“ከፈሪሳውያንና ከሰዱቃውያን እርሾ ተጠንቀቁና ተጠበቁ” (ማቴ. 16፥6)፣ “ምን ወይም እንዴት እንድትሰሙ ተጠበቁ።” (ማር. 4፥24፤ ሉቃ. 8፥18)

እንዲሁም ቅዱስ ጳውሎስ፣

“በገዛ ደሙ የዋጃትን የእግዚአብሔርን ቤተ ክርስቲያን ትጠብቁአት ዘንድ መንፈስ ቅዱስ እናንተን ጳጳሳት አድርጎ ለሾመባት ለመንጋው ሁሉና ለራሳችሁ ተጠንቀቁ። ከሄድሁ በኋላ ለመንጋው የማይራሩ ጨካኞች ተኩላዎች እንዲገቡባችሁ፥ ደቀ መዛሙርትንም ወደ ኋላቸው ይስቡ ዘንድ ጠማማ ነገርን የሚናገሩ ሰዎች በመካከላችሁ እንዲነሡ እኔ አውቃለሁ።” (ሐ.ሥ. 20፥28-30)

ብለው ሲናገሩ፣ ቤተ ክርስቲያን ባለመጠንቀቅዋ ምክንያት ለተለያዩ እንግዳና ልዩ ልዩ ትምህርቶች ልትጋለጥ እንደምትችል አመልካች ናቸው።

ለዚህም ነው ለተለያዩ እንግዳና ልዩ ልዩ ትምህርቶች ከተጋለጡት አብያተ ክርስቲያናት መካከል ገላትያን እንዲህ በማለት ቅዱስ ጳውሎስ የሚናገረው፤

“በክርስቶስ ጸጋ የጠራችሁን እርሱን ትታችሁ፣ ወደ ተለየ ወንጌል እንዲህ ፈጥናችሁ መዞራችሁ ደንቆኛል፤ እንደ እውነቱ ከሆነ ሌላ ወንጌል የለም። የሚያደነጋግሯችሁና የክርስቶስን ወንጌል ለማጣመም ጥረት የሚያደርጉ አንዳንድ ሰዎች አሉ።” (ገላ. 1፥6-7 ዐመት)።
በዚህ ክፍል ላይ የገላትያ ቤተ ክርስቲያን እንዲህ ባለ ውድቀት ውስጥ መግባትዋን እናስተውላለን። ብዙዎች እንዲህ ስንናገር፣ “ቤተ ክርስቲያን አትሳሳትም፤ ሰዎች እንጂ” የሚል አቋም ያንጸባርቃሉ። ይህን በሌላ ርዕስ እመለስበታለሁ።

ወደ አዲስ ኪዳናዊ የመመለስ ተሐድሶ፣ እውነት ኾኖ በብዙዎች ልብ ያለ ቢኾንም፣ ነገር ግን ለመቀበልና ለመተግበር ብዙዎች ፈቃደኞች የኾኑ አይመስሉም። እንዲያውም፣ ተሐድሶ ሲባል በብዙዎች ልብ ያለው፣ “ኦርቶዶክስን ወደ ወንጌላውያን የመውሰድ ወይም ፕሮቴስታንት የማድረግ ዝንባሌ” እንደ ኾነ ተደርጐ ሲወሰድ ይስተዋላል፤ በርግጥ ይህ ስህተት አልተፈጸመም ማለት አይቻልም። ነገር ግን እውነተኛውና ወደ አዲስ ኪዳናዊ ወይም ወደ ቅዱሳት መጻሕፍት የመመለስ ተሐድሶ፣ ተቋም የመለወጥ አልያም ስፍራ የማቀያየር ተግባር ነው ማለት አንደፍርም።

የዛሬዋ ቤተ ክርስቲያን፣ ባለፉት ኹለት ሺህ አመታት አልፋ በመጣችባቸው ልዩ ልዩ ጎዳናዎች፣ ወድቃም፤ ተሳስታም አሳስታም ኖራ፣ ነገር ግን በጌታ ምሕረትና ጥበቃ፤ በትድግናውና በሉዓላዊ መግቦቱ ግን እስከ አኹን አለች። ስለዚህ ባለፉት ዘመናት በውስጧ የገቡና የሰረጉ፤ በዘመን ርዝመት እውነት የመሰሉ አያሌ ስህተቶችና እንከኖችን አስወግዳ፣ ስትመሠረት በነበረችውና ለመሲሑ ቃልና ሕይወት፤ ትምህርትና ልምምድ በመገዛት በቄሣርና በአላውያን ነገሥታት ፊት ተፈርታና ታፍራ እንደ ነበረችው ቤተ ክርስቲያን ትኾን ዘንድ መመለስ ያስፈልጋታል ብለን እናምናለን። ስለዚህም ደፍረን በዛሬዋ ቤተ ክርስቲያን ውስጥ የክርስቶስ የኾነው ኹሉ ይንጸባረቅ ዘንድ እንመለስ እንላለን!

በአጭር ቃል፣ የክርስቶስ ሕይወት ሕይወታችን፤ ኑሮው ኑሮአችን፤ ትምህርቱ ትምህርታችን፤ ልምምዱ ልምምዳችን፤ ሥራው ሥራችን ኾኖልን፤ ቅዱሳት መጻሕፍት እንደሚሉን በመመለስና ርሱን በመከተል ሕይወት በመኖር የመንፈሳዊ እውነተኛ የሕይወት ተሐድሶ እናመጣ ዘንድ ወደ አዲስ ኪዳናዊ የመመለስ ተሐድሶን በእውነት እንድርግ እንላለን!
[1] http://abenezerteklu.blogspot.com/2021/09/blog-post_29.html

My blog link - http://abenezerteklu.blogspot.com/2025/01/blog-post_31.html

ተቃርኖ!

በእውነት ለመናገር በዚህ "ሰባኪ" ንግግር ውስጥ በግልጥ አምልኮተ ማርያም አለ። ወደ ማርያም መጸለይና ወደርስዋ ልመና ማቅረብ "አምላክ ናት" ብሎ የማመን ያህል ከባድ ጥፋት ነው።

እኛስ እንደ ቅዱስ ቃሉ፣

“... ሙታንን በሚያነሣ በእግዚአብሔር እንጂ በራሳችን እንዳንታመን፥ ...”(2ቆሮ. 1፥9) ደግሞም፦ “... በሰው የሚታመን ሥጋ ለባሹንም ክንዱ የሚያደርግ ልቡም ከእግዚአብሔር የሚመለስ ሰው ርጉም ነው።”(ኤር. 17፥5) ይላልና፣ ፈጽሞ ወደ ፍጡር አንጸልይም። ምናልባት አንዳንዶች ድንግል ማርያምን መለመን እንዴት ያስረግማል? ቢሉ፣ ማርያም ቅድስትና ብጽዕት ብትኾንም፣ ነገር ግን እንደነ ቅዱስ ጳውሎስ የሞተች ደግሞም እንደ ኹሉም አማኞች የሙታንን ትንሣኤ ተስፋ እንደምታደርግ መዘንጋት አይገባም።

ጸሎትን ወደሚሰማውና ወደሚመልሰው ጌታ እግዚአብሔር ብቻ ጸልዩ፤ ከዚህ ውጭ ግን ወደ ሞቱ ቅዱሳን መጸለይ ከመጽሐፍ ቅዱስ ተቃራኒ የኾነ እንግዳ ልምምድ ነው።

የቴሌግራም አድራሻ - https://t.me/ebenezertek

የዩቲዩብ አድራሻ - https://youtube.com/shorts/IwYHr-9KgpQ?si=PEt8kJjuh7dtt5-V

የመንፈስ ቅዱስ ጥምቀት
 
መግቢያ
በመጽሐፍ ቅዱስ ዋና ዋና ከሚባሉት ትምህርቶችና አማኞች ሊጠመቁት ከሚገባው ጥምቀት አንዱ፣ የመንፈስ ቅዱስ ጥምቀት ነው። የብዙዎች ትኵረትና መሻት ያለው የውኃ ጥምቀትና በየዓመቱ ከጥምቀት በዓል ጋር ተያይዞ የሚከበረውን የከተራ በዓልን እንጂ ስለ መንፈስ ቅዱስ ጥምቀት እምብዛም ግንዛቤው ያላቸው አይመስልም። ነገር ግን አስገዳጅ ከኾኑ መንፈሳዊ እውነቶች አንዱ የመንፈስ ቅዱስ ጥምቀት ነው፤ በመንፈስ ቅዱስ ያልተጠመቀ እርሱ እውነተኛ አማኝ ወይም መንፈሳዊ አይደለም።



በመንፈስ ቅዱስ የሚያጠምቅ ማን ነው?

ቅዱሳት ወንጌላት፣ “እኔ በውኃ አጠመቅኋችሁ እርሱ[ክርስቶስ] ግን በመንፈስ ቅዱስ ያጠምቃችኋል እያለ ይሰብክ ነበር።” (ማቴ. 3፥11፤ ማር. 1፥8፤ ሉቃ. 3፥16፤ ዮሐ. 1፥33) በማለት የመንፈስ ቅዱስን ጥምቀት የሚያጠምቀው ክርስቶስ እንደ ኾነ ይመሰክራሉ።

ይህም ጥምቀት በበዓለ ኀምሳ ዕለት በቤተ ክርስቲያን ላይ ተፈጸመ፤ (ሐ.ሥ. 1፥5፤ 2፥1-4)። አማኞችም መንፈስ ቅዱሳዊ ጥምቀትን በክርስቶስ ሥራ የክርስቶስ አካል ከኾነችው ከቤተ ክርስቲያን ጋር አንድ በመኾናቸው በቤተ ክርስቲያን የወረደውን መንፈስ ቅዱስን ይካፈላሉ፤ (1ቆሮ. 12፥13፤ ቲቶ 3፥3-5)።

የመንፈስ ቅዱስ ጥምቀትን እነማን ይጠመቃሉ?

የመንፈስ ቅዱስን ጥምቀት የሚጠመቁት፣ በክርስቶስ ኢየሱስ የሚያምኑና በክርስቶስ ኢየሱስ በማመን ዳግመኛ የተወለዱት ናቸው። ጌታችን ኢየሱስ ክርስቶስ ወደ ሰማያት ከማረጉ በፊትና ወደ ምድር ዳርቻ በመሄድ ወንጌልን ከመመስከራቸው በፊት ደቀ መዛሙርቱን እንዲህ አላቸው፣ “ዮሐንስ በውኃ አጥምቆ ነበርና፥ እናንተ ግን ከጥቂት ቀን በኋላ በመንፈስ ቅዱስ ትጠመቃላችሁ አለ።” (ሉቃ. 24፥49፤ ሐ.ሥ. 1፥5)። ስለዚህም በክርስቶስ በስሙ የሚያምኑ ኹሉ የመንፈስ ቅዱስ ጥምቀትን ይጠመቃሉ።
እንዲሁም ኀጢአትን ፈጽመው የሚጠየፉ፣ መንፈስ ቅዱስን በብዙ የሚናፍቁና የሚራቡ መንፈስ ቅዱስን ይመላሉ፤ መንፈስ ቅዱስን መራባችንን የምንገልጠው፣ እጅግ በጸሎት በመትጋት፣ በማምለክ፣ ቃሉን በመመስከርና በማወጅ ከቶውን ያላቋረጥን እንደ ኾን ነው።

መቼ ይፈጸማል?

በደቀ መዛሙርቱ ሕይወት የመንፈስ ቅዱስ ጥምቀት የሚከናወነው፣ ጌታችን ወደ ሰማያት ካረገ ከጥቂት ቀናት በኋላ እንደ ኾነ ተናግሮአል (ሐ.ሥ. 1፥5)። አስቀድሞ ደቀ መዛሙርት መንፈስ ቅዱስን ተቀብለው ነበር (ዮሐ. 20፥22)፤ መንፈስ ቅዱስን ከተቀበሉ በኋላ እንደ ገና የመንፈስ ቅዱስን ኀይል ሊለብሱ እንደሚገባቸውም ነገራቸው። ቆርነሌዎስም፣ ካመነና ዳግም ከተወለደ በኋላ ልክ እንደ ደቀ መዛሙርት በመንፈስ ቅዱስ ተጠመቀ (ሐ.ሥ. 11፥16-17)።

በመንፈስ ቅዱስ መጠመቅ

ለመኾኑ ግን “በመንፈስ ቅዱስ መጠመቅ ማለት ምን ማለት ነው?” ብለን ብንጠይቅ፣ መጽሐፍ ቅዱስ በመንፈስ ቅዱስ መጠመቅ ማለት በመንፈስ ቅዱስ መሞላት እንደ ኾነ ይነግረናል፤ ስለዚህም ደቀ መዛሙርትና ሌሎችም ከጌታችን ኢየሱስ ዕርገት በኋላ በመንፈስ ቅዱስ ተጠመቁ ወይም በግልጥ በመንፈስ ቅዱስ ተሞሉ። እንኪያስ ሰዎች በመንፈስ ቅዱስ ሲጠመቁ ወይም ሲሞሉ ምን ያደርጋሉ? ብለን በድጋሚ ብንጠይቅ፣መጽሐፍ ቅዱስ እኒህን እውነቶች ይነግረናል፣ 
1.   ሰዎች መንፈስ ቅዱስን ሲሞሉ በኀይልና በድፍረት የመዳንና የትንሣኤውን ወንጌል ይመሰክራሉ፤ “በሁሉም መንፈስ ቅዱስ ሞላባቸው፥ የእግዚአብሔርንም ቃል በግልጥ ተናገሩ።” (ሐ.ሥ. 4፥31) እንዲል፣ በተጨማሪም (ሐ.ሥ. 4፥8፤ 9፥17-20 ይመልከቱ)። መንፈስ ቅዱስ ቅዱስን ያልተሞላ ሰው የመዳንን ወንጌል በድፍረት ይናገር ዘንድ አይችልም።
2.   አማኞች መንፈስ ቅዱስን ሲሞሉ ልሳንን ይናገራሉ፤(ሐ.ሥ. 2፥4፤)። ልሳን በሌላ ቋንቋ መናገር ነው፤ ይህም ቤተ ክርስቲያንን ለማነጽና አማኙን ለማነጽ ወይም ከእግዚአብሔር ጋር ሊነጋገር ይሰጣል። ቤተ ክርስቲያንን ለማነጽ ሲሰጥ ሁከትና ነውጥን መፍጠር አይገባም፤ እግዚአብሔር የሰላም አምላክ ነውና ኹሉ በሥርዓት ሊኾን ይገባል።
3.   መንፈስ ቅዱስን የተሞላ ሰው ኀጢአትንና ኀጢአተኝነትን ፈጽሞ ይጠየፋል። በተለይም መንፈስ ቅዱስን ከሚያሳዝንና ከፈቃዱ ተቃራኒ ከኾነ ከማናቸውም ኀጢአታዊ ተግባር ይርቃል። እግዚአብሔር በመጨረሻ በክፋትና በርኩሰት ላይ የሚፈርደውን ፍርድ በትክክል ከማወቁም በዘለለ የእግዚአብሔርን ጽድቅ አብዝቶ ይሻል፣
4.   ክርስቶስን እጅግ በሚያከብር ሕይወት ይመላለሳል፤ (ዮሐ. 16፥13፤ ሐ.ሥ. 4፥33)። ክርስቶስን በሚያከብር ሕይወት ለመመላለስ ግለ ብቃት አያስመካም፤ ሰው በግለ ብቃቱ እግዚአብሔርን ማርካትና ማስደሰት አይችልምና፣ ነገር ግን መንፈስ ቅዱስን ሲመላ ክርስቶስን ፍጹም በሚያስከብር ሕይወት ይመላለሳል። እንዲሁም አንድ አማኝ መንፈስ ቅዱስ ሲመላ አያሌ ስጦታዎች በሕይወቱ ይፈስሳሉ።

ማጠቃለያ

የመንፈስ ቅዱስ ጥምቀት፣ መንፈስ ቅዱስ እኛን ክርስቶስ ራስ ወደ ኾነበት አካሉ የሚከትትበት እጅግ አስደናቂ ሥራ ነው። አንድ አማኝ ወደዚህ አካል ሲገባ፣ ኹለንተናው ፍጹም በኾነ መንገድ መሠራትና መዋብ፤ መቀደስ ይጀምራል። ከመንፈስ ቅዱስ ጋር በማያቋርጥ ግንኙነትና ዕለት ዕለት በሚታደስ ሕይወትም ይመላለሳል፤ እግዚአብሔር መንፈስ ቅዱስ እንዲህ ያለውን ሕይወት ያብዛልን፤ አሜን።
 
የብሎግ አድራሻ - https://abenezerteklu.blogspot.com/2021/01/blog-post_18.html?m=1