ኢትዮ ቴሌኮም ከአማራ ብሔራዊ ክልላዊ መንግሥት ጠቅላይ ፍርድ ቤት ጋር የስማርት ኮርት ፕሮጀክት ስምምነት በባህር ዳር ከተማ ፈጸመ፡፡

ኩባንያችን በዛሬው ዕለት ከአማራ ብሔራዊ ክልላዊ መንግሥት ጠቅላይ ፍርድ ቤት ጋር በክልሉ የሚገኙ ፍርድ ቤቶችን አሰራር በዲጂታል ለማዘመን የሚያስችል ስማርት ኮርት ፕሮጀክት ተግባራዊ ለማድረግ የሚያስችል ስምምነት በባህር ዳር ከተማ ፈጸመ፡፡

ስምምነቱ ዘመናዊ የኔትወርክ መሰረተ ልማት፣ የክላውድ አገልግሎት፣ ሞጁላር የመረጃ ማዕከል፣ የኔትዎርክ ኦፕሬሽን መቆጣጠሪያና የዲጂታል ቴክኖሎጂዎችን በመገንባት የክልሉን ፍርድ ቤቶች በአስተማማኝ ኔትወርክ ያስተሳስራል፡፡

የስማርት ኮርት ፕሮጀክቱ ፍርድ ቤቶች ደህንነቱ በተጠበቀ ሁኔታ መረጃዎችን በዲጂታል እንዲለዋወጡ ከማገዝ ባሻገር ደረጃውን የጠበቀ የዳኝነት አገልግሎት ለመስጠት ያስችላል፡፡

ተገልጋዮች በአካል ወይም በኢ-ኮርት ካሉበት ሆነው በቀላሉ ፈጣን እና ቀልጣፋ የዳኝነት አገልግሎት እንዲያገኙ በማስቻል ከእንግልትና የጊዜ ብክነት በማዳን ኢኮኖሚያዊ ፋይዳ ከማበርከት ባሻገር የዕለት ተዕለት ህይወታቸውን ቀሊል ያደርጋል፡፡

በዕለቱ ዋና ሥራ አስፈጻሚያችን ፍሬሕይወት ታምሩ ከአማራ ብሔራዊ ክልላዊ መንግስት ጠቅላይ ፍርድ ቤት ፕሬዝዳንት አለምአንተ አግደው ጋር እድሳት እየተደረገለት የሚገኘውን የጠቅላይ ፍርድ ቤት ህንጻ ጎብኝተዋል፡፡

ህንጻው የስማርት ኮርት ፕሮጀክት መሰረተ ልማት ዝርጋታ ለማከናወን ምቹ ከመደረጉ ባሻገር ለተገልጋዮች ሁሉን አቀፍ እና ዘመናዊ አገልግሎት ለመስጠት የሚያስችል ከባቢ መፈጠሩን ለመረዳት ተችሏል፡፡

ኩባንያችን በክልሎች የተቋማትን አሰራር በዲጂታል በማዘመን በሀገራችን አካታች የዲጂታል ኢኮኖሚ ለመገንባት የበኩሉን ቁልፍ ሚና መጫወቱን ይቀጥላል፡፡

#Ethiotelecom #telebirr