Isa qabnu irratti haa xiyyeeffannu!

Bara duriiti jedhama. Namicha ogeessa, akkanuma waa beekuu danda'u tokkotu muka jala taa'ee kadhata godhata ture. Yeroo kadhannaaf ol jedhu kana, mukicha irraa imimmaan fuula isaatti gad cophuu eegale. Kadhannaa isaa xumuratee yommuu ol ilaalu, quuroo tokko mukicharratti arga. Quuroon kun akka malee boo'aa jira. Imimmaan fuulasaatti cophaa ture edaa quuroo kana irraati.

Yeroo kana argu namichi, "Yaa Quuroo nanaa, maal taatee boossa? Maaltu si mudate?" Jedhee gaafatan. Quurichis; "Gammachuu dhabeen jira. Namni na argu hunduu na ajjeessuuf dhagaa natti darbata. Yeroo damee mukaa irra taa'us, namni na argemoo na hin argine jedheen dhiphadha. Maaliif akka akkas namni na jibbu hin beeku. Kanatus gammachuu na dhorkata. Jireenyis na jibbisiisee jira" jedha, mataa buusee.

Yeroo kana namichi ogeessi waa beekuufi waan inni jedhu raawwachuu danda'u sun akkana jedhaan; "Ani ogeessadha. Waan barbaadde siif gochuu nan danda'a, waan garaakee natti himadhu." Quurichis, "Gooftakoo, yoo eeyyamakee ta'e gara daakkiyyeetti na jijjiiri" jechuun itti himata. "Akkuma ati jette gara daakkiyyeetti sin jijjiira. Garuu sanaan dura, daakkiyyee bira deemtee hammam gammadduu akka isheen taate adda baafatta" jedhaanii namichi.

Quuroon kunis, barbaachaaf balali'ee qajeele. Barbaacha yeroo dheeraan boodas, daakkiyyee sana argate. Itti dhiyaatee akkana jedheenii; "Ati baay'ee miidhagduudha. Miidhaginakeen cinatti namoonni baay'ee si jaallatu. Umama baallee qaban keessaa kan akkakee gammadoon tasumaa hin jirani."

Yeroo kana dhageessu daakkiyyeen; "Mee na dhiisi! Maal kootu bareeda amma. Halluu lafa guute keessaa adiin na uume uumaan! Koochoo ittiin balali'uu hin dandeenyes naaf kennee, naachi yoom na nyaata jedhee osoon yaadda'uu gammachuu isa kami kan ati odeessitu? Simbirroota keessaa kan hunduma caalaa gammaddu yoo barbaadde gara Piikookii deemi. Isheen halluu garagaraan kan faayamteefi baay'ee kan hawwattudha. Paarkii keessatti arachuus dandeessa." Daakkiyyeetu jedhaanii.

Akkuma daakkiyyeen akkana jetteen  piikookii barbaachaaf gara paarkiitti balali'ee qajeele, quuroon sun. Achis gahee gara piikookiitti dhiyaachuun, "Piikook yaa ishee halluu gosa garagaraan faayamtee uumamte nanaa, ati uumama addaa ilmaan namaan jaallatamtedha. Carraa qabeettiidhas! Simbirroota keessaa kan akkakee gammachuu qabus waan jiru hin se'u!" Jedha.

Piikookiin kunis akkanaan deebii deebifti; "Namaan jaalatamuunkoo maal naaf godhee? Umuriikoo guutuu paarkii keessatti natti cufamee akkan hidhamaa ta'u na godhe malee! Faaya meeshaalee garagaraafis akkamitti akka barbaadan osoo beektee al takkaafuu nan hawwitu ture. Ani garuu hawwiinkoo, aluma takkaa osoon akkakee kana ta'ee balal'eema du'ee nan du'en jedhaa amma!"

Quurichis waan dhagahe kana ajaa'ibsiifachuun balal'uun qilleensarra asiif achi deddeebi'uu eegale.


•~~> Yeroo baay'ee xiyyeeffannoo keenya waan qabnurra osoo hin taane, waan hin qabneefi kan keenya hin taanerra godhanna. Haala kanaan gammachuu keenya gaaffii jala galchina. Gammachuun dhugaan garuu waan qabnu irratti xiyyeeffachuun dhufa. Akkasiin dorgommii yookaan birqabni hin barbaachifne jireenya keessaa bakka dhaba. Waan qabaniif bakka kennuu keessa waan dhaban argachuuf of qopheessuutu jira. Akkanuma, uuumaa isa waan qubnu sana nuuf kennes galateeffanna.

Kanaafuu, waan qabnu irratti xiyyeeffannee waan hin qabneef ifaajuu wayyan jedha.

          Galatoomaa!🙏🏻

Dubbisuufi barreessuun ittuma fufa!

      Maddi: Abdiisaa Ejjetaati 🐲🐲🐲✍️🏿
  Share gochuun dagatinaa hiriyyoota keessanif


Dabataaf join kan jedhu cuqaasa