#AddisAbaba

“ አያት 49 ግሎባል ባንክ አካባቢ የጥበቃ ሠራተኛው ሲገደል ጓደኛው ደግሞ ቆስሏል ” - የቲክቫህ ኢትዮጵያ አባል

“ የድርጊቱ ምርመራው ገና አላለቀም ” - የፓሊስ መረጃ ክፍል

በለሚኩራ ክ/ከተማ አያት 49 ተብሎ በሚጠራው አካባቢ አንድ የግሎባል ባንክ የጥበቃ ሠራተኛ በጥይት ተመትቶ መገደሉን በስፍራው ያሉ የቲክቫህ ኢትዮጵያ ምንጮች ገልጸዋል።

በጥይት የተመታው ጥበቃ ሠራተኛ ጓደኛ እንደቆሰለ አስረድተው፣ ገዳዩና አቁሳዩ በሌላ ብራንች የሚሰራ የጥበቃ ሠራተኛ ሳይሆን እንዳልቀረ ጠቁመዋል።

“ 40/60 ሳይት 3 አያት 49 ግሎባል ባንክ ዘበኛው አሁን በጥይት ተመትቶ ሞተ። ግድያው የተፈጸመው ጠዋት አንድ ሰዓት አካባቢ ነው ” ሲሉ አንዱ የስፍራው ነዋሪ ገልጸዋል።

ሌላኛው ነዋሪ ደግሞ ድርጊቱ የተፈጸመው ዛሬ ጠዋት 1 ሰዓት ገደማ እንደሆነ፣ የግድያውን ምክንያት ግን በግልጽ እንዳላወቁ፣ የተመታው የባንክ የጥበቃ ሠራተኛ መሆኑን ነግረውናል።

የወንጀል ድርጊቱን ሰምተው እንደሁ የጠየቅናቸው የአዲስ አበባ ፓሊስ የህዝብ ግንኙነት ዳይሬክተር ኮማንደር ማርቆስ ታደሰ፣ ጉዳዩን እንዳልሰሙ፣ ተፈጽሞ ከሆነ ደግሞ መሰማቱ እንደማይቀር ገልጸዋል።

ኮማንደሩ፣ ጉዳዩን ለማጣራት የፓሊስ መረጃ ክፍል እንዲጠየቅ ያመላከቱ ሲሆን፣ ስለጉዳዩ የጠየቅነው የፓሊስ መረጃ ክፍል ደግሞ ጉዳዩን ካጣሩ በኋላ፣ “ ምርመራው አላለቀም ትንሽ ይጠብቁ አልጨረሱም ገና ” የሚል አጭር ምላሽ ሰጥተዋል።
 
ድርጊቱን ፈጻሚው አካል አልተያዘም እንዴ ? ሲል ቲክቫህ ኢትዮጵያ ላቀረበው ጥያቄ፣ “ የድርጊቱ ምርመራው ገና አላለቀም ” ብለው ቀጥተኛ ምላሽ ከመስጠት ተቆጥበዋል።

#TikvahEthiopiaFamilyAA

@tikvahethiopia