ከ2017 ዓ.ም ዓመታዊ የትምህርት ስታትስቲክስ መሰብሰቢያ ቅጽ አሞላል ጋር በተገናኘ በትምህርት ተቋማት የሚደረገው ምልከታ ዛሬም ቀጥሎ ተካሂዷል።

(ጥር 21/2017 ዓ.ም) የቢሮው የአጠቃላይ ትምህርት መረጃ ዝግጅትና አስተዳደር ዳይሬክቶሬት ዳይሬክተር አቶ ታዬ ወልደኪዳን ከቡድን መሪዎቹ አቶ ደስታ አብረሀም እና ከአቶ አዲስ ዘገየ ጋር በመሆን በተወሰኑ ትምህርት ቤቶች እና ክፍለከተማ ትምህርት ጽህፈትቤቶች ተገኝተው ምልከታ አካሂደዋል።

በዛሬው ምልከታ ጉለሌ ክፍለ ከተማ ትምህርት ጽህፈት ቤት እና በስሩ በሚገኙት የኢትዮጵያ ህዳሴ አንደኛ ደረጃ ትምህርት ቤት፣ በላዛሪስት ትምህርት ቤት እንዲሁም ቂርቆስ ክፍለ ከተማ ትምህርት ጽህፈት ቤት፣ ቦሌ ክፍለ ከተማ ትምህርት ጽህፈት ቤት እና ኮከበ ጽበሀ 2ኛ ደረጃ ትምህርት ቤት በመገኘት ምልከታ አካሂደዋል።

ምልከታው ከተደረገባቸው ተቋማት መካከል አንዱ የሆነው ቦሌ ክፍለከተማ ትምህርት ጽህፈት ቤት ቀደም ብሎ በቅጹ ዙሪያ መረጃውን ለሚሞሉ አካላት ኦረንቴሽን በመስጠትና በየትምህርት ቤቱ ድጋፍ የሚያደርጉ ባለሙያዎችን በመመደብ ባከናወናቸው የቅድመ ዝግጅት ተግባራት ከሁሉም የመንግስትና የግል ትምህርት ቤቶች መረጃዎቹ በቅጹ መሰረት ተሞልተው ወደ ክፍለ ከተማ መላካቸውን የክፍለ ከተማው ትምህርት ጽህፈት ቤት ኃላፊ አቶ መስፍን ታደሰ ሲገልጹ በጉለሌ ክፍለ ከተማም ከተወሰኑ ተቋማት መረጃዎቹ ተሞልተው ለትምህርት ጽህፈት ቤቱ መላካቸውን እና የቀሩ ተቋማትም በፍጥነት እንዲልኩ ጽህፈትቤቱ ተገቢውን ድጋፍና ክትትል በማድረግ ላይ እንደሚገኝ የጽህፈት ቤት ኃላፊው አቶ ሚሊዮን ኮራ አስታውቀዋል።