ምርጥ ጽሑፎች✍️✍️

ጥረትህን አስመዝግብ!

ፅድቅን ፍለጋ ብዙ ለፍተናል፣ ፍፁም ለመሆን ረጅም ተጉዘናል፣ በየጊዜው ለማደግ ለመሻሻል ያለማቋረጥ ጥረናል። ነገር ግን አንዳንድ ቀናት አሉ ጥረታችንን መና የሚያስቀሩት፣ አንዳንድ ሀሳቦች አሉ ልፋታችንን ትርጉም የሚያሳጡት፣ አንዳንድ ድርጊቶች አሉ በአንዴ ረጅሙን ጉዟችንን ድካም ብቻ የሚያደርጉት። በህይወታችሁ አንድ ነገር እመኑ። ሰዎች ናችሁ የተፈጠራችሁት ከስተት ጋር ነው፤ የምታዩዋቸው ሰዎችም ልክ እንደ እናንተ ሰዎች ናቸው ስህተት ይሰራሉ፣ ይወድቃሉ፣ ነገሮች ይባላሹባቸዋል። ራሳችሁ ላይ ጨክናችሁ ምንም የምታመጡት ነገር የለም። አውቆም ይሁን ሳያውቅ ስህተት ለሚሰራ ሰው ስህተቱን ላለመድገም እስከጣረ ድረስ ፈጣሪ ጥፋቱን ይቅር ማለቱ አይቀርም። ሁለት አይነት ሀጢአት አለ። የልማድና የአጋጣሚ። ከልማድ ሀጢያት፣ በቋሚነት ከሚፈፀም ስህተት የምታመልጡት በፆም፣ በፀሎትና በልባዊ ቆራጥነት ነው። ከአጋጣሚው ስህተት ደግሞ ማንነትን ሙሉ በሙሉ በመቀየር ነው። ዓለም ሁሌም ላዩን ወርቅ ውስጡን እሳት አድርጋ ብዙ የምታቀብላችሁ ነገሮች አሏት። እነዚም እናንተ ጋር ሲመጡ ስህተቶች ሆነው ይፃፋሉ።

አዎ! አትደናገጡ አትረበሹ። ፍፁም አይደላችሁም፣ ፍፁም ለመሆንም አትሞክሩ። እግዚአብሔር የሚጠላው ሀጢአትን አንጂ ሀጢአተኛን አይደለም። ስህተቱን አምኖ፣ ጥፋቱን ተቀብሎ፣ ተፀፅቶ ለተመለሰ ሁሌም በሩ ክፍት ነው። ስህተታችሁን የህይወት ዘመን ሸክም አድርጋችሁ አትኑሩ። ትናንት ብትሳሳቱ ቀሪው ዘመናችሁ ሁሉ የተሳሳተና የተመሰቃቀለ እንዲሆን አትፍቀዱ። ነገ መስራት ያለባችሁ የግል የቤት ስራ አለባችሁ፣ ዳግም እንዳይፈጠር ሊታረም የሚገባ ምግባር አላችሁ። በመጥፎ ለማድ አዙሪት ውስጥ ወድቆ ህይወቱ የጨለመበትና ተስፋ ያጣ ሰው ቢኖር ሁሌም ጨልሞ እንደሚቀር አያስብ፣ ሁሌም ጀምበር እንዳዘቀዘቀችበት እንደምትቀር አያስብ፣ ሁሌም ብሶተኛና የዓለም ተጠቂ ሆኖ እንደሚቀር አያስብ። በራሳችሁና በፈጣሪያችሁ ላይ ተስፋ ቆርጣችሁ ሰይጣንን ባለ ድል አታድርጉት፣ ራሳችሁ ላይ ጨክናችሁ የሰማይ አባታችሁን አታሳዝኑት። ስህተት አልባ ህይወት ለመኖር ራሳችሁን አታስጨንቁት። ተሳሳቱ ነገር ግን ታረሙ፣ አሁንም ተሳሳቱ ነገር ግን አሁንም ታረሙ። ስህተት መገለጫችሁ ሆኖ ፋታ ቢነሳችሁ ዝቅ ብላችሁ ከፈጣሪ ብርታትን ለምኑ።

አዎ! ጀግናዬ..! በራስ ላይ ተስፋ መቁረጥ ሽልማት የለውም፣ ራስን ችላ ብሎ መናቅ ምንም ዋጋ አያስገኝልህም። ምግባርህ ቢያሳፍርህ፣ ስራህ ስህተት ሆኖ ቢታይህ ምግባሩ አልያም ስራው እንጂ ስህተት አንተ ስህተት አይደለህም። እያወቅክም ይሁን ሳታውቅ ብታጠፋ ዳግም ራስህን የምታርምበት ሁለተኛ እድል እንዳለህ አስተውል። ሰይጣን ክፋቱ ክፉ ስራ አሰርቶ በራስህ እንድታዝን ያደርግሃል፣ ዲያቢሎስ መሰሪነቱ ብዙ ፈተና ፈትኖህ በአንዱ ቢጥልህ በዛው በአንዱ ሲኮንንህ ይኖራል። የመጡብህን ክፉ ሀሳቦች አንድ ለአንድ ታግለህ ያሸነፍክበትን ጊዜ አስታውስ። ጥንካሬህ ዛሬም እንዳለ ነው፣ አይበገሬነትህ አሁንም እንደዛው እንደተቀመጠ ነው። አንዲት ተልካሻ ስህተት በራስመተማመንህን እንድትሸረሽር አትፍቀድ፤ አንዲት ያልታሰበች ውድቀት ባዶነት እንዲሰማህ እንድታደርግህ አትፍቀድ። ከነስህተትህ ቀና በል፣ ከነጥፋትህ ደረትህን ነፍተህ ተራመድ። ነገር ግን ዳግም ያንን ጥፋት ሰርተህ የሚወድህንና የምትወደውን ፈጣሪህን ላለማሳዘን የቻልከውን ሁሉ አድርግ። ሌላው ቢቀር በእሱ ፊት ጥረትህን አስመዝግብ።
የፍቅር ቀን ይሁንልን! 🏞🌞🌅
(Epha A.)
ምክረ-አዕምሮ ለተሻለ ነገ!

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

በአምላኬ እታመናለሁ!

ከራስ ጋር ንግግር: "በአምላኬ እታመናለሁ፣ በፈጣሪዬ የማይናወፅ፣ የማይሸራረፍ፣ የማይታወክ እምነት አለኝ። እራሴን የምወደው አንድም የእግዚአብሔር አምላኬ የስስት ልጁ በመሆኔ ነው፤ ሁለትም በእርሱ ህያው መንፈስ በመታነፄ ነው። ለሁሉም ነገሬ መሰረቴ እርሱ እንደሆነ አውቃለሁ፣ የትም ብደርስ፣ የትም ብገኝ የሚያደርሰኝ አምላኬ እንደሆነ አውቃለሁ። ጥፋቴ ቢበዛም፣ ሃጢያቴ ማለቂያ ባይኖረውም፣ ብዙ ብበድል ብዙ ብስትም በይቅርታው ብዛት ግን እስካሁን አለው፣ በርህራሔው ጥግ በምህረት መንገድ እመላለሳለሁ። ወዳጅ ባጣ፣ ሰው ቢርቀኝ፣ ዓለም ፊቷን ብታዞርብኝ፣ ከስኬት ጋር ሆድና ጀርባ ብንሆን፣ ብቸኝነት ቢፈትነኝ፣ የውስጤን የምትነፍስለት፣ የሆዴን የማዋየው ሰው እንኳን ባጣ በቸሩ አባቴ በእግዚአብሔር ግን ሁሌም ሙሉ ነኝ፣ ዘወትር ደስ ይለኛል።

አዎ! በአምላኬ እታመናለሁ፣ ፈጣሪዬን አስቀድማለሁ፣ ለእርሱ እራሴን እሰጣለሁ። በእግዚአብሔር የመታመንን ጥቅም፣ ፈጣሪን የማስቀደምን ትርፍ፣ ህይወትን በእርሱ መንገድ የመምራትን፣ እለት እለት ከእርሱ ጋር የማሳለፍን ሽልማት ከማንም በላይ አውቃለሁ። ፈጣሪውን ይዞ ማን ወደቀ? በአምላኩ እቅፍ ሆኖ ማን ይጨነቃል? ማንስ ውስጣዊ ሰላም ያጣል? ዓለም ከንቱ ነች፤ ከሌለኝ ለእኔ ቦታ የላትም፣ ሰው ለእኔ ከመስጠት በላይ ከእኔ መውሰድን ይመርጣል። የእግዚአብሔር አምላኬ ውለታ ግን በምንም መመዘኛ ከፍጥረታቱ ዓለምና የሰው ልጅ ጋር አይነፃፀርም። ምናልባት ደጋግሞ ይፈትነኝ ይሆናል፣ ምናልባት አውቆ አጣብቂኝ ውስጥ ይከተኝ ይሆናል። ነገር ግን መቼም እንደማይተወኝ፣ እኔእንኳን ፊቴን ባዞርበት፣ ከደጁ ብርቅ፣ ዓለም ውስጥ ብደበቅበት ፈለጎ እንደሚያገኘኝ አምናለሁ። ያደረገልኝን ዘርዝሬ ባልጨርስም በእርሱ ስለመታመኔ፣ በምህረቱ እዚ ስመድረሴ፣ በይቅርታው ብዛት ሙሉ ሰው ስለመሆኔ ሁሌም ምስክር ነኝ።"

አዎ! ፈጣሪያችሁ እያለ አትሰበሩ፣ አምላካችሁ አብሯችሁ ሆኖ አንገት አትድፉ፣ ሁሉን ቻይ የሆነ ቸር አባት እያላችሁ ስለምን ሆድ ይብሳችኋል? የዓለምን ክብር፣ የሰውን አንቱታ፣ የምድሩን ዝናና ንብረት ለአፍታ ተወት አድርጉት። ከዓለም ጌጥ በላይ፣ ከስጋዊ ፍቃድ በላይ ስለ ህያዊት ነፍሳችሁ በትንሹ ማሰብ መጨነቅ ጀምሩ። የሰው ልጅ የታመመች ነፍሳችሁን አያድንላችሁም፣ የምትደርሱበት ከፍታና ስኬት በበደል የቆሰለውን ውስጣችሁን አያክምላችሁም። ከእግዚአብሔር የምታገኙትን ፈውስ ከዓለም አትጠብቁ፣ በፈጣሪያችሁ የሚሰጣችሁን ነፃነት ለማግኘት ሰውን ደጅ አትጥኑ። በአምላካችሁ ለመታመን ቅንጣት አታመንቱ፣ በፈጣሪያችሁ ድንቅ ስራ ተስፋ ከማድረግ እንዴትም ወደኋላ አትበሉ። የሚያዋጣችሁን አስቀድማችሁ እወቁ፣ በገባችሁ ልክ በፍፁም ልባችሁ ፈጣሪን ጠብቁት።
የተባረከ ቀን ይሁንልን! 🏞🌞🌅
(Epha A.)
ምክረ-አዕምሮ ለተሻለ ነገ!

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ከአድናቆትህ ተጠቀም!

ሰዎች በመሆናችን የሚመቸን፣ የምንወደው፣ የምናደንቀው ሰው ይኖራል። ከእርሱ ብዙ እንማራለን፣ እናውቃለን፣ እንደርሱ ለመሆንም እንጥራለን። ነገር ግን አኛ ስለወደድነውና አድናቂው ስለሆንን ብቻ ጥፋቱ ትክክል፣ ስህተቱ ተገቢ፣ ውድቀቱም ጥፋት ሊሆን አይገባም። የምታደንቀው ሰውን እንደሆነ እንዳትዘነጋ። ድጋፍህ ሃይልና ብርታት ሊሆነው ይችላል አንተም ከእርሱ ተግባር መጠቀም ካልቻልክ ግን የዘወትር አድናቂነትህ ይቀጥላል። አንተ ስለምትወደው ብቻ የማይሳሳት፣ አንተ ስለምትጠላው ብቻ ትክክል የማያደርግ ሰው የለም። አድናቂው ያደረገህ የግል ፍላጎትህና የእይታ አቅጣጫህ ነው። ማንንም የመደገፍ ምርጫ ቢኖርህም የምትደግፈውን ሰው እያንዳዱን ተግባር ግን የመቀበል ግዴታ የለብህም። ትወደዋለህ ማለት በአጥፊ ሃሳቦቹ ትስማማለህ ማለት አይደለም፤ አይመችህም ማለት መልካም ሃሳቦቹን አትቀበልም ማለት አይደለም። የሚጠቅምህን መውሰድ ላይ ብልህ ሁን፤ ከማንነቱ በላይ ተግባራቱ ላይ አተኩር።

አዎ! ጀግናዬ..! ከአድናቆትህ ተጠቀም! በልክም አድርገው። ስህተት የማይሰራ የለም፤ የማይታረምም እንዲሁ። ተሳስቷል ብለህ ለተቺት አትጣደፍ፤ ታርሟል ብለህም ለማሞካሸት አትቸኩል። ትልቁን ቁብ ነገር አስታውስ፤ የአድናቂና የተደናቂነትን ልዩነት በመሃላችሁ የፈጠረው ነገር የተፈጥሯችሁ ጉዳይ ሳይሆን የድፍረትና የበራስ መተማመናችሁ ጉዳይ ነው። በእራሱ ስለተማመነ፣ ጠንክሮ ስለሰራ፣ ዘወትር በእድገት ውስጥ ስለሚያልፍ፣ በየጊዜው ክህሎቱን ስለሚያዳብር፣ ለአፍታም በጭብጨባ ስለማይዘናጋ፣ በተቃውሞ ስለማይደናገጥ ያለበት ብታ ላይ ቆየ፣ አንተን የመሰሉ ብዙ የልብ ወዳጆችና አድናቂዎችን አፈራ። አንተስ እንደርሱ መሆን የማትችል ይመስልሃልን? በፍፁም! በእርግጥም መሆን ትችላለህ። እዚም እዛም ከማለት በላይ የሚማርክህንና አርዓያ የሚሆንህን አንድ የምትመኘው ሰፍራ ቀድሞህ የደረሰን ሰው በጥሞና ተከታተል፤ ከአድናቂነት ባሻገር ለመማር ተጠጋው፤ እያንዳንዱን እንቅስቃሴውን ከልብህ መርምር።

አዎ! ከአድናቂነትህ አትርፍበት፣ ከደጋፊነትህ ተጠቀም። በውዳሴ ከንቱና ስለሰው ዝና በማጨብጨብ ብቻ ህይወትህ እንዲቀየር አትጠብቅ። እንድትከተለው ያደረገህ በቂ ምክንያት ካለህ ከእርሱ የምትማረው ነገርም እንደሚኖር እሙን ነው። ለመማር የፈጠነ፣ አድናቆቱን ትርጉም የሚሰጠው፣ ብዙ ተከታይ ስላለው ብቻ ለመከተል የማይሽቀዳደም ሰው በእርግጥም የሚፈልገውን የሚያውቅ ሰው ነው። ህይወትህን በሙሉ ስለ አንድ ሰው ብርታትና ጥንካሬ፣ ስለ ጀብዱ እያወራህ ከምታሳልፍ የተጠቀምከውና በህይወትህ ላይ የፈጠረውን ተፅዕኖ ማስተጋባት ብትችል የተሻለ ነው። ለጊዜው ተከታይ ነህ፣ ከጊዜዎች ቦሃላ ግን ተከታዮች ይኖሩሃል። ለአሁን አድናቂ ብቻ ነህ፣ በቅርቡ ግን አድናቂዎች ይኖሩሃል። በየትኛውም ዘርፍ አድናቂና ደጋፊ ማግኘት ላይከብድህ ይችላል ነገር ግን በምታምንበትና በሚያስደስትህ ዘርፍ ላይ የምታፈራቸው እውተኛ ተከታዮችህ ይሆናሉ። ከምታደንቀው ሰው ተማር፣ ፈጠራህን አክልበት፣ በእራስህ መንገድ እርራስህን ለመሆን ጣር፤ አለም ካንተ ብቻ የምትጠብቀው አንድ ውድ አበርክቶት እንዳለ እመን።
ውብ ምሽት ይሁንልን! 🌘🌒✨💫
(Epha A.)
ምክረ-አዕምሮ ለተሻለ ነገ!

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ከዛሬ በኋላ!

ሁሉም ነገር ይቀየራል፤ እይታዎችህ ይቀየራሉ፤ አመለካከትህ፣ እሳቤህ ይቀየራል፤ ስራህ ይቀየራል። ምክንያቱም በእራስህ የፀና እምነት ስላለህና ለውጥ የሚጀምረው እራስን ከመመልከት፣ እራስን ከማሻሻል፣ እራስን ከመለወጥ፣ እራስን ከማንሳት፣ እራስ ላይ በመስራት ስለሆነ። ማወቅ የሚገባህን ማወቅ ይኖርብሃል፤ መማር ያለብህን መማር ይጠበቅብሃል፤ መጀመር ያለብህን መጀመር ይኖርብሃል። ከሁሉም በላይ፣ ከየትኛውም ጊዜ በተሻለ መጠንከር፣ መበርታት ይኖርብሃል። አይኖችህን ትገልጣቸዋለህ፤ እውቀትህን ወደ መሬት ታወርደዋለህ፤ እራስህን ወደ መሆን ትጠጋለህ። ሃሳበህን ወደ መተግበር፣ ህልመህን ወደ መኖር፣ እራስህን ወደ ማብቃት ትሸጋገራለህ።

አዎ! ጀግናዬ..! ከዛሬ ቦሃላ! ነገሮች ያበቃሉ፤ ሸክሞችህ ይወርዳሉ፤ ጭንቀትህ ይራገፋል፤ ብሶትህ ይርቃል። ከዛሬ ቦሃላ ነገን ታያለህ፤ ነገ ማለት ትናንት ቃል የገባህለት፣ ትናነት ያቀድክለት፣ ትናንት ያሰብክበት ቀን ነው። ዛሬ ላይ ነገን ስታልም ከርመሃል፤ የቀናቱን ለውጥ በጉጉት ጠብቀሃል፤ የጊዜውን መቀየር፣ የሰዓታትን መክነፍ ከልብህ ተመኝተሃል። ነገር ግን ሁሉም ነገር በጊዜ ውስጥ ቢመስልህም ዋናው ጉዳይ ግን ባንተ እምነትና ተግባር የሚገለፅ ነው። ቀናት ስለተየሩ የምትቀየር ከመሰለህ ዛሬን የመጨረሻ ቀንህ አድርገው። የስብራትህ መጨረሻ፣ የጭንቀትህ መጨረሻ፣ የብሶትህ መደምደሚያ። የትናነት ውሳኔዎችህን አስታውስ፣ የትናነት ህመምህን ከግምት አስገባ፤ በቃኝ ያልክበትን ጊዜ ወደኋላ ተመልከት።

አዎ! ህይወትህን እንዴት እየኖርክ ነው? በምን ደረጃ ላይ ትገኛለህ? ስለ እራስህ ምን ታስባለህ? የሚገባህ ምንደነው? የምትሰራው ምንደነው? ከሁሉም በላይ አምነህ የተቀበልከው ትልቁ ህልምህ ምንድነው? በጥቃቅን ሽልማቶችን ትልቁን ህልምህን እንዳትረሳ፤ ዛሬ በሚሰጥህ ጊዜያዊ ማደንዘዣ ደሞዝ መኖር ከምትችለው ህልም እንዳትሰናከል፤ ታይቶ ከሚጠፋው፣ አጓጉቶ ከሚወርደው ጊዜያዊ ስጦታ ለመጠበቅ ምን እያደረክ ነው? ምላሾችህ ሁሉ ዋጋ የሌላቸው፣ ለውጥ የማያመጡ፣ መንገድ የማይጠቁሙህ እንዳይመስሉህ። ጥያቄህ ውስጥ ሁሉም ነገር እንዳለ አስታውስ፤ ምላሾችህም የህይወትህ ቁልፍ እንደሆኑ እወቅ። ከዛሬ ቦሃል የምትልበት የተሻለ ጊዜ የለህምና ከዛሬ ቦሃላ ሁሉም እንዲያበቃ የማድረግ ድፍረትን ተላበስ፤ ለእራስህ በቃኝ ያልከበትን የመጨረሻ ውሳኔ አክብረህ ተገኝ።
ግሩም ድንቅ ቀን ይሁንልን! 🏞🌞🌅
(Epha A.)
ምክረ-አዕምሮ ለተሻለ ነገ!

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ሁሉንም አታስደንቁም!

ዓለምን ብትገዙ፣ ብዙ ድንቅ ነገርን ብታደርጉ፣ የስኬት ማማ ላይ ብትቀመጡ፣ በብዙ መንገድ ራሳችሁን ብትቀይሩ ምንም የማይደነቁባችሁና የማይኮሩባችሁ ሰዎች ይኖራሉ። ምናልባትም እነዚህ ሰዎች የሚደነቁት ምንም ውጤት ሳይኖር ጠንቅራችሁ ስትሰሩ ይሆናል፣ ይበልጥ የሚገረሙት ተስፋ ትቆርጣላችሁ ብለው በሚያስቡበት ወቅት ጥረታችሁን በመቀጠላችሁ ይሆናል። የለውጥ ሂደታችሁን በሚገባ ይመለከታሉ፣ አካሔዳችሁን ይከታተላሉ፣ ጥረታችሁን እግር በእግር ያስተውላሉ ነገር ግን እንዴት እንደምትሰሩ፣ በምን መንገድ ወደፊት እንደምትጓዙ አያውቁም። ትወድቃላችሁ ብለው ሲጠብቁ እናንተ ፍጥነታችሁን ጨምራችኋል፣ ይሳሳታሉ ብለው ሲጠብቁ እናንተ ይበልጥ ተምራችሁና ተሻሽላችሁ ወደፊት እየተጓዛችሁ ነው። እናንተ ላይ እንከን በመፈለግ ተጠምደዋል ነገር ግን ይሔን ያህል ትልቅ እንከን አያገኙም። በዚህ ሰዓት በጣም ይደነቃሉ፣ የእነርሱ ምቀኝነትና ክፉ ሀሳብ እንደማያስቆማችሁ ሲረዱ ይበልጥ ይገረማሉ። ከጉዟችሁ ሊያስተጓጉሏችሁ ቢሞክሩም ግን አልቻሉም፤ ጭብጨባቸውን በመንፈግ ስሜታችሁን መጉዳት ቢፈልጉም አይችሉም።

አዎ! ሁሉንም አታስደንቁም! ሁሉም ሰው በእናንተ ለውጥና እድገት አይገረምም፣ ሁሉም ሰውም ለጥረታችሁ እውቅና ለመስጠት አይመጣም። "እኔ ህይወቴ እንዲቀየር፣ ስኬታማና ደስተኛ እንድሆን ሰዎች ሊያምኑብኝ ይገባል፣ እነርሱም የግድ ሊደግፉኝ ይገባል።" ብላችሁ የምታስቡ ከሆነ አትሳሳቱ። ምንም ለማድረግ ከሰው አመኔታ ይልቅ የሚያስፈልጋችሁ የራሳችሁ በራስመተማመን ነው፤ ከሰው ድጋፍና ጭብጨባ በላይ የራሳችሁ ተነሳሽነትና ወኔ ነው። ስኬትና ጥንካሬ ለሰዎች እንደምትችሉ ማሳየት ሳይሆን ለራሳችሁ እንደምትችሉና አቅሙ እንዳላችሁ በተግባር ማስመስከር ነው። አንዳንዴ ብዙ ታዛቢና ደጋፊ ያላችሁ ቢመስላችሁም መጀመሪያ ግን የሚታዘባችሁ የገዛ ማንነታችሁ ነው። ራሱን ያላኮራ በምንም መንገድ ሰዎችን ሊያኮራ አይችልም፣ ራሱን ያላስደነቀ ሰው እንዴትም ሰዎችን ሊያስደንቅ አይችልም። "ከአሁን ከአሁን ሰዎችን አስደንቃለሁ፣ ከአሁን ከአሁን ሰዎችን አስደስታለሁ" ብላችሁ የምታስቡ ከሆነ አትሸወዱ። መጀመሪያ ራሳችሁን አስደስቱ፣ በቅድሚያ በራሳችሁ አቅም ተማመኑ።

አዎ! ጀግናዬ..! ከማንም ምንም ያለመጠበቅን ጥበብ ተማር፤ ከፈጣሪ እገዛ ውጪ የማንም ድጋፍ እንደማያስፈልግህ እመን። ውስጥህ ያለው ፅኑ ፍላጎት ትልቁ ብርታትህ ነው፣ ሰዎች የሚጥሉብህ እያንዳንዱ ትቺት ትልቅ ሃይልህ ነው። አንተ ራስህ ውስጥ የማታየውን ሰው ሰዎች በፍፁም አንተ ውስጥ ሊመለከቱት አይችሉም። ስላንተ የሚሉህን ሁሉ አትመን፣ ስለአቅምህ የሚነግሩህን በሙሉ አትቀበል። ራስህን ባወቅከው ልክ ራስህን ወደፊት ትገፋለህ፣ በራስህ በተማመንክ መጠን ጥረትህን ትጨምራለህ። በፍፁም ራስህን ዝቅ አድርገህ አትመልከት፣ በፍፁም አቅምህን አታሳንስ። ብዙ ፈታኝ ሁነቶች ይመጣሉ ይሔዳሉ፣ ብዙ አስቸጋሪ ጊዜያት ይመጣሉ ይሔዳሉ አንተ ግን በፈጣሪ ቸርነት እስካሁን አለህ። ሰው ከሚደነቅብህ በላይ በራስህ የምትደነቅበት ጊዜ ያስፈልግሃል፣ ሰው ከሚኮራብህ በላይ በራስህ የምትኮራበት ሰዓት ያስፈልግሃል። ሰውን ለማስደመም አትጣር ይልቅ ራስህን አስደምም፣ ሰው ፊት በግርማሞገስ ለመመላለስ አትድከም ይልቅ የራስህን ግርማሞገስ ራስህ አጣጥም።
ግሩም ድንቅ ቀን ይሁንልን! 🏞🌞🌅
(Epha A.)
ምክረ-አዕምሮ ለተሻለ ነገ!

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ጊዜህን በርካሽ ዋጋ አትሽጥ ወዳጄ !!

"ሴኔካ አካላዊ ንብረቶቻችንን መጠበቅ ላይ ጥሩ የሆንነውን ያህል፣ አእምሯዊ ድንበሮቻችን ማስመር ላይ ግን ግድ የለሽ መሆናችንን . ያስታውሰናል። ማንም እንዳሻው ድንበራችንን አልፎ ሲገባ አንቃወመውም: ንብረት ተመልሶ ሊገኝ ይችላል፤ እንዲያውም ገና ብዙ የምድር ሃብቶች በሰው አልተነኩም። ጊዜ ግን? ጊዜ ፈጽሞ ሊተካ የማይችል ሀብታችን ነው፤ ተጨማሪ መግዛት አንችልም፡፡ ማድረግ የምንችለው በተቻለ መጠን ለመቆጣጠር ጥረት ማድረግ ብቻ ነው፡፡"

"በሕይወታችን ውስጥ ሌሎች ጣልቃ እንዲገቡ በቀላሉ እንፈቅዳለን፤ የከፋው ነገር ደግሞ በአብዛኛው ጊዜያችንን ሊያጠፉት ለሚችሉት ሰዎች መንገድ የምናመቻች መሆናችን ነው። ማንም ሰው ለአላፊ አግዳሚው ገንዘቡን አይሰጥም፤ ግን እያንዳንዳችን ለምን ያህል ሰዎች ሕይወታችንን ሰጥተናል!ለንብረትና ለገንዘብ እጃችን አይፈታም፣ ሁላችንም እጅግ ስስታሞች መሆን ለሚገባን ለሚባክን ጊዜ ግን የምናስበው እጅግ ትንሽ ነው።”
- ሴኔካ

"የሕይወታችንን ቀናት ልክ እንደ ገንዘባችን አንመለከተም? በትክክል ለምን ያህል ቀናት በሕይወት እንደምንቆይ ስለማናውቅ፣ አንድ ቀን የምንሞት የመሆኑን ሀቅ በቻልነው ሁሉ ላለማሰብ ስለምንሞክር፣ ጊዜያችንን በነጻነት ለማባከን ፍቃድ የተሰጠን ይመስለናል። እዚህ ላይ እኔ በምትኩ የማገኘው ምንድነው?” ብለን እምብዛም ሳንጠይቅ በዚያችው ባለችን ጊዜ ላይ ሰዎችና ክስተቶች ጊዜያችንን እንዲሰርቁን እንፈቅድላቸዋለን፡፡"


"እንዴት እንደምትጠቀምበት ካወቅክ፣
ሕይወት ረጅም ነው ነገሩ፣ ለመኖር ያለን ጊዜ አጭር ስለመሆኑ ሳይሆን ብዙውን ያባከንነው ስለመሆናችን ነው። በደንብ ከተጠቀምንበት ሕይወት በበቂ ሁኔታ ረጅም ነው ብዙ ታላላቅ ነገሮችን ለመስራት በበቂ ሁኔታ ተለክቶ የተሰጠ ነው። በድሎትና ችላ በማለት ውስጥ ካባከንነው፣ መልካም ፍጻሜ ለማግኘት ካልሰራን፣ በመጨረሻ ማለፉን እንኳን ከመረዳታትን በፊት አልፎ እናገኘዋለን። ስለዚህ የተቀበልነው ሕይወት አጭር አይደለም፤ አጭር ያደረግነው እኛ
ነን።”
-ሴኔካ

ስለዚህ ዛሬ ራስህን ስትጣደፍ ወይም “በቂ ጊዜ የለኝም፡፡” የሚሉትን ቃላት ስትናገር ብትሰማው፣ ቆም በልና ጥቂት ሰከንዶች ውሰድ፡፡ ይህ እውነት ነው? ወይስ ብዙ አላስፈላጊ ነገሮች በመስራት ተጠምደህ ነው? በእርግጥ ውጤታማ ነህ፣ ወይስ በሕይወትህ ውስጥ ብዙ የባከነ ነገር እንዳለ ትገምታለህ? በህይወታችን አብዛኛውን ጊዜ  የምናባክነው በማይጠቅሙን ሀሳቦች እና በማይረቡ ነገሮች ላይ ነው። እያንዳንዱን ደቂቃ የምንጠቀም ቢሆን ምን ያህል ጊዜ ሊተርፈን እንደሚችል አስቡ!!


"እንዲህም እላለሁ እንዲት ቀንም ቢሆን አልሰጥም - ማንም ቢሆን አንድ ቀኔን ሊመልስልኝ አይችልምና!!

እንዲህም እላለሁ እያንዳንዷ ሰከንድ የእኔ ናት በባለቤትነት እና በስልጣን አስተዳድራታለሁ:: አልፋኝ የምትሄድ ሽርፍራፉ ሰከንድ አትኖርም!!"

ምክረ-አዕምሮ ለተሻለ ነገ! 🦋

#SHARE እንዳይረሳ ቤተሰቦች! 🙏😍
በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/@mikre_aimro2
ምክረ-አዕምሮ/ @mikre_aimro 😊 💪

አይንህን ጣልባቸው!

በሮች ሲዘጉ መስኮቶች ይከፈታሉ፤ ጨለማ ሲውጥህ ትንሽዬ የብረሃን ጭላንጭል ትታይሃለች፤ በእራስህ ስታዝን የሆነ የሚያጓጓህ ነገር ይከሰታል፤ ተስፋ ስታጣ አምላክህ አብሮህ መሆኑን ስታስብ ተስፋ ማድረግ ትጀምራለህ። ህይወት እንዲህ ነች፤ ፅናትህን ትፈልጋለች እንጂ እድሎችን ዘግታ አትዘጋም፤ እምነትህን ትሻለች እንጂ እስከ ወዲያኛው ተስፋ የምታስቆርጥ አይደለችም፤ ብርታትህ ያስፈልጋታል እንጂ እንዲሁ እንደ ቀላል ቆላልፋ አታስቀርህም። ብዙ በሮች ይዘጉብህ፣ አንተ ግን ወደ ተከፈቱት መስኮቶቾ ማማተርህን ቀጥል፤ ጨለማ ይክበብህ፣ አንተ ግን ወደ ትንሿ የብረሃን ጭላንጭል ተጠጋ፤ ተስፋ ማጣት ይፈታተንህ፣ አንተ ግን የመኖርህ ምክንያት፣ የተስፋህ ሚስጥር ወደ ሆነው አምላክህ ቅረብ፤ ተነሳሽነት ይጉደልህ፣ ድካም ይሰማህ አንተ ግን ጠንክረው የሚያጠነክሩህ፣ በርትተው የሚያበረቱህ ላይ አተኩር።

አዎ! ጀግናዬ..! ጨለማውን ለመግፈፍ፣ ህይወትን በተስፋ ለመሙላት፣ የተሻለውን ክስተት ለመፍጠር ተስፋን ወደሚሰንቁት፣ ብረሃን ወደሚያስገቡት የተከፈቱ መስኮቶች አይንህን ጣልባቸው፤ ተስፋ ወደሚሰጥህ አምላክ ተጠጋ፣ የሚያዋጣህን አቅጣጫ ያዝ። ህይወት ላከበዳት ከባድ፣ ላወሳሰባት ውስብስብ፣ ለደከመላት አድካሚ፣ ተስፋ ለቆረጠባት ተስፋ አስቆራጭ ነች። በተቃራኒውም ለተማመነባት ታማኝ፣ ለተደሰተባት አስደሳች፣ ላመሰገነባት አትራፊ፣ ላቀለላት ቀላል፣ ለሚኖራትም በፍቅር የምትኖር ነች። በትግል እደሰታለሁ፣ በውጪው ጫጫታ እረካለሁ፣ በከባቢው እረካለሁ ካልክ መቼም እንደማይሆንልህ አስታውስ። ከውስጥህ የሚወጣ እንጂ ከውጭ የሚመጣ ነገር አያሳርፍህም፤ የሆንከው እንጂ ያስመሰልከው ረፍት አይሰጥህም፤ ለእራስህ የተሰጠው እንጂ የቀማሀው አያስደስትህም።

አዎ! ማንንም ሳትጠብቅ ወደ ውስጥህ መመልከት ከጀመርክ ዙሪያህ በሙሉ ይቀየራል። ሁን ብለህ የምታጠፋው ጥፋት፣ አስበህበት የምትጋፈጠው ውድቀት፣ ፈልገህ የምታጣው ተስፋ የለም። ከእያንዳንዱ ድርጊቶች ጀርባ አስገዳጅና ከባድ ምክንያቶች ይኖሩሃል። ነገር ግን እስካልፈቀድክለት ድረስ የትኛውም ከባድ ነገር መኖርህን ሊያስጠላህ፣ ህይወትህን ሊያጨልም፣ ተስፋህንም ሊያሳጣህ አይችልም። ምንም ውስጥ ብትሆን በህይወት በመኖርህ የምትኮራበት፣ በመተንፈስህ የምታመሰግንበት ጊዜ አታጣም። የመጀመሪያው ሽንፈትህ እስከወዲያኛው ሽንፈትን እያፈራረቀ፣ ውድቀትን እያስከተለ፣ ሃፍረትን እያከናነበ አይቀጥልም።

አዎ! ሽንፈትህን ብቻ ከቆጠርክ ብዙ ተሸንፈሃል፤ ወደፊት እየተሸነፍክ ትቀጥላለህ። አሸናፊነትህን ከቆዘርክ፣ ድልህ ላይ ካተኮርክ፣ የተሻገርካቸውን መሰናክሎች፣ ያለፍካቸውን ፈተናዎች ካስታወስክ የአሁኑን ጨምሮ መጪዎቹን ፈተናዎችና መከራዎች እየተሻገርክ፣ እያሸነፍክ ትቀጥላለህ። ምንም ለማሰብ፣ ምንም ላይ ለማተኮር፣ ምንም ለማድረግ ማንም እጅህን በካቴና አስሮ የሚያስገድድህ አካል የለም። እራስህን የምታስረው፣ ማንነትህን የምታሳንሰው፣ አቅምህን የምትገድበው፣ ሰውንተህን የምትቀብረው አንተ እራስህ ነህ። ትኩረትህን በመቀየር ህይወትህን ቀይር፤ እይታህን በማሻሻል የህይወት አረዳዳህን አሳድግ፤ ክብርህን እያሰብክ፣ ከፍታህን እያስተዋልክ በልኩ ተንቀሳቀስ።
ግሩም ድንቅ ቀን ይሁንልን! 🏞🌞🌅
(Epha A.)
ምክረ-አዕምሮ ለተሻለ ነገ!

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ለእራስህ ምን ሰጠህ?

ኬት መጣህ? የት ትገኛለህ? ወዴት እየሔድክ ነው? በእነዚህ መንገዶች ሁሉ ምንም ስህተት የለም። ስህተቱ ጉዞህን በተመለከተ ለእራስህ የሰጠሀው ቦታ ነው። ኬትም ተነስ፣ የትም ተገኝ፣ ወዴትም ተጓዝ ዋናው ነገር እርሱ አይደለም። ዋናው እራስህን ምን ያክል ትቀበላለህ፣ እስከምን በእራስህ ትተማመናለህ፣ በየትኛው ማንነትህ ትኮራለህ፣ በየትኛው ስብዕናህ ይበልጥ ትደሰታለህ፣ ህይወትህን በሙላት የምትኖረው መቼ ነው? የሚለው ነው። ህይወት እስካለ ጉዞ አለ፤ አቅጣጫውም አንተ የመረጥከው ይሆናል። ወደ ፊት ወይም ወደ ኋላ፣ ወደ ቀኝ ወይም ወደ ግራ። ትልቅ ትርጉም ያለውም ሁሌም እንቅስቃሴ ላይ መሆንህ ነው። ወደፊት ለመጓዝህ፣ የተሻለውን ለመምረጥህ፣ እራስህን ለማግኘትህ፣ እራስህን ለማብቃትህ ግን ማረጋገጫ ያስፈልግሃል። ችላለው ካልክ መቻልህ ይታይ፤ አደርገዋለሁ ካልክ ማድረግህ ይገለጥ፣ አሳካዋለሁ ካልክ ማሳካትህ ስሜቱ ይሰማህ። ህይወት ክብደቷን እንድትቀንስ፣ ውስብስብነቷን እንድታጣ፣ አተልጋ በአልጋ እንድትሆን አትመኝ። በቀላል መንገድ ተጉዞ ቀላል ህይወት የሚኖር ሰው የለምና።

አዎ! ጀግናዬ..! ለእራስህ ምን ሰጠህ? ስለ እራስህ ምን ይሰማሃል? እየሔድክ የቆምክ ይመስልሃልን? እየለፋህ ያቆምክ ያክል ይሰማሃልን? ጥረትህ ትርጉም አልባ፣ ድካምህም ድካም ብቻ እንደሆነ ይሰማሃልን? መዳረሻህ ካነሰ ለጉዞህ ስሜት ማጣትህ አይቀርም፤ በትንሽ ግብ ጥረትህ ይገደባል፤ ባነሰ ራዕይ አቅምህ ይገታል፤ በወረደ ህልም ማንነትህ ያንሳል። ትግል አድርገህ የምትሰራው ነገር ሁሌም ትግልነቱ ይቀጥላል፤ ሳይዋሃድህ የምታደርገው ነገር ዘወትር ችግርና ክፍተቱ ብቻ ይታይሃል፤ ያንተ ያልሆነ ነገርም መዘዝ ብቻ ይዞብህ ይመጣል። ለእራስህ ለማድረግ ስትታገል፣ እንዲዋሃድህ ስትጥር ያንተ የሆነውንና እስከዛ ሰዓት ያልሞከርከውን ነገር ትበድለዋለህ። ዋናው ጉዳይ ላንተ የሚሰጥህ ስሜት ሆኖ ትኩረትህ ውጤት ከሆነ ቆም ብለህ ማሰብ ይጠበቅብሃል። እየሔድክ ቢሆንም የመሄድ ስሜት ሊሰማህ ይገባል፤ እየሰራህ ከሆነም የስራውንና ተከትሎት የሚመጣውን የድካም ጠዓም ማጣጣም ይኖርብሃል። እያንዳንዱ እርምጃ ውስጥ መኖርህን የሚያስታውስ፣ ትርጉም ያለው ነፍስ አለ።

አዎ! በየቀኑ መንገድ ላይ ስለወጣህ፣ በሩጫ ስለተጠመድክ፣ መጓዝህ ስላላቆምክ ብቻ ከመዳረሻህ አትደርስም። የጉዞህ ስሜት፣ የሩጫህ ድካም ትጉም ያለው መሆኑን ከውስጥ ሊሰማህ ይገባል። ብትሰራው ባትሰራው፣ ብትሞክረው ባትሞክረው በስሜትህ ላይ ለውጥ የሌለው፣ እርካታን የማይሰጥህ፣ ህይወትህን ነፍስ የማይዘራበት፣ ነፃነትን የማያድልህ፣ ከገንዘብ ውጪ ትርፍ የሌለው ነገር ውስጥ እራስህን ካገኘህ የህይወት ውስብስብ መረብ ውስጥ ተገኝተሃል ማለት ነው። ንቃትህ ለእራስህ ይጠቅምሃልና አመጣጥህን ትተህ፣ ችግሮችህን ረስተህ፣ ድክመቶችህን ወደኋላ ብለህ፣ ያለህበትን አጣብቂኝ ወደጎን ተትህ በዚች ቅፅበት ስላለህበት የህይወት ደረጃ ምን እንደሚሰማህ መርምር። ጥቂትም ቢሆን ለሰዎች ህይወት ምን እያበረከትክ ነው? ካንተ ብቻ የሚገኝ ምን ነገር አለ? የሚያምርብህ፣ የሚገልፅህ፣ የምትሆነው፣ ያንተ የሆነ ነገር ምንድነው? ህይወት ቅፅበት ናትና ሁሌም አሁንህ ውስጥ እንድትኖር፣ በአሁንህ እንድትደሰት የሚያደርግህ የህይወት ስንቅ ያስፈልግሃል። ለእራስህ የሰጠሀውን ግምት አስተካክል፤ ማንነትህን ስታስብ በእራሱ ደስታን የሚጭር፣ ፈገግታን የሚያድል፣ የሚያኮራህ አይነት ስሜት እንዲሰማህ አድርግ።
ውብ ምሽት ይሁንልን! 🌘🌒💫✨
(Epha A.)
ምክረ-አዕምሮ ለተሻለ ነገ!

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

በማንም አልደገፍም

ከራስ ጋር ንግግር ፦ "አንድን ነገር ስፈልግ ከልቤ ጠንክሬ እሰራለሁ፣ እርሱን ለማግኘት መተው ያለብኝን ሁሉ እተዋለሁ፣ እስከ ጥግ እጓዛለሁ፣ መጠየቅ ያለብኝ እጠይቃለሁ፣ መጋፈጥ ያለብኝን ነገር ፊት ለፊት እጋፈጣለሁ። ይሔን ሁሉ የማደርገው እውነተኛውን አቅሜን ስለማውቅ ነው፣ ጠንክሬ ብሰራ ምን ማግኘት እንደምችል ስለገባኝ ነው። ለዓመታት የዓለምን ግርግር ተመልክቼያለሁ፣ ለዘመናት ብዙ ነገር ከሰው ስጠብቅ ከርሜያለሁ፣ በጣም ለረጅም ጊዜ አንድ ቦታ ቆሞ ነገሮች በምኞቴ ብቻ እንዲስተካከሉ ስጠባበቅ ቆይቼያለሁ። ሰዎች እንዲወዱኝ ደፋ ቀና ያልኩበት ጊዜ ትዝ ይለኛል፣ ሰዎች እንዲረዱኝ የተጓዝኩት ረጅም ርቀት ትዝ ይለኛል፣ እራሴ ማድረግ የምችለውን ነገር ከሰው ስጠብቅ የነበረበት ጊዜ ትዝ ይለኛል፣ እኔ ለእራሴ ህልም የነበረኝን ተነሳሽነት ሰዎችም እንዲኖራቸው የተመኘውበት ጊዜ ይታወሰኛል። ነገር ግን እያንዳንዱ አስተሳሰቤ እያደር ብዙ ዋጋ አስከፍሎኛል፣ ቀድሞ የነበሩኝ አቋሞቼ ብዙ ርቀት ወደኋላ አስቀርተውኛል። ስቃይን ሸሸው ምቾትን መረጥኩ ነገር ግን በምቾት ውስጥ ስሰምጥ ይሰማኝ ጀመረ፣ ከፈጣሪና ከራሴ በላይ በሰው ስመካና ስደገፍ ራሴን እያጣውትና በራስመተማመኔን እየተነጠኩ እንደሆነ ይገባኝ ጀመረ።

አዎ! በማንም አልደገፍም፣ ከማንም ምንም አልጠብቅም፣ ማንም የወደፊት እጣፋንታዬን እንዲወስንልኝ አልፈቅድም። የእኔ ህይወት የእኔ ነው። በፈጣሪዬ እገዛ የት መድረስ እንደምችል አውቃለሁ፣ ራሴ ላይ ብጨክን ምን ማምጣት እንደምችል በሚገባ ተረድቼያለሁ። የዘመናት ወቀሳዬ ምንያህል እንሚያሳፍረኝ ማንም አያውቅም። በራሴ ጥፋት አንገቴን ስደፋ ነበር፣ ራሴን ለከፋ ውድቀት ሳመቻች ነበር። ነገር ግን እዛው የነበርኩበት ላይ አልቆምኩም። ቀና አልኩ፣ በችግሮቼ ነቃው፣ በውሱንነቴ ተንገበከብኩ፣ "እስከመቼ ከሰው እጠብቃለሁ" አልኩ፣ ረጅሙንና ፈታኙን የህይወት ጉዞ ተቀላቀልኩ። የተሻሉ ቀናት ከፊቴ እንዳሉ ስለማውቅ ለነዛ ቀናት ስል ዋጋ ከፈልኩ፣ ከራሴ በላይ ማንም እንደማይደርስልኝ ስለተረዳው ቀጥታ ወደ እርምጃ ገባው። ከእግዚአብሔር ጋር ህይወትን ድል አድርጌያለሁ፣ ከአምላኬ ጋር ፍፁም ከቀድሞ የተለየ ህይወትን መኖር ጀምሬያለሁ፣ የከፈልኩት ዋጋ በውጤት ተከቦ በእጄ ገብቷል።"

አዎ! ጀግናዬ..! ድጋፍን ፍለጋ ያባከንከውን ጊዜ አስብ፣ ነገሮች ሁሉ በቀላሉ እንዲሳኩልህ የጠበክበትን ወቅት አስብ። ቀላል ነገርን ፍለጋ ብትደክም ይባስ ከባዱንና ፈታኙን ነገር ታገኘዋለህ። የትም ብትሔድ ፈታኙን ነገር ማግኘትህ አይቀርም፤ ምንም ብታደርግ ዋጋ ሳትከፍል የምታገኘው ትልቅ ነገር የለም። ምቾትህ ለስንፍና አሳልፎ እንዲሰጥህ አትፍቀድ፣ ቸልተኝነትህ ለውድቀት እንዲያመቻችህ አትፍቀድ። በጥንካሬ የሚገለጠውን በረከትህን አትግፋው፣ ከብርታትህ የሚመጣውን ስኬት አትሽሸው። የአምላክ እግዛ በሚሰሩ እጆች ላይ ነው። "ከልቤ ከፈለኩት አገኘዋለሁ።" የሚለውን አስተሳሰብ ወደ ውስጥህ አስርፅ። በራስመተማመንህን ሰርትህና ለፍተህ እንጂ በፍፁም ተመኝተሀው እንደማታገኝ እወቅ። ጠንክረህ ስራ፣ የምትመኘውን ህይወትም በፈለከው መንገድ ኑረው።
ግሩም ድንቅ ቀን ይሁንልን! 🏞🌞🌅
(Epha A.)
ምክረ-አዕምሮ ለተሻለ ነገ!

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ጥላቻውን አታቆመውም!
እብደትህ እስከቀጠለ ጥላቻው አያቆምም፤ ልዩነት መፍጠር እስካላቆምክ ትቺቱ አያቆምም፤ ማስመሳል እስካልቻልክ ወቀሳው አይቀርም፤ ማጨብጨብ እስካልጀመርክ መነቀፍህ አያቆምም፤ መንጋውን እስካልተቀላቀልክ አጀንዳ መሆንህ አይቆምም፤ ተስፋ እስካልቆረስክ ጣት የሚቀስርብህ አታጣም። እራስህን መሆን ካላቆምክ በአንድ ፅንፍ የሚያንቋሽሽህ፣ የሚያወራብህ፣ የሚተችህ፣ የሚሰድብህ አይጠፋም። መረዳት የማይፈልግን ሰው ፈትፍተህ ብታጎርሰውም ሊቀበልህ አይችልም። ያንተ ሃሳብ ጤና ቢስ ሆኖ ሳይሆን ውስጡ የተፈጠርው ፈር አልባ ጥላቻና የበታችነት ስሜት ስለሚያንጨረጭረው ነው። እውነቱን ሲነጓሯት የኮረኮሯት መሰላት እንደሚለው አባባሉ፤ የሚመለከተው ጉዳይ ሲነሳ ያዙኝ ልቀቁኝ ማለቱ የማይቀር ጉዳይ ነው።

አዎ! ጀግናዬ..! ጥላቻውን አታቆመውም! መገፋቱን አታስቀረውም፤ ትቺቱ ሁሌም ይኖራል። በተመሳሳይ የህይወት አዙሪት የተጠመደ ሰው አልተረዳኝም ብለህ አንገትህን አትድፋ፤ በፍረሃት ሰነሰለት የታሰረ ሰው ጠላኝ ብለህ ሆድ አይባስህ። የምታደርገው ነገር ስሜት ካልሰጠው ዝም ማለት ቢችልም መፍጨርጨሩን ከመረጥ እርሱ ያንተ ጉዳይ ሳይሆን የእራሱ ጉዳይ ነው። እውነት እያደር ይጠራል፤ የሚገባውም በጊዜው ይገባዋል። የመጣህበትን መንገድ የማያውቅ ሁሉ ለመፍረድ መቸኮሉ እጅግ ያስገርማል። ነገር ግን ይህ ይሆን ዘንድ የግድ ነው። ማሰብ እንደሚችል ስትነገረው አለመቻሉን ካረጋገጠለህ ያንተ እንዲረዳህ መጠበቅ ከንቱ ድካም ነው። ህይወቱን ይውደደው አይውደደው ያንተ ጉዳይ ባይሆንም በምትችለው መንገድ ማስረዳትህን ግን እንዳታቆም። አሉታዊ ሰዎች ባሉበት አለም ከአስደናቂ ተዓምር ውስጥ እንኳን ህፀፅና ክፍተት መታየቱ አይቀርም። አብዛኛው ሰው የሚፈልገውን እንጂ የሚያስፈልገውን አያይም። በኡሉታዊነቱም ፍላጎቱ አሉታዊና መጥፎ ሃሳብ ነውና የፈለገውን ነቅሶ ለማውጣት ዘወትር ይተጋል።

አዎ! በመደበኛው ክልል ተከልለህ፣ በጊዜያዊ ሁካታ ተከበህ፣ ማንም የሚያደርገውን እያደረክ፣ መንጋውን እየመራህ አንዳች ነገር ጠብ እንዳላለልህ ካንተ በላይ ምስክር የለም። የተለየ ነገር መፍጠር ከፈለክ ለእራስህ ጤነኛና የመልካም ስሜት ባለቤት ብትሆንም በብዙዎች ግን እብድ መባል ይኖርብሃል። በሁለት መልኩ እብድ ልትባል ትችላለህ፤ አንድም በሃሳብህ፣ ሌላም በተግባርህ። የተለየ ነገር ለማሰብ ተጠንቅቀህ፣ አዲስ ድርጊት ለመፈፀም የሰውን ምላስ ጠብቀህ እስከ መቼ ትዘልቀዋለህ? ስታስብለት የማይገባው ቢገጥምህም እንዳልገባው ለመረዳት መጣርህን ትተህ እስኪገባው መወትወትህን ቀጥል። አንዳንዴ በቀጥታ የተነገረለት ሰው ባይጠቀመውም በተዘዋዋሪ የሚጠቀመው ሰው ይኖራል። አላማህ መቀየር፣ ማደግ፣ ለሰዎች መትረፍ፣ ህይወትን በሙላት መኖር ከሆነ ምንህንም ለማያውቅ ሰው ብለህ ወደኋላ አትመለስ፤ በእራስህ አትዘን፣ ተስፋ አትቁረጥ፤ አላማህን አትዘንጋ። በሚያዋጣህ መንገድ ጉዞህን ቀጥል፤ ያመንክበትን ማድረግህን ግፋበት፤ ከግብህ የሚያደርስህ እንደብረት የጠነከረ ፅኑ አቅም ይኑርህ።
ውብ ምሽት ይሁንልን! 🌘🌒💫✨
(Epha A.)
ምክረ-አዕምሮ ለተሻለ ነገ! 🦋

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @MentalCounsel 😊 💪

በአላማ ተማር!
፨፨፨//////፨፨፨
እውቀት የጥበብ መግቢያ በር ነው። አላዋቂ ምንምያህል ቢጥርና ቢታገል የጥበብ ደጃፍ ሊደርስ አይችልም። ለዓመታት የምትማሩት ሰው የሆነውን ለመሆን አይደለም፣ ለዘመናት እንቅልፍ አጥታችሁ የምታነቡት የሆነ ቦታ ተቀጥራችሁ ዘመናችሁን በሙሉ ለመፍጀት አይደለም። ለምን እንደምትማሩ ካላወቃችሁ ትምህርቱ ቢቀርባችሁም ግደየለም። መማር ብክነት ሆኖ አያውቅም፤ ትምህርት ቤት ሔዶ እውቀትን መገብየትም ኪሳራ ሆኖ አያውቅም። በምክንያት የሚደረግ የትኛውም ነገር ጥቅም አለው። አሁን አሁን በትምህርት ዙሪያ ብዙዎች በሁለት ጎራ ተከፍለዋል። አንደኛው ለዓመታት መማርን እንደ ግዴታ ያየዋል፣ ሌላኛው ከነጭራሹ ትምህርት መማር እንደማያስፈልግ ያስባል። ምናልባት ሁለቱም በራሳቸው መንገድ ልክ ሊሆኑ ይችላሉ ነገር ግን ሁለቱንም ሊያስማማ የሚችል አንድ ሃሳብ አለ። እርሱም "ለምን ትማራለህ?" የሚለው ጥያቄ ነው። የጥያቄው ምላሽ ሁሉንም ነገር ያስተካክላል። በዓላማ የምትማሩት ትምህርት ትርፉ እጅግ ከፍተኛ ነው፤ ዓላማ የሌለው ትምህርት ግን ከኪሳራዎች ሁሉ የላቀ ትልቅ ኪሳራ ነው።

አዎ! ምንም ውስብስና ግራ የሚያጋባ ነገር የለም። አሁን ላይ እየተማራችሁ ከሆነ ለምናችሁን ፈልጉ፣ ገና የመማር ሀሳብ ካላችሁም ለምናችሁን ፈልጉ። ህይወት እቃቃ ጫወታ አይደለችም። በተገደበ እድሜያችሁ አትጫወቱ። ብዙ ሰው ስለተማረ፣ ብዙ ሰው ማስተርስ (Masters) ፒኤችዲ (PhD) ስለደራረበ፣ ብዙ ሰው ዘመኑን በሙሉ በትምህርት ላይ ስለፈጀ  እናንተም የብዙውን ሰው መንገድ የመከተል ግዴታ የለባችሁም። ስም እንጀራም ሆነ ዳቦ አይሆንም፣ ስም ብቻውን አንድ እርምጃ ወደፊት ፈቀቅ አያደርጋችሁም፣ ለዘመናት የለፋችሁበት ትምህርት ብቻውን ነፃ አያወጣችሁም። የተማራችሁትን ካልተገበራችሁት፣ እውቀታችሁን ዓላማችሁ ላይ ካላዋላችሁት፣ የጥበብን በር እንዲከፍትላችሁ ካልፈቀዳችሁለት፣ በመረጣችሁት ዘርፍ ላይ ስመጥር ባለሙያ ካልሆናችሁበት ጊዜያችሁን እያባከናችሁ ነውና ቆም ብላችሁ አስቡ። ለዘመናት ያከማቻችሁት እውቀት ድፍረት ካልሰጣችሁ፣ ህይወታችሁን ካላሻሻለላችሁ፣ ወደፊት ካልገፋችሁ እውቀትነቱ ምኑ ጋር ነው? መማሩስ ጥቅሙ ምንድነው?

አዎ! ጀግናዬ..! በአላማ ተማር! በምክንያት ጊዜህን ስጠው። በዋናነት ተማሪ ብትሆን፣ በትርፍ ጊዜህም ብትማር ጊዜ ማሳለፊያ የሚባል ወይም በሰው ግፊት የምትማረው ትምህርት የለም። ብዙ ጊዜ የተማረ ሰው ይፈራል፣ ብዙ ጊዜ የተማረ ሰው ከተማረበት ውጪ መስራትን እንደ ሀጢያት ይመለከተዋል። በፍፁም አትሸወድ። በተማርክበትም ይሁን ባልተማርክበት ከፍ የሚያደርግህንና ከአላማህ ጋር የሚገናኝ ስራን ካገኘህ ዝቅ ብለህ ስራ። ዘላለም ዝቅ ብለህ አትኖርም፣ እድሜ ልክህን ከሰው በታች እንደሆንክ አትቀርም። መማርህ ዝቅ ብሎ መነሳትን እንዲያስተምርህ አድርግ፣ እውቀትህ ለአላማህ የመፋለም አቅምህን እንዲያበረታ አድርግ። አትዘናጋ፣ መዘናጋት ከፍለህ የማትጨርሰው እዳ ያሸክምሃል፤ ዛሬ ነገ አትበል፣ ቀጠሮ አታብዛ ቀጠሮህ ፈሪና ጭንቀታም ያደርግሃል። ከማንም ምንም አትጠብቅ። ተምረህ ተምረህ የተማረ ሰው የማይገባውን ህይወት እየኖርክ ከሆነ የትምህርት ስረዓቱን ከመውቀስ የራስህን እወቀትና ትምህርት በመጠቀም ከተመፅዋችነት ነፃ ውጣ። የገጠመህን ችግር የሚያሳልፍህ የተማርከው ትምህርት ሳይሆን ያንተ ብስለትና ጥንካሬ እንደሆነ እወቅ።
ግሩም ድንቅ ቀን ይሁንልን! 🏞🌞🌅
(Epha A.)
ምክረ-አዕምሮ ለተሻለ ነገ! 🦋

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪