ድንገት ጭር ያለ ቦታ ሳለሁ ብዙ ምልክት ሳያሳይ ወይ እኔ ሳላስተውለው አላቅም ብቻ ዶፍ ዝናቡን ለቀቀው ። የቱም ቦታ የታየኝ መጠለያ አልነበረም ።

በቅርቡ ወለም ያለኝ እግሬ መሮጥ ስላላስቻለኝ በተቻለኝ መጠን ለመራመድ ሞከርኩ

በቲሸርት መሆኔን ፣ መራመድ አለመቻሌን ከምንም ሳይቆጥር ዝናቡ ያለርህራዬ ቀጠቀጠኝ

አለቀስኩ ......።

ደብሮኝ ነበራ!!!

አጥንትን የሚፍቅ ድብርት ውስጥ ነበርኳ ፣ ማንም ሊያድነኝ ከማይችል ዱካክ ውስጥ ነበርኳ

በችግር ውስጥ ማለፍ ፣ በችግር ማደግ የሚያስተምረው ችግር ሲመጣ አለመቸገርን አይደለም ችግሩ እንደሚያልፍ መረዳትን እንጂ !

የጠዋት ፀሃይ ውስጥ ተስፋ ማየት እያቆምኩ ነበር ፣ የምሰማው ነገር ሁሉ አልጥም ስላለኝ ማንንም ላለመስማት ከብቻዬ ጋ ብቻ ለመሆን እየታገልኩ ነበር ...

በዚህ ሁኔታዬ ዝናቡ ሲቀጠቅጠኝ ሆድ ባሰኝ ፤ አለም ላይ ሁሉም ሊያጠቃኝ የተዘጋጀሁ የመስዋዕት በግ የሆንኩ መሰለኝ ።

ዝናቡ እያባራ መጣ ፣ እምባዬም እየደረቀ ሄደ

ከዛ ዶፍ ዝናብ በኋላ
መጠለያ ከማጣት በኋላ
ሁኔታዬን ሳያገናዝብ ከቀጠቀጠኝ በኋላ
ከአለ'ማንም አይዞህ ባይ ከተደበደብኩኝ በኋላ

ዝናቡ ቀጥ አለ!!!

በማያሳምን ፍጥነት ፀሃይ ወጣች ። የፀሀይ አወጣጧ የተደበደበው ልብሴን እንደሚያደርቀው ፣ የበረደው አካሌን እንደሚያሞቀው ተስፋ ሰጠኝ ።

ከዶፎ ዝናብ ቀጥሎ የወጣችው ፀሃይ ሳያት የሆነ ሚስጥር እንደነገረቺኝ አይነት ፈገግ አልኩ ።

ፀሃዬ ❤
© Adhanom Mitiku

📱ከወደዱት ለወዳጅዎ ያጋሩት!📱
@bewketuseyoum19
@bewketuseyoum19