እንደ "እውነት"

... ግዜ ያለ ረፍት ዓለምን ያፈራርሳል... ሁሉም ነገር ወደምንም ቅንጣቶች ያንሳሉ... እኛ አርፋጆቹ ከፍርስራሹ ጭቃ እናቦካለን... ታሪክ እንደሸክላ እናበጃለን ግዜ ባናቆም እንገታዋለን... አስገበርኳቸው እንዳይል አንተኛም... አሸነፍነው እንዳንል ይሽረናል...

... ዘለዓለም ወደትላንትናና ወደነገ መጓተት...

...ይህችም ናት ህይወት...


              |ዘካሪያስ|

    °•.• @yenie_kal •.•°
          @yenie_kal
       ○○○○○○○

"በውስኔና አድርጊት መሃል ያለው ርቀት ፍርሃትን ያክላል... ምናልባት በግዜና በሰውም"


"... ገመድ ዝላይ...
የገመዱ አንድ ጫፍ የስልክ እንጨት ልላይ ታስሯል... እኩያዬ አንዱን ጫፍ ይዛ ታዞራለች... "አንድ... ሁለት... ሶስት... ግቢ እንጂ..." ቀሚሴን ዳር እና ዳር ይዤ እመር ብዬ እንደቆምኩ... የገመዱን ጡዘት አጠናለው... ዘልዬ ለመግባት ግን አልደፍርም..."


"... እናሸንፋለን...
ለገላዬ ፀሃይ ላይ ያኖርኩት ውሃ ስሸሸው እሁድ ሊያልቅ አፋፍ ላይ እደርሳለው... እንደልጅነቴ ... ሜዳው ላይ ልታጠብ እቀመጣለው... ከልብሴ ስር ሙቅ ቆዳ አለ... የጠለኩትን ውሃ ይዤ እጠብቃለው... የሚሌልት ቀን የሚቀትር ይመስል... በንፋስ የያዝኩት ውሃ ይሞቅ ይመስል... ሌላ ቀን ሊላ ግዜ ሌላ መላ እጠብቃለው... " ምናባቱ ይሄ ራቁቱን ይወላገዳል" እናቴ ናት...ባገኘችው ነገር የፈራሁት ውሃ ውስጥ ትነክረኛለች... በፍቃዴ ያልገባሁበትን ህፅበት እፈፅማለው..."



              |ዘካሪያስ|

    °•.• @yenie_kal •.•°
          @yenie_kal
       ○○○○○○○

...ትንፋሼን እቆጥራለው... እያንዳንዷ የሳንባዬ የመጨረሻ ትዝታ ልትሆን ትችላለች... እርምጃዬን እቆጥራለው... የፊተኛው የቀደመውን ይሽራል... አይኖቼ መድረሻዬን ለማማተር አይሹም... ይልቅ ጫማዬ ላይ ተተክለዋል... በጆሮዬ የከበበኝን ሁከት አልሰማም... የገዛ ትንፋሼን አዳምጣለው... እፍፍፍፍፍፍፍ... እንደበረሃ አውሎ ንፋስ ያፏጫል... የተረከዜን መንኳተት እስመአለው... የልብ ምቴን እሰማለው... የግርግዳው ሰአት ውስጥ ካለው ፔንዱለም ጋር ያረግዳሉ... ጀርባዬ ላይ ስለተሸከምኩት ጓዝ አላማርርም... በዝምታ እግሬን አነሳለው... በመጓዝ መሃል በሰመመንሽ አርፋለው... በስምሽ ከተከልኩት የእጣን ዛፍ ጠረንሽ ይጤሳል... በርሱ ላይ ትዝታሽ ይጫወታል... ከትዝታሽም ያን ቀን እመርጣለው... "መጣህልኝ" ድምፅሽ እንደንጋት እንዲያንሾካሹክ እጠብቃለው... ከሰመመኔ እንቅፋት ያነቃኛል... እንዳዲስ እግሬነነሳለው... ቤቴ እስክደር



              |ዘካሪያስ|

    °•.• @yenie_kal •.•°
          @yenie_kal
       ○○○○○○○

"... ትገርመኛለህ..."


የሚያባራ ሳቋን ፍሬን እየያዘች... ከእዝነት ይሁን ከሳቅ ብዛት ከሚያባብሉ አይኖቿ ዳር ኮለል ያሉ እንባዎቿን እያበሰች ... በትኩስ እንባ ሰበብ ቀልተው እንጆሪ የመሰሉ ጉንጮቿን እያደራረቀች... ደም ያጋተ የታች ከንፈሯን ላመል እየነከሰች... ባይኖቿ የሚሸሻትን ገፄን እያሳደደች...

(... ይህን ተተንትኖ የማያልቅ የገፅዋን ጣዕም... ሳያት ባፌ ሃምራዊ ሳቅ የሚሞላኝን... እዚህ አልፃፍኩትም... )


..."ምኔ ይገርማል" አልኳት በዓይኗ እየተሳደድኩ...

"... ከደስታ ቀኖችህ የሃዘን ወይን ትቀዳለህ..."

"... ጥሩ ወይን ነው?..."

"... ሚገርመኝ እሱ አይደል..."

"ምኑ?"

"... ሃዘን መጣፈጡ... "

... ዝም...

እንዳዘነች ነገር ... አንገቷን ትከሻዬ ላይ ሰበረች... ፀጉሯ አንገቴ ስር መዓዛውን ይነሰንሳል... ገርበብ ያሉ አይኖቿን አያለውሁ... የረሳችው የታች ከንፈሯን አያለሁ... ገላዬ ታርሶ እንደለሰለሰ የሃምሌ መሬት ዘር ሆና እንድትበተን ይጎመጃታል... የእግዜር ሞፈር ባበጀው ተረተር ወዟን እንድትዘራ... ሁለመናዋን ሁለመናዬው ውስጥ አቀፍኩት... መለኮታዊ መልዕክት እንደማደርስ ሁሉ... ክብርና ፍርሃት የሞላው መውደድ አዋስኳት...


... በለሆሳስ እንዲህ አለቺኝ...

"እኔ ምልህ..."

"እ..."

"... ይሄ ምኑ ያሳዝናል?...”



              |ዘካሪያስ|

    °•.• @yenie_kal •.•°
          @yenie_kal
       ○○○○○○○

... ከትዝታ ጋር የሚሞተው ዛሬዬ ይሁን ትላንቴ እርግጠኛ አይደለሁም... የምታገለው ነገን ከመምጣት ይሁን ትላንትን ከመሄድ አለየልኝም... ተስፋዬ መርሳት ይሁን አዲስ ትዝታ ግር ይለኛል...

... ዛሬን እንደ ውሃ ላይ ኩበት ... ባህር እንደተጣለ እትብት... መድረሻም መነሻም ሳሳጣው አውቃለው...

... ቁምሳጥኔ ቢከፈት የጠበብኝ ቡትት ነው የሞላው... እንዳልጥለው የሚያሳሳኝ እንዳልለብሰው ደግሞ አይገባልኝም...

... ምናልባት የ"ምናልባት" ሃገሩ ነኝ...



              |ዘካሪያስ|

    °•.• @yenie_kal •.•°
          @yenie_kal
       ○○○○○○○

...ስስማት ጉንጮቿ ከንፈሬ ላይ እንደ ለምለም እንጀራ ናቸው ... ካንገቷ ስር ከሙቀቷ ጋር ስጋዬን አሸታለው... ቤቴ እዝያ ነው ... ጣራዬ እቅፏ ውስጥ ነው ... ማረፊያ መደቤ ደረቷ ላይ ነው... የምለብሰው መዳፏን ነው ... የምበላው እንደማር የሆነ ምርቃቷን ነው... ይህንን ግን ነግሬያት አላውቅም...



          |ዘካሪያስ|

    °•.• @yenie_kal •.•°
          @yenie_kal
       ○○○○○○○

... ዝምታው ውስጥ የሚሰማው የኔ ድምፅ ብቻ ነው... ንግግሩ እንኳን ከፀትታ ያንሳል... ከእጁ ጋር ባለፊልም ካሜራ አብሮ ተፈጥሯል... በዙሪያው እንደ መዓት ቢራቢሮ ነኝ... ሊይዘኝ ሲጥር አላውቅም... ምናልባት ለዚህ ነው ደህንነት ሚሰማኝ... ላርፍበት እቋምጣለው... መሆኔን ሁሉ እንደ አዘቦት በዝምታ ያልፋል... ከ እራፊ መልሶቹ እጫወታለው...

(ምናልባት ፍቅር ይዞኛል... ከትንንሽ ሳቆቿ ጋር... ከትንንሽ ገላዋ ጋር ... ከትንንሽ ጠረኗ ጋር... እንዳልለምዳ ፈርቼ ነው በትንሹ የቀረብኳት... ከጣቶቿ መርጬ ማርያም ጣቷን ከሳቋ መርጬ ፈገግታዋን ከአይኗ መርጬ ትንሽ መሽኮርመሟን... ከገላዋ ልዝብ እቅፏን...
... በሙሉ አይኔ ሳላያት)

... እርሱ ፎቶ ለማንሳት ይቁነጠነጣል... እኔ ያየውን ላይ እቅበጠበጣለው... ነፍሱን የሳበውን ላውቅ... አብረን ሆነን ካነሳው ላይ መርጦ አጥቦ ያመጣልኛል... እዚህ ሆኜ ግርግዳዬን የሞላው ... ጤዛ ያረጠበው ሳር ምድር እንደ መርገፍ ያለች እፉዬ ገላ የደረቀ ቅጠል... ትንንሽ አበቦች... የዝናብ ጠፈጠፎች ... ንፋስ የገፋቸው አፀዶች... ከነዚህ ሁሉ ላይ የሚፈልቁ ትንንሽ የፀሃይ ልጆች... ናቸው

(ከካሜራዬ ድምፅ ጋር አዲስ ትዝታ ይፃፋል... የጤዛው መልክ ጠረኗን ይጠራብኛል... የረገፉ እፉዬ ገላዎች ጋር ስልምልም አካሏን አስባለው...  የካፍያው መልክ አንገቴ ስር የሰማሁትን የትንፋሽዋን ሙቀት ያስናፍቀኛል... ከትናንሽ ትዝታዎቿ ጋር ትናንሽ ፀሃዮች እለቅማለው)

... ወረቴ ሲያልቅ ይታወቀኛል... ቢራቢሮዎቼ አበቦቹን ለካክፈው ጨርሰዋል... ደብቆ ያኖረው አፀድ የለም... ቸልታው ውስጥ ስለተጋረዱ መንገዶቹ አላውቅም... ፀትታውን ተሰናበትኩት... ስሄድ የተከተለኝ የካሜራው ድምፅ እና ዝምታው ነው...

(... ልጅነቴን ከበላሁ ቡሃላ... "መጥለቅ" ያልኩትን ፎቶ አተኩሬ አየሁት... በድንግዝግዝ ብርሃን ውስጥ ከኔ ርቃ የምትበር ቢራቢሮ... ፀሃይ አይደለችም... በመሃከላችን የተጋደመ አድማስ አይታይም... ግን በርምጃዋ ልክ የሚጨልም ቀን እኔ ጋር ነበር...)


              |ዘካሪያስ|

    °•.• @yenie_kal •.•°
          @yenie_kal
       ○○○○○○○

ጥያቄ አለኝ!

ቃል አልባ ሳለው ጀምሮ ... አቅሌም አፌም ሳይተባ... መንገዴን ሳላስተውለው... የተበተብክብኝን እሽክርክሪቴን... ያስዘገንከኝን እጣ ፈንታዬን ...ያላዋቂ ምርጫዬን ኪዳን... ቃልህን እሽረው ዘንድ ስልጣን አለኝ? ያወቅኸውን ነገዬን ልቀይረው ጉልበት አለኝ?

መልስልኝ ጥያቄ አለኝ!




              |ዘካሪያስ|

    °•.• @yenie_kal •.•°
          @yenie_kal
       ○○○○○○○

"... ለካስ ማርያም ማርያም የማንልበት ምጥ አለ..."



              |ዘካሪያስ|

    °•.• @yenie_kal •.•°
          @yenie_kal
       ○○○○○○○

... የስው ልጅ ፍትህ እንደ አጭር ብርድልብስ ነው... የሰው ልጅ ሃቅ ፍርሃቱ ብቻ ነው... ምናልባት ማርጀት ማለት ይህን ማመን ይሆናል... ምናልባት ተስፋ መቁረጥ መልኩ እንዲህ ነው...

በመኖር አጸድ ውስጥ
(በእውቀቱ ስዩም)

ጊዜ ከሰው መሀል- መርጦ ሲያቀማጥል
ማጣት አለ ደሞ፥
የወለዱትን ልጅ፥ ጉድፍ ላይ የሚያስጥል
በተፈሰከ ቀን፥ ጾምን የሚያስቀጥል::

እድልና ትግል በሚጫወቱበት
በደልዳላው ስፍራ
አለቃና ጭፍራ-
-ቃል ሲለዋወጡ፥ ውልና መሀላ
“አብረን እናድጋለን” ቢባል ለይስሙላ
ወንዙን ሳያጎድል ፥ሐይቁ መች ሊሞላ፤

ጸሐይ ብትወጣ
ፍጥረት በጠቅላላው ጸጋዋን ቢቀበል
የደመናም ጠበል፥
ለሁሉ ቢደርስም
አንደኛው አያድግም፥ አንዱን ሳያከስም::


              |ዘካሪያስ|

    °•.• @yenie_kal •.•°
          @yenie_kal
       ○○○○○○○

... የሰው ልጅ አስቦ ወደዚህ አልመጣም...ግዜ አልመረጠም... የጥቅምት አበባ ጠብቆ የፀደይ ፍልፍል ሙቀት አስታኮ... የወንዞችን መቅልለል አይቶ... የመስኩን ማማር አድንቆ ወደምድር አልመጣም... ወደቀ እንጂ እንደ ምንም እንደ ማንም ግዜ መሃል መሬት መሃል...

... ምናልባት ለዚህ ነው የዘመንና የሃገር ልክ ኖሮት የማያውቀው...



              |ዘካሪያስ|

    °•.• @yenie_kal •.•°
          @yenie_kal
       ○○○○○○○

"... ድምፅሽ ሲርቅ ከጆሮዬ
መጠውለጉን ባየሽልኝ
ያ ገራገር ሰውነቴ..."

... እጁን ከትከሻዋ ላይ አኑሯል የሚያቋርጡትን አስፓልት እየተገላመጠ ከመንገድ የተቀበለውን የጎሳዬን ለቅሶ ያስተጋባል...

የተለያየ ንፋስ እንደሚነፍስባቸው አልታየውም...

ከደስታው ጋር ናፍቆት ይነፍሳል...
ከደስታዋ ጋር ስጋት ይበርዳታል...

መች ነው ማገኛት ይላል...
ልቤ እሺ በለኝ ይቅርብኝ ትላለች...

አንድ አይነት ናፍቆት የላቸው
አንድ አይነት ስጋት አይሰጉም

"... የኔ ማር ወለላ
አልመኝም ካንቺ ሌላ
ፍፁም ልጅ ነሽ አንቺ
መቼም የማትሰለቺ..."

ይህን ፊቱ እያበራ አይኗን እያየ ነው ያዜመው


"... ይሄን ዘፈን ትወደዋለህ..."
"... ህመሙ ደስ ይለኛል...መለየትን ታመመው... አያምርም?..."

" ማጣት ትፈራለህ?"
"... አያስፈራም?”
ጥያቄዋን በጥያቄ መለሰው...
አይኖቿን መለሰች...

መለያያቸው ደርሶ ሊሰናበታት ነው...
ዛሬን ልታልፍ አልፈለገችም... " የውሸት ከማግኘት የእውነት ማጣት አይሻልም?”
ያልጠበቀው ጥያቄ ነው... አይኖቿ ውስጥ ማብራሪያ ይፈልጋል... ልቡ ውስጥ ያለውን ናፍቆት አይኗ ላይ አላገኘም... አልተግባቡም... ጥያቄዋ ለርሱ ይሁን ለራሷ ግልፅ አልሆነላትም... ዳግም እንደማታገኘው ያህል ተሰናበተች...



              |ዘካሪያስ|

    °•.• @yenie_kal •.•°
          @yenie_kal
       ○○○○○○○

(... ሴት እርግ ነች... ኮረዳነቷ ያስታውቃል... ከላባዋ ስር የፋፋ ሙቅ ገላ እንዳለ ያስታውቃል... ካለሁበት በግምት አስር ሜትር ርቀት ላይ ለኔ የማይታየኝን ነገር ትለቅማለች...)

... ቀበጥ ገላ አላት ... ልቧ ለሚያንቋልጥላት የሚሞት... ገና የጡቶቿን ማደግ እንዳስተዋለች ኮረዳ ምትሽኮረመም... ቃል ከላንቃ ሲነቃ ... ልቧ ፍርስ የሚልላት... ልጅነቷን ከንጋት ያሻገረች ናት... ከእኔ ጋር...

(... የደረቷ ላይ ላባ እንደንጋት ሰማይ ያለ ነው... የገደል ማሚቱ ብምታስተጋባው የምሽትት ፀሃይ ብርሃን አያታለው... ከግቢው አጥር ማዶ ወንዙን ተሻግሮ ካለ እድሜዬን ሙሉ ከማውቀው የዋንዛ ዛፍ ላይ መሰሎቿ አሉ...)

... በደከመ ልብ አያታለው... ልማዳዊ ቃሎቼ ፈቃዴን ሳይጠብቁ ይመልሱላታል... ምን አጣውባት እላለው... በፍቅር የሚያዩአት አይኖቼ ህፀፅዋን ያስሳሉ... ምናልባት ብቻዋን ነው ምታምረው...

(... ሌላ ሴት ርግብ ከዛፉ ላይ ወረደች ... የአንድ እግሯ ሁልርት ጣቶች ተቆርጠዋል... ምናልባት ቆርቆሮ አጥር ይሆናል... ስትራመድ ታነክሳለች... እንደዛችኛዋ የ እርግብ ነፍስ ያለባት አትመስልም... )

... መንፈሴ ሞቷል... በድኔን ሰብስቤ ልጠፋ አስባለው... ከሳቋ ጋር ሚነቃ ነፍስ አልተረፈኝም... ለልቧ ሃገር ባዳ ነኝ...

(ቀስ ብቀስ በዛ ያሉ ርግቦች እፊቴ ያለውን ረባዳ ሞሉት... ዝምታ ሆነ... በጥሬ ለቀማ ቦታው በሚነሳ የድንብር ግጭት... ባሌን አማለልሽብኝ በሚል ከሚገለማመጡ ሴት ርግቦች... የወንዙ ድምፅ ... የዛፉ ቀጠል... ሁሉም ድምፃቸው ዝምታ ነው... የተቐመጥኩበት ድንጋይ ሳይቀር መኖሬን ረስቷል...)


... ላንቺ የቀረ መውደድ የለኝም...  በልቤ አልኩ... እውነትነቱ አስፈራኝ... ይአፈራሁት እውነት መሆኑን ይሁን ውሸታም መሆኔን እርግጠኛ አይደለሁም...

("... አንተ አቢ ና ተቀበለኝ እቃ ይዣለው..." እናቴናት... የከፈተችውን የውጭውን በር በቁሟ ለቀቀችው... የግቢው ሰላም ከመቅፅበት ጠፋ... እርግቦቹ ክንፌ አውጪኝ ተበታተኑ... )


... ካንገቷ ስር  የሚወጣው ጠረን አዲስነቱ ጠፍቷል... የአካሏ መለስለስ ደሜን ማሞቅ ትቷል... ስታቅፈኝ አይኗን ጨፍና ነው... ሳቅፋት መልኳን እያየሁ ነበር... የምታነበንበውን ስትጨርስ ... በሃሳቤ አንካሳውን እርግብ እያየሁ "እኔም" ...



              |ዘካሪያስ|

    °•.• @yenie_kal •.•°
          @yenie_kal
       ○○○○○○○