ነገረ መፃህፍት 📚📗📓📖

ታኅሳስ በታሪክ ውስጥ
ታኀሳስ 4 1953 ዓ.ም. በአገራችን ተሞክረው ከከሸፉት መፈንቅለ መንግሥቶች ዋነኛው ተሞከረበት ቀን ነው፡፡ የመፈንቅለ መንግሥቱ ዋና ተዋናዮች ወንድማማቾቹ ጄኔራል መንግሥቱ ነዋይ የክብር ዘበኛ አዛዥና ገርማሜ ነዋይ እንዲሁም የፀጥታው ዘርፍ ኃላፊ ሌ/ኮሎኔል ወርቅነህ ገበየሁ ናቸው፡፡ መፈንቅለ መንግሥቱ በዚህ ቀን ለመደረግ ይወሰን እንጂ በነዚህ ሰዎች አእምሮ ለብዙ ጊዜያት ሲብላላ ቆይቷል፡፡ ከእነሱ በተጨማሪም አብዛኛው የተማረውና ወጣቱ ክፍል የለውጥ ፈላጊ ስለነበር በየትኛውም መንገድ ለውጥ እንዲመጣ ይመኛል፡፡ ታኅሳስ 4 የጃንሆይን ወደ ብራዚል ለጉብኝት መሄድን ተከትሎ መፈንቅለ መንግሥቱን ለማድረግ ተወሰነ፡፡ የታሪኩ አመጣጥ ረጅምና ተደጋግሞም በሚዲያ ስለተነገረ ለዛሬ ለማሳየት የፈለኩት ለምን ከሸፈ የሚለውን ነው፡፡
በኔ ሐሳብ መፈንቅለ መንግሥቱ የከሸፈበት አንዱ ምክንያት ጠንሳሾቹ ከራሳቸው ውጪ ማንንም ማመን ስላልቻሉ ሊያግዟቸው የሚችሉ ሰዎችን ስላላማከሩ በቂ ድጋፍ አላገኙም፡፡ ይህ የሆነው ከነሱ ብቃት ማነስ ብቻ ሳይሆን የጃንሆይ አገዛዝ ከፋፍሎ በመግዛት ላይ የተመሰረተ ስለሆነ ማንም ማንንም እንደዚህ የከበደ ነገር ለመንገር አያምንም፡፡ ሁለተኛው ምክንያት ክብር ዘበኛው ከሌላው ሠራዊት የተነጠለ ስለነበር በክብር ዘበኛው የሚቀርብን ማንኛውንም ሐሳብ ሌላው ሠራዊት በቀላሉ አይቀበልም፡፡ ሦስተኛውና ዋነኛው አብዛኛው የአገሪቱ ሕዝብ የሚቀበላት የኢትዮጵያ ኦርቶዶክስ ተዋህዶ ቤተ ክርስቲያን መፈንቅለ መንግሥቱን ባለመደገፏና ይንንም የሚገልፅ በራሪ ወረቀት በአውሮፕላን በመበተኑ ምክንያት ለመደገፍ የመጣው የክብር ዘበኛ ሠራዊት አባላት ጭምር ሸሹ፡፡ መፍንቅለ መንግሥቱም በቁጥጥር ስር ውሎ ንጉሠ ነገሥቱ ወደ መናገሻ ከተማቸው ተመለሱ፡፡ የመፈንቅለ መንግሥቱ ተዋናዮችም ገርማሜና ሌ/ኮሎኔል ወርቅነህ ራሳቸውን ሲያጠፉ ጄኔራል መንግሥቱ ተይዘው ሞት ተፈረደባቸው፡፡ የታሪኩን ዝርዝር ለማወቅ የሚፈልግ ሰው የአቶ ብርሃኑ አስረስን “ማን ይናገር የነበረ… የታኅሳስ ግርግርና መዘዙ” የሚለውን መጽሐፍ እንዲያነብ እመክራለሁ፡፡
ይህ የመፈንቅለ መንግስት ሙከራ በታሪካችን ትልቅ ምዕራፍ የከፈተ ነው፡፡ ምክንያቱም ንጉሠ ነገሥቱ ከሥልጣን መወገድ እንደሚችሉ ለሕዝቡ ያሳየ ነው፡፡ ለንጉሠ ነገሥቱ መንግሥትም ቢሆን ከፍተኛ ባለሥልጣኖቻቸውን ያሳጣ ሆኗል፡፡ ከተገደሉት ውስጥ አንዱ አቶ መኮንን ሀብተወልድ ሲሆኑ ለጃንሆይ ታማኝ ሆነው ከጸሀፌ ትዕዛዝ ወልደጊዮርጊስ ወልደዮሐንስ ጋር ለረጅም አመታት አገልግለዋል፡፡ በጸሐፌ ትዕዛዙ መነሳት አንድ እግሩን አጥቶ ሲያነክስ የነበረው የአፄ ኃይለሥላሴ መንግሥት በአቶ መኮንን ሞት ሌላኛውን እግሩን አጣ፡፡ ከዚያ በኋላ ተቀያሪ እግሮች አግኝቶ መቆም ሳይችል እንደዳኸ ለውድቀት በቃ፡፡ ይህ መፈንቅለ መንግሥት ተሳክቶ ቢሆን ለአገራችንም ሆነ ለንጉሣዊው ቤተሰብ ከ1966ቱ ለውጥ የተሻለ ውጤት ያስገኝ ነበር ብዬ አስባለሁ። እናንተስ ምን ይመስላችኋል?

ማርክ ዙከርበርግ የናጠጠ ቢሊየነር ነው። ሚስቱን ለማስደሰት ማንኛውንም በአለም ላይ ውድ የሆነ ቁስ ሊገዛላት ይችላል—ጌጣጌጦች፣ ቤት፣ መኪና፣ አውሮፕላን፣ የመዝናኛ መርከብ yacht ወዘተ። አንድ ደሴት ወይም ትንሽ ሀገር የሚገዛ ገንዘብ ያለው ሰው ነው። ገንዘብ ሊገዛው የሚችለውን ነገር ሁሉ በስጦታ ሊሰጣት ይችላል።

ማርክ ግን ገንዘብ የሚገዛውን ትቶ ገንዘብ የማይገዛውን ሰጣት። ምን ይሆን ገንዘብ የማይገዛው?! የማርክ ሚስት ፕሪሲላ ቻን ትባላለች። በትውልዷ ቻይናዊ ናት። በላቧ ሰርታ የምታድር ሜዲካል ዶክተር ነች። ደግሞ በባህሪዋም ገንዘብ የሚያስደንቃት፣ ግድ የሚሰጣት ሴት አይደለችም።

ታዲያ ለዚህች ሴት ማርክ ምን ይስጣት? ማርክ ለሚስቱ ሳይነግራት የቋንቋ ትምህርት ቤት ተመዘገበ። ለአመታት ማንዳሪን አጠና። በነገራችን ላይ ማንዳሪን ለመማር በጣም ከባድ ቋንቋ ነው። አይደለም በሁለተኛ እና ሶስተኛ ቋንቋነት አፈ ለፈቱበትም ዳገት ነው። በተለይ ጽሁፉ።

አንዴ ስለ ማንዳሪን ሳነብ ከ48 ሺ በላይ ካራክተርስ አሉት ይላል። መሰረታዊ ጽሁፍ ለማወቅ ቢያንስ 3ሺ ካራክተር ማወቅ ይገባል። ምእራባውያን የለመዱት 26 የላቲን ፊደል ነው። ማንዳሪንን ተዉትና የኛ ቋንቋ 231 ፊደላት እንዳለው ሲያውቁ ልባቸው በድንጋጤ ቀጥ ነው የምትለው። አማርኛ ራሱ ለመማር ቀላል ቋንቋ አይደለም። ማንዳሪን የበለጠ ከባድ ነው። ብዙ ትጋት ይጠይቃል።

ማርክ ራሱ ቋንቋውን በደንብ ለመካን ብዙ አመት ወስዶበታል። ያውም እሱ ከፍተኛ የአእምሮ ብቃት ስላለው ነው እንጂ ቋንቋው የሊማሊሞ ዳገት ነው። ታዲያ ማርክ በማንዳሪን ሲካን ለሚስቱ በመጀመሪያ እንዲህ ነበር ያላት፦

"我爱汝"

ትርጉሙ "አፈቅርሻለሁ" ነው።

ከዚህ የሚበልጥ ምን ስጦታ አለ?! በገንዘብ የማይተመን ዋጋ የማይወጣለት ውድ ስጦታ።

ፍቅርና ቋንቋ። ቋንቋና ፍቅር። ፍቅር በቋንቋ ይገለጻል። እስኪ አንዳችን የሌሎቻችንን ቋንቋ በፍቅር እንማር። ፍቅራችንን እንገላለጽ። ቋንቋዎቻችን የፍቅር ድልድይ እንጂ የልዩነት ግድግዳ አይሁኑብን።

እወዳችኋለሁ!❤❤
Anii sin jaalladha!❤❤
የፍቅረኪ እየ!❤❤

@ Tewodros shiwangizaw