ዕውቀት እና የዕውቀት ባለቤቶች ደረጃ ክፍል ሶስት
ስለእውቀት ትሩፋት ከነብዩ ﷺ የመጡ በርካታ ሐዲሶች አሉ፡፡
ከነርሱ መካከል የሚከተለው ሐዲስ ይገኝበታል፡-
"من سلك طريقا يلتمس فيه علما ، سهل الله له به طريقا إلى الجنة" أخرجه مسلم في صحيحه
“እውቀት ለመፈለግ መንገድን የተጓዘ ፤ ወደጀነት የሚወስደውን መንገድ አላህ ያገራለታል፡፡”(ሐዲሱን ሙስሊም ዘግበውታል) ይህ የረሱል ﷺ ሐዲስ የሚጠቁመን ሸሪዓዊ እውቀት ፈላጊዎች ከእሳት ነጻ በሚሆኑበት መልካም ጎዳና ውስጥ እንደሆኑ ነው ፤
ሸሪዓዊ እውቀት ፈላጊዎች ይህን መልካም እና ታላቅ ደረጃ የሚያገኙት ፣ እውቀትን ለመፈለግ ሲንቀሳቀሱ ኒያቸው ተስተካክሎ ሲገኝ ብቻ ነው ፤ የአላህን ውዴታ ፈልገው ሲንቀሳቀሱ ፤ በእውቀታቸው ተጠቅመው ፣ ህብረተሰብን ለመጥቀም አላማ ሲያደርጉ ብቻ ነው።
አንድ የእውቀት ፈላጊ የሸሪዓ እውቀትን ሲማር አላማው ለይዩልኝ እና ለይስሙልኝ ወይም ዱንያዊ ጥቅሞችን በእርሱ ፈልጎ ሳይሆን ፣ ዲንን ለማወቅ ፣ አላህ ግዴታ ያደረገበትን ተገንዝቦ ተግባራዊ ለማድረግ ፣ ክልክሉን ለመከልከል ፣ ሰዎችን ከጨለማዎች አውጥቶ ወደ ብርሀን ለማስገባት መሆን አለበት፤
መጀመሪያ ማወቅ ፣ ከዚያም ባወቀው መስራትና ሌሎችን ማስተማር እያንዳንዱ ሙስሊም የታዘዘበት ነው ፤
ወደ ጀነት የሚወስደው የሸሪዓዊ እውቀት የሚገኝባቸው መንገዶች የተለያዩ ናቸው። 1ኛ :- ከአገር አገር በመንቀሳቀስ ፤
2ኛ :- አንድ የኢልም ማዕድን ሲያጠናቅቅ ወደ ሌላ የኢልም ማዕድ በመሸጋገር ፣ ለምሳሌ : ኡሱል አስሰላሳ ቀርቶ ሲጨርስ ወደኪታቡ ተውሂድ ፤ ኪታቡ ተውሂድን ሲያጠናቅቅ ወደ አቂደቱል ዋሲጢያ መሸጋገር፣
3ኛ :-ወደ አሏህ መቃረቢያ እውቀትን ለመፈለግ ከአንድ መስጊድ ወደሌላው መስጊድ የሚያደርገው እንቅስቃሴም እንዲሁ ፤
ይህ ሁሉ ኒያው ከተስተካከለ የተነባበረ ምንዳ እንዲሁም የአሏህን ውዴታ የሚያገኝበት ጉዞና እንቅስቃሴ ይሆናል።
4ኛ :- በተመሳሳይ በዲን ፣ በሱና ዙሪያ እርስ በርሳችን የምናደርገው መተዋወስ ፤ ተማሪዎች ቁርአንን ሐዲስን ለመሀፈዝ በገንዘብ በጉልበት በጊዜ የሚያደርጉት ጥረትና ልፋት በዚህ ውስጥ የሚካተት ነው ፤
የሸሪዓ እውቀት ፈላጊ : ማስረጃን መሰረት አድርጎ አላህ በእርሱ ላይ ግዴታ ያደረገበትን ከተገነዘበ በኋላ ሌላውንም ማህበረሰብ የማንቃትና አቅጣጫ የመስጠት ሀላፊነት አለበት፤
ሸሪዓዊ እውቀት ፈላጊ ፣ ወደትክክለኛው መንገድ መሪ ፣ የሀቅ ረዳት ፣ በእውቀት ላይ ተንተርሶ ወደአላህ ተጣሪ መሆን አለበት፡፡
ኒያቸው መጥፎ በሆኑ ሰዎች ተቃራኒ ፣ በመልካም ኒያ ላይ ሆኖ የሚንቀሳቀስ ከሆነ በስኬት አለም ውስጥ መሆኑን ሊገነዘብ ይገባል ፣
ሸሪዓዊ እውቀት ፈላጊ : ኒያው ከተስተካከለ ሌሊት ቁርአንን ለመሀፈዝ ወይም ሙራጀአ ለማድረግ እንዲያግዘኝ ብሎ ቀን ላይ ቀይሉላ ቢተኛ እንኳ ፣ እንቅልፉ በራሱ ወደ ኢባዳ የሚቀየርለት መሆኑን መገንዘብ አለበት፤
ኒያው መጥፎ የሆነ ሰው በታላቅ አደጋ ላይ ነው፤ ይህን አስመልክቶ የሚከተለው የረሱል ﷺ ሐዲስ መጧል፡
"من تعلم علما مما يبتغى به وجه الله ، لا يتعلمه إلا ليصيب به عرضا من الدنيا لم يجد عرف الجنة يوم القيامة"رواه أبو داود بإسناد جيد “የአላህ ፊት የሚፈለግበት የሆነውን እውቀት ከዱንያ ጥቅሞች ለመፈለግ ብሎ የተማረ የቂያማ ቀን የጀነትን ሽታ አያገኝም፡፡” የዲንን እውቀት በመጥፎ ኒያ የተማረ በረሱል ﷺ ሐዲስ ከባድ ዛቻ ተዝቶበታል፤
وروى عنه صلى الله عليه وسلم ، أنه قال: "من تعلم العلم ليجاري به العلماء أو ليماري به السفهاء، أو ليصرف به وجوه الناس إليه، أدخله الله النار" رواه الترمذي “ኡለማን ለመፎካከር ፣ ቂሎችን ለመከራከር ወይም የሰዎችን ፊት ለማዞር ብሎ ኢልም የተማረ አሏህ እሳት ያስገባዋል።”ሐዲሱን ቲርሚዚይ ዘግቦታል ሸሪዓዊ እውቀት የአሏህን ፈጣሪነት ፣ ብቸኛ ተመላኪነቱንና የእርሱን ባህሪያት ለመገንዘብ መዳረሻ ነው ፤ ታዲያ ይህን መዳረሻ ስንፈልግ የቅርቢቱን ሂዎት ጥቅም አላማ አድርገን መሆን የለበትም።
በትክክለኛ ሐዲስ ነብያችን ﷺ የሚከተለውን ተናግረዋል፡-
"أن أول من تسعر بهم النار ثلاثة : منهم الذي طلب العلم ، وقرأ القرآن لغير الله ، ليقال : هو عالم وليقال له : قاريء"
"በእሳት የመጀመሪያ ማቀጣጠያ የሚሆኑት ሶስት (ሰዎች) ናቸው : ከእነርሱ መካከል እርሱ 'አሊም ነው' ፤ ''ቃሪእ ነው'' እንዲባል ከአላህ ውጭ እውቀትን የፈለገ..."ስለዚህ ኒያችንን ፍጹም ለአላህ በማድረግ ለኢልም ፍላጎቱ እና ትእግስቱ ሊኖረን ፣ ከዚያም እውቀት በሚያዘን ለመስራት እራሳችንን ማዘጋጀት አለብን ፤
የዲን እውቀት አላማው ሰርተፊኬት ይዞ 'እኔ ማስተር ነኝ' ፣ 'እኔ ዶክተር ነኝ' በማለት ለመኮፈስ ሳይሆን አውቆ ወደተግባር ለመቀየር ነው ፤
የዲን እውቀት አላማው ባወቅነው ለመስራት ፤ ሰዎችን ወደ ተውሂድ ፣ ወደ ሱና በመጣራት የሩሱሎች ምትክ ለመሆን ነው፤
የአላህ መልክተኛ ﷺ በሚከተለው ትክክለኛ ሐዲሳቸው እንዲህ ብለዋል፡
"من يرد الله به خيرا يفقهه في الدين" متفق على صحته.
“አለህ መልካም ነገር የፈለገለት ሰው የዲንን ትምህርት እንዲገነዘብ ያደርገዋል፡፡” ይህ ሐዲስ የዲን እውቀት ያለውን ደረጃ እና ትሩፋት ፤ የመልካም እድለኝነት እና የተውፊቅ ምልክት መሆኑን ነው የሚጠቁመው፡፡
አላህ መልካምን ለባሪያው የፈለገለት ጊዜ ሀቁን ከውሸቱ ፣ ሱናውን ከቢድዓ ፣ ተውሂድን ከሽርክ ፣ ሙእሚኑን ከሙጅሪሙ ፣ ሰለፍዩን ከሙብተዲዑ የሚለይበት ግንዛቤን ይለግሰዋል ፤
እውቀትን መሰረት አድርገው አላህን በብቸኛነት የተገዙ ባሮች ፍጻሜ በጀነት የአላህን ፊት መመልከት ፣ በጀነት ውስጥ በተለያዩ ጸጋዎች መቀማጠል ነው ፤
በአንጻሩ የአላህ ጠላቶች ፍጻሜ የአላህን ፊት ከመመልከት መጋረድ ፣ አቃጣይ በሆነችው የጀሀነም እሳት ለዘላለም መቀጣት ነው ፤
በዚህም የኢልምን ልቅና እና ክብር እንገነዘባለን፤ ከሁሉም ነገር በላጩ የሸሪዓ እውቀትን መማር ነው፤ ምክንያቱም በኢልም የግዴታዎችን ሁሉ ዋና ግዴታ እናውቃለን እርሱም የአላህ ተውሂድ ነው ፤ በኢልም አላህን ከሽርክ አጽድተን እናመልካለን ፤ በኢልም ወደ አላህ ለመቃረብ የሚያግዙ የአምልኮ ዘርፎችን ጠንቅቀን እናውቃለን፣
በመጨረሻም : የጀነት መግቢያ ፣ ወደአላህ መቃረቢያ ፣ ከጀሀነም እሳት መሸሻ፣ ከአላህ ጠላቶች መራቂያ መንገዶች ሁሉ ሊታወቁ አይችሉም ፣ በሸሪዓዊ እውቀት እንጅ ፤
https://t.me/alateriqilhaqكن على بصيرة
