ኦርቶዶክሳዊ አእምሮ

+ ከአሸናፈዎች እንበልጣለን +

ቅዱስ ጳውሎስ ኃጢአታችንን በደሙ ባጠበልን በእርሱ በተሰቀለው በልዑል ክርስቶስ ከአሸናፈዎች እንበልጣለን አለ ። እነርሱ የማይሰሩትን ስራ እኛ እንሰራለን ። ብዙ ታላላቅ ጦር ሜዳ ድል ያደረጉ ጀኔራሎች ( ታላላቅ የጦር ሰዎች ) ልባችንን ማሸነፍ አይችሉም ። ይኸው በቅዱስ ጊዮርጊስ ታውቋል። አንዱን ወጣት የሃይማኖት ገበሬ ቅዱስ ጊዮርጊስን ሰባው ነገስታት ከነሰራዊቶቻቸው ሊያሸንፍት አልቻሉምና ። እርሱ ድል አደረጋቸው እንጂ ፤ በእርሱ ጸሎት ሁሉንም እሳት በላቸው ፣ እርሱ ግን ማንም ድል ሊያደርገው ሊያሸንፈው አልቻለም ። ብዙ መከራ ቢያጸኑበትም ፤ ስጋውን አቃጥለው አመድ አድረገው ቢበትኑበትም ቅሉ ፤ ሃይማኖቱ አስነሳው ። መድኃኔ ዓለም ተገልጦ "ወዳጄ ጊዮርጊስ ሆይ ተነስ " አለው። ቅዱስ ጊዮርጊስ  ድል ያደረገው በወደደው በኢየሱስ ክርስቶስ ኃይል ነው ። ጠላቶቹ ገደልነው ፣ አሸነፍነው ፣ ቆራረጥነው ፣ በተንነው ፣ ጠብስነው ፣ አቃጠልነው ፣ ሲሉ በወደደው በፈጣሪው በኢየሱስ ኃይል ከሙታን ብድግ ይልና ፤ ከጫጉላ ቤት እንደ ወጣ ሰው ታድሶ ፣ ለምልሞ እንደገና ሄዶ ይገጥማቸዋል ። ሶስት ጊዜ ገደሉት ሶስት ጊዜ ተነሳ ፣ በአራተኛው በእግዚአብሔር ፍቃድ ነብሱ ከስጋው ተለየች ። ነገር ግን መጀመርያ አነርሱን አጥፋቶ ነው ፤ እሳት ከሰማይ ወርዶ ጠላቶቹን አጥፍቶ  ሲያበቃ በሰይፍ ተሰየፈ ፤ ከአንገቱም ደም ፣ ውኃ ፣ ወተት ፈሰሰ። (ገድለ ጊዮርጊስ ) ስለዚህ በወደደን በእርሱ በኃያሉ በእግዚአብሔር ልጅ በኢየሱስ ክርስቶስ ከአሸናፈዎች እንበልጣለን ።

ብርሃነ ዓለም ቅዱስ ጳውሎስ በዕብራውያን መልእክቱ (በሃይማኖት የሚሰራ ታላላቅ ስራ) እንዳለ ነግሮናል ። እንግዲህ ምን እላለሁ ? ስለ ጌዴዎን ስለ ባርቅ ስለ ሶምሶን ስለ ዮፍታሔም ስለ ዳዊትና ስለ ሳሙኤልም ስለ ነብያትም እንዳልተርክ ጊዜ ያጥርብኛል ። እነርሱ በእምነት መንግስታትን ድል ነሱ።" ዕብ 11:32:33 (ኦርቶዶክስያ ገጽ -94 የመ/ር  ግርማ ከበደ  ትምህርታዊ ስብከቶች ስብስብ )


#ኦርቶዶክሳዊ_አእምሮ

ጾመ ነብያት ነገ እሑድ ኅዳር 15 ይገባል ።

ነቢያት ጌታ "ይወርዳል ይወለዳል" ብለው የተናገሩት ትንቢት እንዲፈጸም ተመኝተው ጾሙ ጸለዩ:: እኛ ስለምን እንጾማለን? ክርስቶስ ተወልዶ ፣ ተጠምቆ ፣ አስተምሮ ፣ ተሰቅሎ ፣ ሞቶ ፣ ተነሥቶ ፣ ዐርጎ ፣ በአባቱ ቀኝ አይደለምን? አሁን ለምን እንጾማለን? ብለን እናስባለን::

ጌታ በእኔና አንተ ልብ ውስጥ እውነት ተወልዶአልን? እውነት የእኛ ልብ እንደ ቤተልሔም ግርግም ለክርስቶስ ማደሪያ ሆኖአል? ማደሪያ አሳጥተን ከእናቱ ጋር አልመለስነውም?

የጥምቀቱ ትሕትና በእኛ ልብ መቼ ደረሰ? የስቅለቱ ሕማም መች በእኛ ሕሊና ተጻፈ? የትንሣኤው ተስፋ የዕርገቱ ልዕልና በእኛ ልቡና መቼ ዐረፈ?

ስለዚህ ነቢያት "ውረድ ተወለድ" ብለው የጾሙትን ጾም እንጾማለን:: ጌታ ሆይ በእኔ ሕይወትም ውስጥ ውረድ ተወለድ የእኔን ሰውነት ማደሪያህ አድርገው:: ሕዋሳቶቼ ከኃጢአት አርፈው እንደ ቤተልሔም ግርግም ማደሪያህ ይሁኑ::

(ዲያቆን ኄኖክ ኃይሌ )

#ኦርቶዶክሳዊ_አእምሮ

እህታችን Sofia Shibabaw አንድ ኦርቶዶክሳዊ ወንድም መጽሐፍ ቅዱስ ታነባለህ ወይ ብላ ስትጠይቀው መዝሙረ ዳዊት ነው በየቀኑ የማነበው በማለቱ በእጅጉ ተገርማ የምትናገርበትን አንድ ውይይት ተመለከትሁ። በዚሁ ውይይት መዝሙረ ዳዊት የብሉይ ኪዳን መጽሐፍ መሆኑን ጠቅሳ ዋናው አዲስ ኪዳን ነው ብላ የሰውዬውን ልማድ በመገረም ተችታ ታልፋለች። በርግጥ ንግግሯ ከመቆርቆር ይመስለኛል።

እህታችን ክርስቲያን መጽሐፍ ቅዱስን (በተለይም አዲስ ኪዳንን) ማንበብ እና መረዳት አለበት ማለቷ ትክክል እና የሚደገፍ ነው፤ ቤተ ክርስቲያንም በየቅዳሴው እና የማኅበር ጸሎቶቿ ሁሉ ዘወትር የአዲስ ኪዳን መጻሕፍት እንዲነበቡ ሥርዓት ሠርታለች። ባይሆን እኛ ራሳችን እንደፈቀድን እንተርጉመው የሚለው ፕሮቴስታንታዊ መርሕ ብዙ ጣጣ ያለው ስለሆነ አንቀበለውም።

ነገር ግን ስለ መዝሙረ ዳዊት ያላትን አመለካከት ማስተካከል ያለባት ይመስለኛል። መዝሙረ ዳዊት ከጥንት ቤተ ክርስቲያን ጀምሮ ትልቅ ቦታ ያለው እና ለጸሎት እና ለትምህርት ትልቅ ቦታ የተሰጠው መጽሐፍ ነው። ጌታችንም ሐዋርያትም የጸለዩበት መጽሐፍ ነው። መዝሙረ ዳዊት ብሉይ እና አዲስ ኪዳንን አጠቃልሎ የያዘ ልዩ መጽሐፍ ነው። ይህ መጽሐፍ ንስሐን፣ ተአምኖን፣ ምሥጋናን፣ ልመናን፣ ትምህርትን፣ ተግሳጽን እና ሌሎች ዋና ዋና ጉዳዮችን የያዘ ነው። የመጽሐፍ ቅዱስ ጉዳዮችን ሁሉ አጠቃልሎ የያዘ መጽሐፍ ነው። መጽሐፍ ቅዱስን በቀላሉ ማግኘት ወይም ቢገኝም ማንበብ በማይቻልበት ጊዜ መዝሙረ ዳዊትን ማንበብ እና ማሰላሰል (meditation) መጽሐፍ ቅዱስን ሁሉ እንደማንበብ የሚያገልገል ነው።
በዚህ ነገር የተሐድሶ መሪው ሉተርም ሳይቀር ይደግፈናል፦

"[The Psalter] might well be called a little Bible. In it is comprehended most beautifully and briefly everything that is in the entire Bible. It is really a fine enchiridion or handbook. In fact, I have a notion that the Holy Spirit wanted to take the trouble himself to compile a short Bible and book of examples of all Christendom or all saints, so that anyone who could not read the whole Bible would here have anyway almost an entire summary of it, comprised in one little book."
(Luther‘s Works 35:254).


(በረከት አዝመራው)

#ኦርቶዶክሳዊ_አእምሮ

ታላቅ መንፈሳዊ ጉባኤ በአዳማ ከተማ ላይ

ቮይስ ቻት ላይ ገብታችሁ ተከታተሉ🥰

ኅዳር 12

~ ለውጦ ማክበር ~

ንግሥት ክሌዎፓትራ "ሳተርን" ለሚባል ጣዖት ያሠራችው ቤት በእስክንድርያ ነበር። ይህ ቤተ ጣዖት እስከ እለ እስክንድሮስ ፓትርያርክ ዘመን 212-326 ድረስ ነበር። እለእስክንድሮስም ሊያጠፋ ሲነሣ በሕዝቡ ልቡና ገና አምልኮ ጣዖት ስላልጠፋላቸው 18 ፓትርያሪኮች ያልነኩትን አንተ ለምን ታፈርስብናለህ ብለው ተቃወሙት። እለእስክንድሮስም ሕዝቡን መክሮና አስተምሮ የሳተርን በዓል ይውልበት የነበረበትን ዕለት ወደ ቅዱስ ሚካኤል የበዓል ዕለት አደረገው። (ስንክ ሳር ኅዳር 12፣ Coptic Encyclopedia, Vi S.p 1617)።

ከእምልኮ ጣዖት ወደ አምልኮተ እግዚአብሔር የእስክንድርያ ሰዎች በእለ እስክንድሮስ በኩል እየበረሩ ገቡ። የጣዖት መክበሪያ የነበረው በእለ እስክንድሮስ ጸሎት የቅዱስ ሚካኤል መክበሪያ የእግዚአብሔር መመስገኛ ኾነ። ይህን ቤተ ጣዖት ሳስብ ምናልባት በኃጢአታችን ምክንያት የእኛን ሰውነት የሚወክል ይኾን እላለሁ። ብዙዎቻችን የእግዚአብሔር መቅደስ የኾነውን ሰውነታችንን የአጋንንት መርኪያ ቤተ ዘፈን አድርገነዋልና።

የሰው ልቡና የእግዚአብሔር ቤተ መንግሥት ነው። ኾኖም ሰዎች ሰውነታቸውን እያረከሱና ከእግዚአብሔር ፍቅር እየራቁ ሲሄዱ የአጋንንት መኖሪያ ሊያደርጉት ይችላሉ። በመኾኑም የሕይወታችን ዋና ጉዳይ መኾን ያለበት መቅደስ ሰውነታችንን መጠበቅ ነው። በእለእስክንድሮስ አምሳል በቅድስት ቤተ ክርስቲያን ውስጥ ለአገልግሎት የሚፋጠኑ ካህናትን በቅዱስ መስቀል ባርከው እንዲያነጹን መቅረብ ነው። ዝሙት የተባለ ጣዖት በልቡናችን ውስጥ የያዘውን ቦታ በካህናት ፊት ተናዘን እንድንነጻ የሚያደርገውን የንስሐን ቀኖና መቀበል ነው። ሕይወታችንን እያዛጉ ያሉትን ማናቸውንም ባዕድ የኾኑ ነገሮች በልቡናችን ውስጥ ሥር እንዳይዙ መጠንቀቅ ነው።

በእርጥም እኛ ፈቃዳችንን ለእለእስክንድሮሳዊ ፈቃድ ካስገዛን ሰውነታችን የቅዱሳን መላእክት በዓል መክበሪያ ወደ መኾን ይታደሳል። ቅዳሴ፣ ማኅሌትና ልዩ አገልግሎት ያለማቋረጥ የሚቀርብበት ንጹሕ መቅደስ ይኾናል። እንግዲያውስ ኹላችንም በሰውነታችን ውስጥ ቅዱስ ሚካኤልን እንፈልገው፤ በበዓልነት በእኛ ውስጥ እንዲከብር እንፍቀድ። ሰዎች የቅዱስ ሚካኤልን ያማረ የምልጃ ሽታ በእኛ ሰውነት ውስጥ እንዲያሸቱት እናድርግ! ወደ ቅዱስ ሚካኤላዊ የአገልግሎት ሕይወት ለመግባት እንመኝ፤ ደጋግመንም እንሻ!

( "ዲ/ን ዮሐንስ ጌታቸው" fb የተወሰደ ።)

እንኳን አደረሳችሁ!!


#ኦርቶዶክሳዊ_አእምሮ

+ ምጽዋት +

ምጽዋትን ለተቸገረ ወገኑ የሚሰጥ ሰው ለእግዚአብሔር መስጠቱ ነው ።

፦ ምጽዋት ለአምላክ የሚሰጥ ብድር ነው ።
፦ ምጽዋትን የሚመጸውት ለችግረኛ የሚራራ ሰው ለእግዚአብሔር ያበድራል በስጦታውም መጠን እግዚአብሔር ይከፍለዋል( ምሳ19፥17 ሲራ 29፥1)


ምጽዋት ብልህ ሰዎች በእግዚአብሔር ዘንድ የሚያስቀምጡት አደራ ነው ። ገንዘብ /ንብረትን/ በታመነ ሰው ዘንድ ማስቀመጥ /አደራ ማስጠበቅ / የተለመደ ነው። በፈለጉት ጊዜ የሚገኝ ስለሆነ ።

"ያላችሁን ሽጡ ሽጣችሁ ምጽዋት ስጡ የማያረጅ ከረጢት ለእናንተ አድርጉ የማያልቅ ድልብም በሰማይ ሌባ ከማይደርስበት ነቀዝ ፣ ብል ከማያበላሹበት ገንዘባችሁ ካለበት ልባችሁ በዚያ ይኖራል ። ሉቃ 12-32 ማቴ 6-19-21 እንዲል ማለት ነው ።

ምጽዋት ሰው ለሰው ያለው በጎ ፈቃድ የሚገለጥበት ክርስቲያናዊ የሥነ ምግባር ዘርፍ ነው ። በዚህ ዓለም ጥረት ከራሳቸው ተርፈው ለሌሎች ማካፈል ችግረኞችን መርዳት የሚቻላቸውን ብቻ ሳይሆን በመጠነኛ ኑሮ የሚተዳደሩ ደጋግ ሰዎች ያለንን ተመግበው ለሀብታችን ለዕውቀታችንና ጉልበታችን ሳስተን የምንኖር ከሆነ መንግሥተ ሰማያትን በምን እንወርሳለን ? ብለው ከሚበሉት ከሚጠጡት ከፍለው ይረዳሉ ይመጸውታሉ ። በኑሮአቸው በዝቅተኛነት የመስጠት ፈቃዳቸውን የልግስና ብልፅግናቸውን አያግደውም ። ከአቅማቸው የሚያልፍ እንኳ ቢሆን ጨክነው ያደርጉታል ። ፪ኛ ቆሮ ፰-፪ ።( ኪዳነ ጽድቅ ገጽ 96-97 )

#ኦርቶዶክሳዊ_አእምሮ

ማንም ተገርዞ ሳለ ተጠርቶ እንደሆነ ወደ አለመገረዝ አይመለስ ማንም ሳይገረዝ ተጠርቶ እንደ ሆነ አይገረዝ (1ኛ ቆሮንቶስ 7፥19-20) (ቁ.18) ፦ ሳይገረዝ አምኖ የተጠመቀ ክርስቲያን ሳንገረዝ መኖር ይችላል ። የአንድምታው ተርጓምያን ሐዋርያው ይህን አሳብ ያነሣበትን ምክንያት ሲገልጹ"ግዙር ቆላፍ አምነዋል ግዙር ቆላፍነትን ተመኝቶ ነበር ቆላፍም ግዙርነትን ተመኝቶ ነበር " ይላሉ ። ሐዋርያው ያለገረዘም ባለመገዘሩ ፣ የተገረዘም በመገዘሩ እንዲጸኑ ጽፎላቸዋል ።

መገረዝም ቢሆን አለመገዘርም ቢሆን ከንቱ ነው ። የእግዚአብሔርን ትእዛዝ መጠበቅ ነው እንጂ(ቁ.19) ፦ ገላ 5፥6፣6፥15 ያነጻጽሩ ። ሰውን የሚያጸድቀው የእግዚአብሔርን ሕግ መጠበቅ ነው እንጂ መገረዝ ወይም አለመገረዝ አያጸድቅም ።

እያንዳንዱ በተጠራበት መጠራት እንደዚሁ ይኑር(ቁ.20) ፦ ተገርዞ የተጠራ ተገርዞ ይኑር ። ሳይገረዝ የተጠራ ሳይገረዝ ይኑር ። ("የሐዋርያው የቅዱሰሰ ጻውሎስ መልእክታት ከሮሜ እስከ ገላትያ" መጋቤ ሐዲስ ስቡሕ ዳምጤ ገጽ-237)

#ኦርቶዶክሳዊ_አእምሮ

አህያና ግርዛት

አሁን ሐዲስ ኪዳን ነው:: መገረዝ ግዴታ አይደለም:: ዋናው ጥምቀት ነው:: ባንገረዝ ምንም አይጎድልብንም:: በዚህ ጉዳይ በመጀመሪያዋ ቤተ ክርስቲያን ውዝግብ ተነሣ:: አሕዛብ ሳይገረዙ ኖረዋልና ጸረ ግዝረት ሆኑ:: አይሁድ ደግሞ እንዴት ግዝረት እንተዋለን አሉ::

ወደ ክርስትና የተጠሩት እነዚህ ሁለት ወገኖች ሁለቱም ከራሳቸው አመጣጥ አንጻር እውነት አላቸው:: አሕዛብ የማያውቁትን ነገር መቀበል ሊገደዱ አይችሉም:: ክርስትናም አላስገደዳቸውም:: አይሁድ ደግሞ የኖሩበትን መተው አይችሉም:: ክርስትናም ግዝረትን ባይጠይቅም አልከለከለም::

በመጨረሻ በብዙ ምክር የሐዋርያት ቤተ ክርስቲያን አሕዛብንም ያላገለለ እስራኤልንም ያላቃለለ ውሳኔ ወሰነች:: ውሳኔውን በጥሩ ቃል በመልእክቱ ቅዱስ ጳውሎስ እንዲህ ሲል ገልጾታል::

"ማንም ተገርዞ ሳለ ተጠርቶ እንደ ሆነ፥ ወደ አለመገረዝ አይመለስ፤ ማንም ሳይገረዝ ተጠርቶ እንደ ሆነ አይገረዝ። ... እያንዳንዱ በተጠራበት መጠራት እንደዚሁ ይኑር" 1 ቆሮንቶስ 7:18፣ 20

በዚህ መሠረት ኦሪትን ተቀብለው ተገርዘው ወደ ክርስትና የተጠሩት እስራኤል በመገረዛቸው ይቀጥሉ እንጂ ወደ አለመገረዝ አይመለሱ ተባለላቸው:: ሳይገረዙ የተጠሩት አሕዛብ ግን መገረዝ የእነርሱ ልማድ አልነበረምና አይገረዙ ተባለ:: ይህ ለእስራኤል የተወሰነ ውሳኔም እንደ ኢትዮጵያ ኦሪትን ተቀብላ ለኖረችና ተገርዛ ሳለ የተጠራች (ሐውልቶችዋ ሳይቀር የተገረዘ ወንድን የሚያሳዩባት) ሀገርም ላይ ይጸናል::

ይህ ውሳኔ ለሁሉም እንደ ግዝረት ያሉ ሕግጋት ይሠራል::

"ማንም ተገርዞ ሳለ ተጠርቶ እንደ ሆነ፥ ወደ አለመገረዝ አይመለስ፤ ማንም ሳይገረዝ ተጠርቶ እንደ ሆነ አይገረዝ"

"ማንም አህያ እየበላ ተጠርቶ እንደ ሆነ አህያ ወዳለመብላት አይመለስ ፤ ማንም አህያ ሳይበላ ተጠርቶ እንደሆነም አህያ አይብላ"
(የአህያን ስም በአሳማ በአይጥ በውሻ ወዘተ እየቀየሩ ዐረፍተ ነገር ይሥሩ:: ሃሳቡ ያው ነው) ግዝረትም የማይበሉ ምግቦችም ከ613 የአይሁድ ሕግጋት (The 613 Mitzvot) ውስጥ ናቸው::

እስራኤል በግዝረት ቀጥሉ ሲባሉ ደስ አላቸው አሕዛብም አትገረዙ ሲባል ደስ አላቸው:: ለእስራኤል ሔደህ የአሕዛብን ዜና ብትነግራቸው ምንም እንኩዋን ግዝረት ግድ ባይሆንም ቅር ይላቸዋል:: የአህያ መበላት ዜናም የሚያስደስተው አህያን እንዴት ልንተው እንችላለን ብለው ለተጨነቁ አሕዛብ ብቻ እንጂ ለእኛ ሆድ የሚበጠብጥ ዜና ነው::

ከዚያ ውጪ እንደ ክርስቲያን ብሉ ብለን ልንሰብከው የሚገባን የሕይወት እንጀራ ሥጋ ወደሙ ብቻ ነው::

እያንዳንዱ በተጠራበት መጠራት ይኑር!

ዲ/ን ሄኖክ ኃይሌ
2017 ዓ.ም.
አዲስ አበባ ቄራ (የበሬ)

"ለሚሰሙት ጸጋን ይሰጥ ዘንድ፥ እንደሚያስፈልግ ለማነጽ የሚጠቅም ማናቸውም በጎ ቃል እንጂ ክፉ ቃል ከአፋችሁ ከቶ አይውጣ" ኤፌሶን 4:29

#ኦርቶዶክሳዊ_አእምሮ