ነገር ግን በዚህ መንገድ የትኛውም አመራር የመታሰር እድሉ ኢምንት ይመስላል። ባለፉት ሳምንታት በሩዋንዳ የሚደገፉት አማጺያን በማዕድን የበለጸገችውን ምስራቃዊ ዲሞክራቲክ ሪፐብሊን ኮንጎ ግዛትን ጨምሮ የክልሉን ሁለት ታላላቅ ከተሞች፣ ጎማ እና ቡካቩን የአገሪቱን ጦር በማሸነፍ መቆጣጠር ችለዋል።

በዚህም የተነሳ የአገሪቱ ፕሬዚዳንት ፌሊክስ ቲሺሴኪዲ ሩዋንዳ ለአማጽያኑ በምትሰጠው ድጋፍ ምክንያት ማዕቀብ እንዲጣልባት ዓለም አቀፍ ጫና ለመፍጠር እየሞከሩ ይገኛሉ። የተባበሩት መንግሥታት ድርጅት ባለሙያዎች ባለፈው የአውሮፓውያኑ ዓመት ባወጣው ሪፖርት፤ እስከ 4 ሺህ የሚደርሱ የሩዋንዳ ወታደሮች ከኤም23 ጋር ተሰልፈው በዲሞክራቲክ ኮንጎ ተሰማርተው ይገኛሉ፡፡

በዲሞክራቲክ ሪፐብሊክ ኮንጎ በተቀሰቀሰው ጦርነት በሺዎች የሚቆጠሩ ሰዎች ሲገደሉ፣ በመቶ ሺዎች የሚቆጠሩ ደግሞ ቀያቸውን ጥለው ሸሽተዋል።

ዲሞክራቲክ ሪፐብሊክ ኮንጎ ሞባይል ስልኮች እና ኮምፒውተሮች እንደ ግብዓቶች የሚጠቀሙባቸውን ወርቅ እና ኮልታን ጨምሮ የአገሪቱን ማዕድናት ለመቆጣጠር ሩዋንዳ እየሞከረች ነው ስትል ትከሳለች።

ኮንጎ አማጽያኑን ለመዋጋት ከአሜሪካ ወታደራዊ ድጋፍ ለማግኘት ስትል በምላሹ ማዕድኗን ለመስጠት ማቅረቧን አስመልክቶ የፕሬዚዳንቱ ቃል አቀባይ ቲና ሳልማ ምላሽ ሰጥተዋል።

"የአሜሪካ ኩባንያዎች መሰረታዊ የሚባሉ ጥሬ ማዕድናትን ከሩዋንዳ ይገዛሉ። እነዚህ ማዕድናት ከኮንጎ ተዘርፈው ወደ ሩዋንዳ በህገወጥ መንገድ የተዘዋወሩ ናቸው። እናም ፕሬዚዳንቱ ከዋናው ምንጩ (ባለቤቱ) ኮንጎ እንዲገዙ ነው ሃሳብ ያቀረቡት" ብለዋል።

ሩዋንዳ ከዲሞክራቲክ ሪፐብሊክ ኮንጎ ማዕድናትን እየዘረፈች ነው መባሏን አስተባብላለች። ሩዋንዳ አማጽያኑን ኤም23 መደገፏን የማትክድ ሲሆን፤ ነገር ግን ግጭቱ ወደ አገሬ እንዳይዛመት ለማድረግ እየተከላከልኩ ነው የሚል ምክንያትን ትሰጣለች።

በተጨማሪም ሩዋንዳ በዲሞክራቲክ ሪፐብሊክ ኮንጎ መቀመጫቸውን ያደረጉ በአውሮፓውያኑ 1994 ከተፈጸመባት የዘር ጭፍጨፋ ጋር ግንኙነት ያላቸው ቡድኖችን መንግሥቱ ይደግፋል ስትል ትተቻለች፡፡
(ቢቢሲ)