አሜሪካ ኤም 23 ቡድን የወሰደውን እርምጃ አወገዘች

በሩዋንዳ የሚታገዘው ኤም 23 የተባለው ታጣቂ ቡድን ቁልፍ የሆነችውን የምሥራቅ ኮንጎ ዋና ከተማ ተቆጣጥሬአለሁ ማለቱን ተከትሎ አሜሪካ ድርጊቱን አውግዛለች።

በተያያዘ ዜና የኬኒያ ፕሬዚደንት ዊሊያም ሩቶ ከዲሞክራቲክ ኮንጎ ሪፐብሊክ ፕሬዝደንት ፌሊክስ ቲሺኬሴዲ እና ከሩዋንዳው ፕሬዝደንት ፖል ካጋሜ ቀውሱን በሚመለከት ነገ ረቡዕ ለመወያየት ዝግጅት መደረጉን አመልክተዋል።

የአሜሪካ የውጭ ጉዳይ ሚንስቴር እንዳስታወቀው ትላንት ሰኞ የዲሞክራቲክ ኮንጎ ሪፐብሊክ ፕሬዝደንት ቲሺሴኬዲን በስልክ ያነጋገሯቸው የውጭ ጉዳይ ሚንስትር ማርኮ ሩቢዮ " በሩዋንዳ የሚታገዘው ኤም 23 ጎማ ላይ አድርሶታል የተባለውን ጥቃት አውግዘዋል። አሜሪካ የዲሞክራቲክ ኮንጎ ሪፐብሊክን ሉዓላዊነት እንደምታከብር አረጋግጠውላቸዋል" ብሏል።

ግጭቱ ወታደራዊ መፍትሄ የማይገኝለት እንደሆነ የጠቆሙት የኬኒያ ፕሬዝደንት ዊሊያም ሩቶ ፕሬዝደንት ሺሴኬዲ እና ፕሬዝደንት ካጋሜ ነገ ረቡዕ ለመወያየት እንደተስማሙ አመልክተዋል።