እስራኤልና ሊባኖስ የተኩስ አቁም ስምምነት ላይ ደረሱ።

በዚህም በጋዛ ጦርነት ከተቀሰቀሰበት ጊዜ አንስቶ በሺዎች የሚቆጠሩ ሰዎችን ህይዎት ለነጠቀው በእስራኤል እና በሊባኖስ ሂዝቦላ መካከል የተፈጠረው ግጭት እንዲያበቃ መንገዱ እየተደላደለ መሆኑም ተነግሯል፡፡

ስምምነቱ በቅርቡ ተግባራዊ ይሆናል ተብሎ ይጠበቃል።

ስምምነት መደረጉ የተሰማው የእስራኤል የፀጥታ ካቢኔ በጠቅላይ ሚኒስትር ቤንጃሚን ኔታንያሁ የሚመራው የተኩስ አቁም ስምምነት ላይ ለመምከር የተጠራውን ስብሰባን ተከትሎ እንደሆነም ነው የተጠቆመው፡፡

ሆኖም በሊባኖስ የተካሄደው የእርቅ ስምምነት እስራኤል ከፍልስጤም ታጣቂ ቡድን ሃማስ ጋር እየተፋለመች ባለችውና ከፍተኛ እልቂት ባስተናገደችው ጋዛ የተኩስ አቁምና የታገቱትን የመልቀቅ ስምምነት ላይ የተባለ ነገር እንደሌለ ተጠቁሟል፡፡

የተኩስ አቁም ስምምነቱ የእስራኤል ወታደሮች ከደቡብ ሊባኖስ ለቀው እንዲወጡ እና የሊባኖስ ጦር በአካባቢው እንዲሰማራ እንደሚያስገድድ ተሰምቷል፡፡

ሂዝቦላህ ከሊታኒ ወንዝ በስተደቡብ ባለው ድንበር ላይ በትጥቅ እንዳይቆይ ይደረጋልም ነው የተባለው፡፡

የሊባኖስ የውጭ ጉዳይ ሚኒስትር አብደላ ቡ ሀቢብ የእስራኤል ወታደሮች ሲወጡ የሊባኖስ ጦር ቢያንስ 5 ሺህ ወታደሮችን በደቡብ ሊባኖስ ለማሰማራት ዝግጁነት እንዳለውና በእስራኤል ጥቃቶች የወደሙ መሰረተ ልማቶችን መልሶ በመገንባት ረገድ አሜሪካ የበኩሏን ሚና እንደምታደርግ ያላቸውን እምነት ገልጸዋል፡፡

እስራኤል የተባበሩት መንግስታት ድርጅት ከሊባኖስ ጋር የተደረገውን የተኩስ አቁም ስምምነት ውጤታማ እንዲያደርግ የበኩሉን እንዲወጣም ጠይቃለች፡፡