Nama waan taatef 🥹

Yeroo tokko tokko
Jilbi kee si bu'a
Jireenya jibbita
Abdiin kee ni du'a

Hiikaasaa wallaalta
Namummaa kee haalta
Yaada hamaa yaadda
Gaarummaa kee faalta

Nama waan taatef😔

Yeroo tokko tokko
Karaa irraa maqxa
Harka kee gaarome
Deebisteetoo haqxa

Dhaabbachuu dadhabda
Dugda keetii cabda
Nama gidduu teessee
Nama keessaa dhabda

Nama waan taatef

Bu'aa ba'iin jiruu
Uma si muudata
Eenyutu itti tolee
Gar tokkee jiraata?

Addunyaan farakaadha
Ganamaaf galgala
Bifa lama baatti
Onaa fi daggala

Kana hunda keessa
Nama taatee lufta
Jiruu jiruu jechaa
Jireenya itti fufta