hulumale.com / ሁሉም አለ

በጠገዴ ማክሰኞ ገብያ ከተማ ህዝባዊ የውይይት መድረኮች እየተካሄዱ ይገኛሉ።

በርኖስ ሚዲያ /ህዳር/10/2013 ዓ.ም

በክልል፣በዞንና በወረዳ ሀላፊዎች እንዲሁም በኮማንድ ፖስት አመራሮች አስተባባሪነት በርካታ ቁጥር ያለው የከተማው ነዋሪ በተገኘበት ውይይት ተካሂዷል። የአካባቢው ነዋሪዎች በውይይቱ እንደተናገሩት በአሸባሪው የትህነግ ቡድን ሰብዓዊና ዴምክራሲያዊ መብታውን ተነጥቀው ፣በቋንቋቸው እንዳይናገሩ በባህላቸው እንዳይኖሩ ፣አንዳቸው ከአንዳቸው በጥርጣሬ እንዲተያዩ በማድረግ ከወዳጅ ዘመዶቻቸው ጋር እንዳይገናኙ ሲደረጉ እንደነበር፣በአካባቢው ተሰሚነት የነበራቸውና ስለ ማንነታቸው ያቀነቅኑ የነበሩ በርካታ የህብረተሰብ ክፍሎች ሲሳደዱና ሲገደሉ አንደቆዩ ያስረዳሉ።

አስተያየት ሰጭዎቹ እንደሚሉት አሸባሪውን ቡድን ለህግ ለማቅረብ እየተሰራ ያለው እንቅስቃሴ በጉጉት ሲጠብቁት የነበረና አሁን ከትህነግ ጭቆና ቀንበር በመዉጣታቸዉ ደስታቸውን እጥፍ ድርብ እንደሆነ ገልፀዋል።

የአማራ ክልል ባህልና ቱሪዝም ቢሮ ሀላፊ የሆኑት ዶ/ር ሙሉቀን ተገኘ በውይይቱ ማጠቃለያ እንደተናገሩት ወጣቶች አሁን ላይ የተገኘውን የነፃነት ድል ለማስቀጠል በመደረጀት አካባቢያቸውን በንቃት መጠበቅ እንዳለባቸው፣ማህበረሰቡ ተረጋግቶ የተለመደው ተግባሩን ሰላማዊ በሆነ መንገድ ከማከናወን ጎን ለጎን መረጃዎችንና ጥቆማዎችን ለሚመለከተው አካል ማድረስ እንዳለበት እንዲሁም ለአካባቢ ሰላምና ደህንነት ሲባል ከተፈቀደላቸው አካላት ውጪ የጦር መሳሪያ ይዞ መንቀሳቀስ እንደማይቻልና ማንኛውም አካል ከምሽቱ 3:ዐዐ በሗላ መንቀሳቀስ የማይቻል መሆኑን አሳስበዋል።

ሀላፊው አክለውም እስካሁን ድረስ በምህረት ያልገቡ በወረዳው ሲያገለግሉ የነበሩ ፖሊሶች፣ልዩ ሀይሎች፣ አመራሮች፣ ፀረ ሽፍታዎችና ዞባዊ ሚሊሻዎች እስከ ህዳር 14 ድረስ ትጥቃቸውን አውርደው እጃቸውን ለመንግስት እንዲሰጡና በራሳቸው ፈቃድ ካልገቡ ግን ህጋዊ እርምጃ የሚጀመር እንደሆነና ቀጣይ መንግስት እንደመንግስት ጠንካራ አቋም በመያዝ ከማህበረሰቡ ጋር በመተባበር ለመስራት ጥረት የሚደረግ መሆኑን ተናግረዋል ሲል የጠገዴ ወረዳ መ/ኮሚኒኬሽን ዘግቧል።
@bernosmedia24

በደብረብርሃን ከተማ በ2012 በጀት ዓመት ብቻ በ504 ባለሀብቶች 31. 6 ቢሊዮን ብር ያህል ኢንቨስት ተደርጓል፡፡

በርኖስ ሚዲያ /ህዳር /10/2013 ዓ.ም

በኢትዮጵያ ውስጥ በፈጣን የኢንዱስትሪ ግስጋሴ ላይ ከሚገኙ ከተሞች የደብረ ብርሃን ከተማ በቀዳሚነት ይጠቀሳል።

የደብረ ብርሃን ከተማ አስተዳደር በአማራ ብሔራዊ ክልላዊ መንግስት በሰሜን ሸዋ ዞን የምትገኝና በመካከለኛ ከተማ አስተዳደር ደረጃ ያለች ስትሆን፣ ከከልሉ ርዕሰ ከተማ ባሕር ዳር 695 ኪ/ሜ፤ ከፌደራሉ ከተማ አዲስ አበባ ደግሞ 130 ኪ/ሜ ርቀት ላይ ትገኛለች፡፡ ከተማዋ ከባሕር ጠለል በላይ 2,700 ሜትር ከፍታ ላይ ትገኛለች፡፡

የከተማዋ ስፋት 18,000 ሄክታር መሬት የሚሸፍን ሲሆን፣ በከተማው ፕላን የተካተተው ከማስፋፊያው ውጭ 5,711 ሄክታር ይሸፍናል፡፡ የቦታውም አቀማመጥ 86 በመቶ ሜዳማ፤10 በመቶ ዳገታማና 4 በመቶ ተራራማ የሆነና ከዚህም ውስጥ 95 በመቶ ለግንባታ ምቹ የሆነ ቦታ ነው፡፡

የከተማዋን አየር ንብረት ስንመለከትም በቀዝቃዘማ አየር ንብረት ብትታወቅም አሁን ላይ ቀዝቃዛነቱ እየቀነሰ የመጣ፤ በአማካይ 14.5 ዲግሪ ሴንቲግሬድ ሙቀትና 964 ሚሊ ሜትር አመታዊ የዝናብ መጠን ያለት ከተማ ነች፡፡

ከአስተዳደራዊ አደረጃጀት አንጻር ሲታይም ከተማዋ በ9 የከተማና በ5 የገጠር ቀበሌ አስተዳደርና በ19 ሴክተር መስሪያ ቤቶች ተዋቅራለች፡፡

የከተማው ህዝብ የተሰማራበት የሥራ መስክ በአብዛኛው በንግድና በግብርና ሲሆን ከጥቂት ዓመታት ወዲህ ከፍተኛ ቁጥር ያላቸው ኢንዱስትሪዎች እየተመሙባት የምትገኝ ከተማ እንደሆነች መረጃዎች ያመለክታሉ፡፡

የደብረ ብርሃን ከተማ አስተዳደር የከተማ ልማትና ኮንስትራክሽን አገልግሎት ጽ/ቤት ምክትል ሥራ አስካጅ አቶ ኃይለማርያም ንጉስ ከተማዋ ለአዲስ አበባ ካላት ቅርበት፤ ምቹ አየር ንብረት፤ ሠላማዊና ሥራ ወዳድ ሕዝብ የሚኖርባት ከተማ በመሆኗ ካለፉት ሁለት ዓመታት ወዲህ በከፍተኛ ደረጃ በኢንቨስተሮች ተፈላጊ ከተማ እንድትሆን አስችሏታል ያሉት ም/ ሥራ አስካጁ እስከ 2012 በጀት ዓመት መጨረሻ ብቻ በ504 ባለሀብቶች 31ነጥብ 6 ቢሊዮን ብር ያህል ኢንቨስት እንደተደረገ ተናግረዋል፡፡

ኢንቨስትመንቱ ተጠናክሮ እንዲቀጥልና ሌሎች ባለሀብቶች ወደ ከተማ መስተዳድሩ በብዛት መምጣት እንዲችሉ መስተዳድሩ ከምንጊዜውም በላይ ፈጣንና ቀልጣፋ አገልግሎት በቅንነት በመስጠት ረገድ ከፍተኛ ሥራ እየሠራ እንደሚገኝ አቶ ኃ/ማርያም ተናግረዋል፡፡

አያይዘውም ኢንቨስትመንቱ ቀጣይነት እንዲኖረው ለበርካታ ዓመታት ሲጓተት የነበረው የመሠረተ ልማት አገልግሎት ባለፉት ጥቂት ዓመታት ብቻ አዳዲስ የምስረታ ሠፈሮችን ከነባሩ ሠፈር ጋር ለማገናኘት የመሠረተ ልማት አውታሮችን በዋናነት መንገድ ዝርጋታ፤ ውሃና መብራት መስመር አቅርቦት እየሠራ ይገኛል ብለዋል አቶ ኃለማርያም፡፡

መሠረተ ልማት ለአንድ ሀገር ህዝብ ዕድገት ኢኮኖሚያዊና ማህበራዊ እንቅስቃሴ እንደ ደም ሥር የሚታይ ነው ያሉት አቶ ኃ/ማርያም በመሠረተ ልማት መጓተት ምክንያት ኢንቨስትመንቱ እንዳይስተጓጎል ከተማ አስተዳደሩ በራሱ በሚሰበስበው፤ በክልሉና በዓለም ባንክ በጀት በመጠቀም የመሠረተ ልማት አውታሮችን እየገነባ ይገኛል ብለዋል፡፡

በአጠቃላይ በደብረብርሃን ከተማና በዙሪያዋ እየተገነቡ በሚገኙ ኢንዱስትሪዎች የከተማዋ ህብረተሰብ ታላቅ ተስፋን የሰነቀ በመሆኑ መስተዳድሩም አስፈላጊ የመሰረተ ልማቶችን ለማሟላት የሚያደርገውን ከፍተኛ ጥረት አጠናክሮ ሊቀጥል ይገባል እንላለን፡፡

መረጃውን ያደረሰን የከተማ ልማትና ኮንስትራክሽን ሚኒስቴር ነው።
@bernosmedia24

የፖሊስ የደንብ ልብስ በመልበስ ከአንድ ሚሊዮን ብር በላይ ግምት ያለው ወርቅ የሰረቁ ተጠርጣሪዎች ከነኤግዚቢቱ በቁጥጥር ስር ዋሉ።

በርኖስ ሚዲያ /ህዳር /10/2013 ዓ.ም

የግል ተበዳይ አቶ አቤል አሰፋ ህዳር 4 ቀን 2013 ዓ.ም ከጠዋቱ 12 ሰዓት ገደማ ፖሊሶች ነን ያሉ ግለሰቦች በአራዳ ክፍለ ከተማ ወረዳ 6 ራስ መኮንን ድልድይ አካባቢ ወደሚገኘው መኖሪያ ቤታቸው መጥተው በር እንዲከፍቱላቸው ሲጠይቋቸው ማንነታችሁን ሳላረጋግጥ እና ለቤተሰቦቼ ሳላሳውቅ አልከፍትም ማለታቸውንና ከዚያም ፖሊስ ነን ያሉት ግለሰቦች ተጨማሪ ሃይል ያስፈልገናል እያሉ እየተነጋገሩ ወደመጡበት እንደተመለሱ ተናግረዋል፡፡

ይሁን እንጂ የግል ተበዳይ አቶ አቤል ቀን ወደ ስራ ከሄዱ በኋላ ተጠርጣሪዎቹ ከቀኑ 9 ሰዓት ሲሆን የፖሊስ የደንብ ልብስ ለብሰው እና ሽጉጥ ታጥቀው ተመልሰው በመምጣት « አቶ አቤል ወንጀል ሰርተው ስለታሰሩ እኛ ቤታቸውን ልንበረብር ነው የመጣነው » ብለው ለጎረቤት ከተናገሩ በኋላ የተቆለፈውን በር ሰብረው በመግባት በካዝና ውስጥ ለንግድ አገልግሎት የተቀመጡ አንድ ሚሊዮን ሶስት መቶ ሺህ ብር ግምት ያላቸውን የወርቅ ጌጣጌጦች ሰርቀው የሰሌዳ ቁጥር ኮድ 4-20411 አ.አ በሆነ ፒካፕ ተሽከርካሪ ጭነው መውሰዳቸውን የግል ተበዳይ ገልፀዋል፡፡

በአራዳ ክፍለ ከተማ ፖሊስ መምሪያ የጃንሜዳ አካባቢ ፖሊስ ጣቢያ ሃላፊ ዋና ኢንስፔክተር ለውጥአየሁ ከበደ እንዳስረዱት የወንጀሉ መፈፀም ሪፖርት የደረሰው ጣቢያው የምርመራ እና የክትትል ቡድን በማቋቋም እና ከአዲስ አበባ ፖሊስ ኮሚሽን የክትትል ክፍል ጋር በመቀናጀት ውጤታማ ስራ ተሰርቷል፡፡

የፈፃሚዎቹን ማንነት ለማወቅ ቀን እና ለሊት በተደረገው እልህ አስጨራሽ ክትትል ካዝናውን ጭኖ የተሰወረውን ተሽከርካሪ፣በወንጀሉ ተሳትፈዋል የተባሉ 5 ተጠርጣሪዎችን፣ ለወንጀል ተግባር ሲጠቀሙባቸው የነበሩ የፖሊስ የደንብ አልባሳት፣ሽጉጥ፣ ካቴና እና ስለቶችን በቁጥጥር ስር ማዋል እንደተቻለ፣ የፖሊስ የደንብ አልባሳቱንም ከየት አምጥተው እንደለበሱ የማጣራት ስራ እየተሰራ እንደሚገኝ ዋና ኢንስፔክተር ለውጥአየሁ ከበደ ተናግረዋል፡፡

የተሰረቁት ወርቆች በ600 ሺ ብር ለሌላ ግለሰብ ተሽጠው እንደነበር ያስታወሱት ምክትል ኢንስፔክተር ሄኖክ የተሸጡት ወርቆች መርካቶ አካባቢ እንደተገኙ እና ገዢውም በቁጥጥር ስር እንደዋለ ጨምረው ገልፀዋል፡፡

ፖሊስ ቀንና ለሊት ደክሞ በመስራትና ተጠርጣሪዎቹን አውቆ በመያዝ ያከናወነው ተግባር እንዳስደሰታቸው የግል ተበዳይ አቶ አቤል አሰፋ ተናግረዋል፡፡

ምርመራውን ለማስፋት በተደራጀ መንገድ እየተሰራ ነው ያሉት ዋና ኢንስፔክተር ለውጥአየሁ ከበደ ፖሊስ ሳይሆኑ የፖሊስ የደንብ ልብስ ለብሰው ወንጀል የሚፈፅሙ እና የከተማችንን ፀጥታ ለማደፍረስ የሚንቀሣቀሱ ግለሰቦች በመኖራቸው ህብረተሰቡ መታወቂያ በመጠየቅም ሆነ ወደ ፖሊስ ጣቢያ ስልክ በመደወል ህጋዊነታቸውን ሊያረጋግጥ እና አጠራጣሪ ነገሮች ሲያጋጥሙም ለሚመለከተው አካል ሊያሳውቅ ይገባል ብለዋል፡፡

የፀጥታ አካላትን የደንብ ልብስ በመልበስ ለስራ ጉዳይ በሚል ምክንያት ወደተለያዩ መኖሪያ ቤቶች እና ተቋማት የሚሄዱ ግለሰቦችን ማንነት መለየት እና ማረጋገጥ እንደሚገባ የአዲስ አበባ ፖሊስ ኮሚሽን ማሳሰቡ ይታወሳል ብሏል ኮሚሽኑ።

"የአማራ ልዩ ሀይልና ሚሊሻ መስዋዕትነት ከፍሎ ነጻ ያወጣቸውን ህዝቦቹንና ግዛቶቹን መልሶ ለትግራይ ክለል አስተዳደር የሚሰጥበት ምክንያት የለም።"

ዶ/ር ሲሳይ መንግስቴ

በርኖስ ሚዲያ /ህዳር /9/2013 ዓ.ም

የወልቃይት ጠገዴና የራያ ጉዳይ አሁንም አነጋጋሪ ሆኖ መቀጠሉን የሚያመላክቱ ሀሳቦች እየተራመዱ ነው። እስካሁን ባለው ሁኔታ በወልቃይት ጠገዴ ተወላጆች መካከል የተከሰተ የተለየ ነገር ባይኖርም የራያ ህዝብ አሁንም በትግራይ ክልል ጊዜያዊ አስተዳደር ስር እንዲቆይ የሚፈልጉ ጉዶች/ከሀዲዎች መኖራቸው ግልጽ እየሆነ መጥቷል።

አሳዛኙ ነገር የራያም ሆነ የወልቃይት ጠገዴ አካባቢና ህዝብ በትህነግ ተገዶ ወደ ትግራይ በመሄዱ ምክንያት እንደቅደም ተከተሉ ላለፉት 35 እና 28 አመታት ሲሰቃይ መቆየቱ እየታወቀና የአማራ ልዩ ሀይል፣ ሚሊሻና ፋኖ ክቡር መስዋዕትነት ከፍሎ በጀግንነት ነጻ እንዳወጣቸው ግልጽ ሆኖ እያለ እነዚህ አካባቢዎች በትግራይ ክልል ጊዜያዊ አስተዳደር ስር እንዲቆዩ የሚል አቋም መያዝ ፍጹም ሀላፊነት የጎደለውና የአማራን መስዋዕትነት መናቅ የመሆኑ ጉዳይ ነው።

በቅርቡ የትግራይ ክልል ጊዜያዊ አስተዳደር ሆነው በጠቅላይ ሚኒስሩ የተሾሙት ዶ/ር ሙሉ ነጋ ስለወልቃይትና ራያ ሁኔታ ተጠይቀው የሰጡት ምላሽ አካባቢዎቹ በትግራይ ክልል ጊዜያዊ አስተዳደር ስር ቆይተው ጥያቄያቸው በከስተዳደር ወሰንና ማንነት ጉዳዮች ኮሚሽን ሊታይ እንደሚችል ገልጸዋል። ይህም ከእሳቸው የሚጠበቅ ስለሆነ ከዚህ በላይ ከዶ/ር ሙሉ ነጋ መጠበቅ የዋህነት ነው።

ይኸ በዚህ እንዳለ የወልቃይት ጠገዴ፣ ጠለምትና ራያ ጉዳይ መታየት ያለበት በሀይል ተወስደው ስለነበር በሀይል እንዲመለሱ ተደርገዋል። እናም የአማራ ልዩ ሀይልና ሚሊሻ መስዋዕትነት ከፍሎ ነጻ ያወጣቸውን ህዝቦቹንና ግዛቶቹን መልሶ ለትግራይ ክለል አስተዳደር የሚሰጥበት ምክንያት የለም።

ከሁሉም በላይ ግን ይኸ ህዝብ ማንም እየመጣ ፍላጎቱን የሚጭነበት ሁኔታ ስለማይኖር በአማራ ክልል ውስጥ ሆኖ ሀሳቡን በነጻ የሚገልጽበት አሰራር ነው መመቻቸት ያለበት። በዚህ ረገድ የአማራ ክልል መንግስና ገዥው ፓርቲ የአማራ ብልግና ግልጽ አቋም በመያዝ ከፌዴራል መንግስቱ ጋር መነጋገር ይኖርበታል። በፍጹም ያ ታሪካዊ ስህተት መደገም አይኖርበትም።
@bernosmedia24