ሰላም ለገቦከ

ዕረፍትን ለማያውቅ፣ በትግሃ ሌሊት እና ቀን በጸሎት ለለመለመና በአናብስት ለተበላ ጎንህ ፣ሰላምታ ይገባል። የወንጌላዊው ቅዱስ ዮሐንስ ደቀ መዝሙር ቅዱስ አግናጥዮስ ሆይ በነፍሴ ደክሜ ከፈጣርየ እንዳልልይ ፣በትሩፋት እንድበለጽግ የጽድቅን ሥራ አስተምረኝ ::

ሰላም ለከርስከ

ለዓይን የሚማርክ ልብን ደስ የሚያሰኝ፤ የአልማዝ እና የዕንቁ መዛግብት ማስቀመጫ ሳጥን ለሆነው ፣ሆድህ ሰላምታ ይገባል ::ከቅዱሳን ሐዋርያት የተረከብካትን ቤተክርስቲያን በሚገባ ጠብቀህ አስረክበሃል ::ቅዱስ አባቴ
አግናጥዮስ ሆይ! ብል የማይበላው ሌባ ለማይሰርቀው ለሰማያዊው መዝገብ፤ እንዲሮጥና እስከ መጨረሻው እንዲጸና በጸሎትህ እርዳኝ ::

(መልክዐ ቅዱስ አግናጥዮስ )

እንኳን ለታላቁ ሰማዕት ለባሴ ክርስቶስ ለተባለ የቤተክርስቲያን የማይናወጥ ምሰሶ ፣ብርኃን፣ እንቁ፣ ለሚሰማው ሁሉ አንደበቱ ጣፋጭ የሆነ ፣ ከሁሉ ይልቅ ጽድቅን የመረጠ, በክርስቶስ የተመረጠ, ገድሉን በሃይማኖት የፈጸመ, ስለ አምላኩ ስም ሰማዕትነትን በጭካኔ የተቀበለ ጠንካራ የአምላክ ምስክር ለሆነ ለቅዱስ አግናጥዮስ የእረፍት መታሰቢያ በዓል በሰላም አደረሳችሁ አደረሰን ::

አምላከ ቅዱሳን ጻድቃን ሰማዕታት በቸርነቱ በወዳጆቹ ምልጃ ጸሎት ይማረን የወዳጆቹን ፍቅር ያብዛልን ::