ሐሽማል ቤተ-መዘክር

ከክፋት ዘመን መድረስ እድሜ አይባልም!

ኧረ አሸሼ ፥ አሸሼ አሼሸ
አብይ መጣልን ከመሸ ።

[ ልዑል ዘወልደ ]

ወሬ ሁሉ ቲም-ለማ በሆነ ግዜ ቅዱሱን ለውጥ የሚያወድስ ዘፈን እንዲቀመር አቅጣጫ ይቀመጣል ። አቅጣጫውን ከዳላሩ (*በዶክተርዬ አክሰንት) ያስቀመጡት የዲሲ ግብረኃይሎች ናቸው ፤ ሀቅ ለመናገር ከዛ ቀድሞ አላውቃቸውም ።

ዜማና ቅንብሩን ሔኖክ ነጋሽ ሰርቶ በራሱ በ'ሔ - ሄኒ ቲዩብ እንዲለቀቅ ከስምምነት ይደረሳል ፥ ሙዚቃዊ ሀትሪክ ይሏል። ባይሆን ግጥሙ እንኳ የአንጋፋ እጅ ይዳብሰው ተብሎ ለጉምቱ ይልማ ገብረአብ ተሰጠ ።

ዜማ ልምምዱ በጎን ይጧጧፍ ጀመር ። ዘፈኑ ላይ በስቱዲዮ በኩል ያለፉ ሁሉ በአጃቢነት ተሳተፉ ። ፋሲል ደሞዝና ( ዛሬ ለውጡን ሊጠላ ነገር ) አብዮት ካሳነሽ በእንቅጥቅጥ ሸጋ ዱየት ወጣቸው ።

ስራው እየተሳለጠ ሳለ ችግር አይኑ ይጥፋ ችግር ተፈጠረ ። ይልማ የአዝማቹን መግቢያ እንደፃፈ ጨንጓራውን አመመው ። በአራቷ መስመር አረጠ ።

ኧረ አሸሼ ፥ አሸሼ አሸሼ
አብይ መጣልን ከመሸ ፤

ኧረ እንድያ ነው እንድያ
ፀሐይ ወጣልን ከወድያ ። (00:21)

ስራው ጊዜውን ጠብቆ ካልወጣ ጭንቅ ሊሆን ነው ። እንደ ደልፊ ሚቲንግ ሁሉም አስተያየቱን ከዛም ከዚ ይወረወር ገባ ። በመሀል ይልማ ጨጓራው ጋብ ሲልለት እየተነሳ የመብል ስንኝ ወርውሮ ይተኛል ።

ሠላም ነው ድግሱ
ኑ ፀበል ነው ቅመሱ - ሃሃ (04:16)

የሆነ ቀን እንዲሁ ከአልጋው ተነስቶ መድሀኒቴን ስጡኝ ሲል ፥ በመድሀኒት አንድ ሌላ አንጓ መጣለት ፤ ወስዶ ሰካው ።

መድኃኒት ወጣልሽ ኢጦቢያ ከጉያሽ
ደመቀ መኮንን ሆኖልሻል ቀያሽ - ሃሃ (5:34)

በዛ አካሄድ ሰባት ደቂቃ ሙሉ መቀጠል ስላልተቻለ ማሲንቆ ገዝጋዡ ዳዊት " እንዲያ እንዲያ " ከሚል ሐረግ ጋር ረጅም ትራክ ተሰጠው ። ነገር ግን ትርፉ የአብዮት ካሳን አንገት በእስክስታ ማዛል ሆነ ። ጀብደኛው አብዮት አንገቱ ከመሸማቀቁ በፊት ፋሲልን ይዞ ደውለለኝ ።

- ኧረ ግጥሙን በምን እንጨርሰው ?

- በመደመር ሃሃ

( ፋሲል በመሃል ገብቶ...)

- ዋ ! አትቀልድ'ዪ አባ ፥ ታሜሪኻ መስሎኝ ምንደውል

- ሰለም ነው ፋሲሎ !

- አለሁ የናቴ ልጅ ፥ ኧረ በጀ በለን?

- እኔ'ኳ ከመሰረቱ አዝማቹ ራሱ ይቀየር ባይ ነኝ ።

ኧረ አሸሼ ፥ አሸሼ አሸሼ
አብይ መጣልን ከመሸ ፤
ኧረ እንድያ ነው እንድያ
ፀሐይ ወጣልን ከወድያ ። (02:40)

- አይ እድሌ ፥ ምኑ ይቀየራል ይሄ አሁን ?

- አንደኛ " ፀሐይ ወጣልን ከወዲያ " ማለት ትልቅ ስተት ነው ። ፀሐይ እኮ አትወጣም ፋሲሎ ፥ የሌትና ቀን ፈረቃ ምድር መሽከርከሯ ያመጣው ሁነት ነው ።

- አሯ ፥ ለያ ኖሯል ምራብ ተ'ምስራቅ ምንከላወሰው ? አፈር በበላሁ ፥ ሁለተኛውስ ?

- " አሸሸ አሸሸ ፥ አብይ መጣልን ከመሸ " ማለት ከምሽት ለጥቆ ያለው እንግዲህ ለሊት ነው ። ከጨለማው ዘመን ይባስ ወደ ድቅድቁ ገባን መሆኑ እኮ ነው ።

- ማነህ ልዑል

- አቤት

- በደሞዝ ሞት ፥ ወያኔ ነህ አደል ?