ኢትዮ ኘላስ + Ethio Plus

የእባብ አመት ፥ ቻይናውያን እያከበሩት የሚገኘው አዲስ አመት
---------
የቻይና የሉናር አዲስ ዓመት እየተከበረ ነው። በዓሉ በብዙ የእስያ አገሮች እና በዓለም ዙሪያ ባሉ ዜጎቻቸው የሚከበር ጥልቅ በዓል ነው ፡፡

የቻይና ዘመን መለወጫ በዓል የፀደይ ፌስቲቫል ተብሎም የሚጠራ ሲሆን በዚህ ዓመት በቻይናውያን የቀን መቁጠሪያ መሰረት በዛሬው እለት እየተከበረ ይገኛል፡፡ በዓሉም ለቀጣይ ሁለት ሳምንታት የሚቆይ ነው፡፡

የቻይናውያን አዲስ አመት በ12 አመት ውስጥ የሚሽከረከርና በቻይና ኮከብ ቆጠራ ስርዓት ውስጥ ካለው እንስሳ ጋር የሚዛመድ ሲሆን ከአምስት ንጥረ ነገሮች ማለትም ከብረት፣ እንጨት፣ውሃ፣እሳት እና ከመሬት ጋር የተጣመረ ነው፡፡ የዘንድሮ አዲስ ዓመትም የእንጨት እባብ ዓመት ተብሎ እየተከበረ ይገኛል፡፡

የዘመን መለወጫ በዓሉ አመጣጥ በቻይና ቢሆንም እንደ ማሌዥያ፣ ፊሊፒንስ እና ሲንጋፖር ባሉ ሀገራት ያሉ የቻይና ማህበረሰቦች በተመሳሳይ ስም እና ተመሳሳይ ሁነቶች ያከብሩታል ፡፡ እንደ ቬትናም እና ኮሪያ ያሉ ሀገራትም የሉናር አዲስ ዓመትን ስሙን በመቀየር ያከብራሉ፡፡

ቻይናውያን አዲስ ዓመት ከመግባቱ ቀደም ብለው ባሉ ቀናት ያለፈው ዓመት መጥፎ ዕድል ለማባረር በሚል ቤቶቻቸውን በማጽዳት ያሳልፋሉ።

ይህ ጽዳት ለቀጣዩ አመት መልካም እድል እንደሚያመጣ የሚታመን ሲሆን በጌጣጌጦች ፣ መብራቶች፣ በተቆራረጡ ወረቀቶች እና በደማቅ ቀይ ቀለም ቤቶቻቸውን በማስዋብ መልካም እድልን ለማምጣት ይሞክራሩሉ፡፡
በአዲሱ ዓመት ዋዜማም ከቤተሰብ አባላት ጋር እራት በመብላት ያሳልፋሉ፡፡

የአዲሱ ዓመት የመጀመሪያ ቀን ሲገባ አንግ ፓኦ ወይም ሆንግ ባኦ የሚባል ስርዓት የሚከናወን ሲሆን ይህም የቤተሰብ አባላት እና ጓደቾች በአንድ ተሰብስበው የተለያዩ ስጦታዎችን የሚሰጣጡበት ነው ፡፡

የቻይና ተወላጅ የሆነው ኢቮን ጎህ እንደሚለው ፤ አንዳንዶች በመጀመሪያዎቹ ቀናት ቤታቸውን ከመጥረግ ፣ ፀጉራቸውን እና ጥፍሮቻቸውን ከመቁረጥ ይቆጠባሉ፡፡ ይህን የሚያደርጉትም በአዲስ ዓመት የተገኘውን መልካም እድል እንዳያጡ በመፍራት ነው ሲል ይገጻል፡፡

መልካም እድልን የሚጋብዙ እና እርኩሳን መናፍስትን ከቤት እና ከስራ ቦታ የሚያርቁ ባህላዊ የአንበሳ ጭፈራዎችን ማከናወንም የበዓሉ አንዱ አካል ናቸው።

በተለምዶ ያገቡ ሴቶች የቻይና አዲስ አመት የመጀመሪያ ቀንን ከአማቶቻቸው ጋር እንዲያሳልፉ የሚደረግ ሲሆን በሁለተኛው ቀን ደግሞ ሴት ልጆች ወላጆቻቸውን እንዲጎበኙ ይደረጋል።

ሶስተኛው ቀን ፀጥ ያለ እንዲሆን እና በእረፍት እንዲያልፍ ከተደረገ በኋላ አራተኛው እና አምስተኛው ቀን ግን ለሀብት አምላክ የተሰጡ መሆናቸው ይነገራል ፡፡ ስድስተኛው ቀን ላይም ሰዎች ያረጁ ወይም ያልተፈለጉ ዕቃዎችን ጥለው ወደ ሥራ እንዲገቡ ሲደረግ በሰባተኛው ቀን የቻይና እናት አምላክ የሆነችው ኑዋ ሰዎችን እንደፈጠረች ይታመናል ሲል የዘገበው ቢቢሲ ነው።

አሜሪካ ለምትኖሩ የስደተኞች አፈሳና መመለስን በተመለከተ እነኚህ ነጥቦች እወቁ
-----------
በዲሲና በአካባቢዋና በሌሎችም የአሜሪካ ከተሞች የሚኖሩ ኢትዮጵያውያን፣ በተለይም የመኖርያ ፍቃድ የሌላቸውና ህጋዊ ሂደት ውስጥ ያሉት ጭምር በሰፊው እየተወሰደ ባለው የስደተኞች አፈሳና መመለስ (Deportation) ጋ ተያይዞ በቂ መረጃ አለማግኘት፣ ጭንቀትና ስጋት ውስጥ ወድቀዋል። የተለያዩ የኢትዮጵያ የንግድ ተቋማት፣ ሬስቶራንቶች፣ ገበያወች ውስጥ የሚሰሩትም በፍርሃት በመዋጣቸው ከቤት አለመውጣትን መርጠዋል።

በዚህ መነሻነት፣ ጉዳዩ ያስጨነቃችሁ አሜሪካ የምትኖሩ የማህበረሰባችን አባላት በመረጃ ላይ የተመሰረተ ጥንቃቄ ታደርጉ ዘንድ፣ የልዩ ፕሬዝዳንታዊ (Executive Order) ትዕዛዙንና አፈጻጸሙን አገላብጬና የህግ ባለሞያወችን አናግሬ ያገኘሁትን መረጃ ባጭሩ እነሆ።
የዚህ ዘመቻ ዋና ኢላማወች፦
👉 በአሜሪካ ስርዓት ውስጥ ያልተመዘገቡ (Undocumented)፣ በህጋዊ መንገድ ለመቆየት የሚያበቃ መረጃና ፍቃድ የሌላቸው፣ በየትኛውም የስደተኝነት ወይም የጥገኝነት ማመልከቻ ሂደት ውስጥ የሌሉ፣
👉 የጥገኝነት ማመልከቻቸው በሁሉም የማመልከት ሂደቶችና ደረጃወች ላይ ውድቅ ተደርጎ በስደተኞች ፍርድ ቤት ሃገር እንዲለቁ (Removal Order) የታዘዙ
👉 በየትኛውም የጥገኝነት ማመልከቻ ሂደት ውስጥ ያሉ፣ እንዲሁም የስራ፣ የትምህርትም ሆነ የጉብኝት ቪዛ ያላቸው ቢሆኑም በወንጀል የተከሰሱ፣ የተፈረደባቸው፣ የተጠረጠሩ ወይም የወንጀል ታሪክ ያላቸው ከሆነ ለዚህ የአፈሳ ተዕዛዝ የተጋለጡ ናቸው።

ይሄ ዘመቻ የማይመለከታቸው፦
🔻 ህጋዊ ነዋሪወች፤ የመኖርያ ፈቃድ (Green Card) ያላቸው ሰወች ከሃገር የሚያስባርር ወንጀል እስካልፈጸሙ ድረስ
🔻 ቀኑ ያላለፈ ቪዛ ያላቸው፤ የተማሪ፣ የስራ፣ የጉብኝት ቪዛ ያላቸው እና በቪዛው ላይ ያለውን የመቆያ ጊዜና ደንብ/ ግዴታ ያከበሩ
🔻ጥገኝነት (Asylum) ያመለከቱ ጉዳያቸው በየትኛውም ደረጃም ላይ ቢሆን በሂደት ላይ ያለ፣ የስራ ፈቃድ ያላቸው እና ምንም አይነት የወንጀል ታሪክ የሌላቸው

ይሄ ጉዳይ የሚመለከታቸው ሰወች ማደረግ ያለባቸው፦
🔶 የስደተኛ ጉዳይ አስፈጻሚ ሃይሎች የፍርድ ቤት ትዕዛዝ ካልያዙ በስተቀር የቤታችሁን በር ያለመክፈት መብት አላችሁ
🔶 በቁጥጥር ስር ቢውሉም ለማንኛውም ጥያቄ መልስ አለመስጠት እና ጠበቃ የመጠየቅ መብት አላችሁ
🔶 ከቦት ቦት ሲንቀሳቀሱ መታወቂያ እና የህጋዊነት መኖርያ ፈቃድ ወይም የማመልከቻ ደረሰኝና ማስረጃወች መያዝ
🔶 ለክፉም ለደጉም የአደጋ ጊዜ እቅድ ማውጣት፣ የአስፈላጊ የቤተሰብ ተጠሪወችንና የህግ ባለሞያወችን ስልክ መያዝ
🔶 በማመልከቻ ሂደት ላይ ያላችሁ ከጠበቆቻችሁ ጋ መማከር፣ ማመለከቻችሁ ያለበትን ደረጃ በሚገባ ማወቅ፣ የፍርድ ቤት አልያም የቃለመጠይቅ ቀጠሮወችን አለማሳለፍ
✅ የወንጀል ክስ ወይም ታሪክ ካለ የህግ ድጋፍ መፈለግ
✅ ከመጨነቅ ይልቅ ተረጋግቶ ህጋዊ መሰረት ካላቸው እና ከታመኑ ምንጮች ብቻ ትክክለኛና ወቅታዊ መረጃወችን ማግኘት

ይሄ መረጃ ግንዛቤን ለማስፋት የቀረበ እንጂ የህግ ባለሞያን ምክር የሚተካ አለመሆኑን ከወዲሁ መግለጽ እወዳለሁ። መደረግ ያለባቸው ጥንቃቄወች ሁሉም ሰው እንዳለበት ሁኔታ የሚወሰኑና የሚለያዩ ስለሆኑ ራስን መጠበቅ፣ በእውቀት ላይ የተመሰረተ በቂ መረጃ ላይ መመርኮዝ እና፣ ሁል ጊዜም ቢሆን ህጋዊ ድጋፍን ማግኘት አስፈላጊና ጠቃሚ ነው።
በአበቀ ፈለቀ
#Ethiopia

ላኩራዋ ፥ በናይጄሪያ ተጨማሪ ስጋት የደቀነው የሽብር ቡድን
-------------

ናይጄሪያ ላኩራዋ የተሰኘውን ታጣቂ ቡድን በሽብርተኝነት በመፈረጅ በመላ ሀገሪቱ እንዳይንቀሳቀስ አገደች።

ላኩራዋ ታጣቂ ቡድን ሙዚቃ የሚሰሙ ሰዎችን የሚገርፍ፣ ጥቃት የሚፈፅም እና በሰሜን ምዕራብ ናይጄሪያ እና ከኒጀር አዋሳኝ ድንበር አካባቢ ያሉ ነዋሪዎችን ዒላማ የሚያደርግ አዲስ ታጣቂ ቡድን መሆኑ ተገልጿል።

የናይጄሪያ ባለሥልጣናት እንዳሉት ላኩራዋ በማሊ እና ኒጀር ካሉ 'ጂሃዲስት ቡድኖች' ጋር ግንኙነት ያለው ሲሆን፤ ታጣቂዎቹ ለዓመታት በናይጄሪያ እና ኒጀር ድንበር ላይ ተቀምጠው የአካባቢውን ሴቶች ያገባሉ፤ ወጣቶችን ይመለምላሉ።

ይህም ከእስላማዊ ታጣቂ ቡድን ቦኮሃራም እስከ አጋች ወንበዴዎች እንዲሁም ከሌሎች በርካታ ታጣቂ ቡድኖች ጋር እየተዋጋች ላለችው ናይጄሪያ ተጨማሪ የደኅንነት ስጋት ሆኖባታል ተብሏል።

በዚህም የናይጄሪያ መንግሥት ሐሙስ ዕለት የቡድኑን ተግባራት በመዘርዘር በዋና ከተማዋ አቡጃ ለሚገኘው ከፍተኛ ፍርድ ቤት የክስ ሰነድ አስገብቶ ነበር።

ሰነዱ ላኩራዋ ከብቶችን መዝረፍ እና ለገንዘብ ሰዎችን ማገትን፣ ጠለፋን፣ ከፍተኛ የመንግሥት ባለሥልጣናት ላይ ጥቃት መፈፀምን ጨምሮ በሽብር ተግባራት ላይ ሲሳተፍ መቆየቱን ያስረዳል።

ከዚህም በተጨማሪ ቡድኑ በአካባቢው የሰላማዊ ሰዎችን ሕይወት ያጠፋ፣ ጉዳት እና የንብረት ውድመትን ያስከተለ ጎጂ የሆነ ርዕዮተ ዓለምን በማሰራጨት እና ነዋሪው ባለሥልጣናትን እንዳያከብር በማበረታታት ተከሷል ነው የተባለው።

ቡድኑ የተፈጠረው በሶኮቶ እና ኬቢ ግዛቶች ውስጥ በሚገኙ መንደሮች ውስጥ ከጥቂት ዓመታት በፊት የነበረ ሲሆን የአካባቢው ሰዎች ለባለሥልጣናት ቢያሳውቁም የተሠራ ሥራ አልነበረም።

መጀመሪያ ላይ የላኩራዋ አባላት የአካባቢውን ማኅበረሰቦች ከታጣቂዎች እና ከከብት ዘራፊዎች እንደሚጠብቁ ቃል ገብተው እንደነበር ነው የተገለጸው።

ሆኖም የነዋሪዎችን ስልክ መፈተሽ እና በስልካቸው ላይ ሙዚቃ የጫኑ ሰዎች ሙዚቃውን ከማጥፋታቸው በፊት መግረፍ ሲጀምሩ ነገሮች እንደተባባሱ አንድ ግለሰብ ተናግሯል።

ለፍርድ ቤቱ በቀረበው ሰነድ ላይም የናይጄሪያ ጠቅላይ ዓቃቤ ሕግ እና የፍትሕ ሚኒስትሩ ላቴፍ ፋግቤሚ፣ የቡድኑ ድርጊቶች ለብሔራዊ ደኅንነት ከፍተኛ ስጋት ሆኗል ብለዋል።

ባለፈው ዓመት የጦሩ ቃል አቀባይ ሜጄር ጀኔራል ኤድዋርድ ቡባ፣ የላኩራዋ ቡድን መፈጠር በጎረቤት ሀገራት ማሊ እና ኒጀር ካለው የፖለቲካ አለመረጋጋት ጋር በቀጥታ እንደሚያያዝ መናገራቸው ይታወሳል።

ጦሩ በእስላማዊ ሽምቅ ተዋጊዎች ግፊት ምክንያት በሁለቱም ሀገራት ተሰማርቶ ነበር።

ዳኛ ጀምስ ኦሞቶሾ ባሳለፉት ፈጣን ውሳኔም ቡድኑን የሽብርተኛ ድርጅት ብለው የፈረጁ ሲሆን ሌሎች ተመሳሳይ ቡድኖችም በመላ ሀገሪቱ በተለይም በሰሜን ምዕራብ እና ሰሜን ማዕከላዊ ክልሎች እንዳይንቀሳቀሱ የጣለውን እገዳ አራዝመዋል።

ይህ ውሳኔ የናይጄሪያ መንግሥት በቡድኑ ላይ ጠንካራ እርምጃ ለመውሰድ ሥልጣን ይሰጠዋል ነው የተባለው።

የፀጥታ ተቋማትም የቡድኑን እንቅስቃሴ የማደናቀፍ እና የማፍረስ ሰፊ ሥልጣን ያላቸው ሲሆን ይህም እስራትን፣ ክስ ማቅረብን፣ የንብረት እገዳን እና ክትትልን ይጨምራል።

ከዚህም በተጨማሪ በሽብር ከተፈረጀው ቡድኑ ጋር ግንኙነት ያላቸው ግለሰቦች ላይ መገለልን ሊያስከትል ይችላል።

በመላ ሀገሪቱ በተለይም በሰሜናዊ ናይጄሪያ በአውሮፓውያኑ 2000 መጨረሻ ላይ ብቅ ካለው ቦኮሃራም ጋር ተመሳሳይነት ያለው ሁኔታ እንዳይፈጠር ነዋሪዎች ሰግተዋል።

ቦኮሃራም ማለት " የምዕራባውያን ትምህርት የተከለከለ ነው" ማለት ሲሆን በክልሉ እስላማዊ አገዛዝ ለመመሠረት በተደጋጋሚ ዓለማዊ ትምህርት ቤቶችን ዒላማ ያደርጋል።

ቡድኑ እንደ አውሮፓውያኑ በ2014 ከሰሜን ምሥራቃዊቷ ከተማ ቺቦክ ከ200 በላይ ሴት ተማሪዎችን አግቶ ከወሰደ በኋላ ስሙ በዓለም አቀፍ ደረጃ ታውቋል።

https://t.me/Ethioplus_s