Amhara Police Commission

በሰራባ የስልጠና ማዕከል የመንግሥትን የሠላም ጥሪ ተቀብለው የተሃድሶ ስልጠና ሲሠለጥኑ የቆዩ ታጣቂዎች ተመረቁ።

አማራ ፖሊስ ፦ጥር 18/2017 ዓ.ም
በማዕከላዊ ጎንደር ዞን ጭልጋ ወረዳ በሰራባ የስልጠና ማዕከል የመንግሥትን የሠላም ጥሪ የተቀበሉ ከ1 ሽህ 490 በላይ ታጥቀው በጫካ ሲንቀሳቀሱ የነበሩ ታጣቂዎች ወደ ተሃድሶ ስልጠና መግባታቸው ይታወሳል። ስልጠናውን በማጠናቀቅም ተመርቀዋል።

ሰልጣኞቹ ከአንድ ዓመት በላይ በተሻገረው የአማራ ክልል ግጭት ሰባዊ ቀውስና ቁሳዊ ውድመት መድረሱን ጠቅሰው ፤ በድርጊቱም መፀፀታቸውን ተናግረዋል።

የተፈጠረው ግጭት የአማራን ሕዝብ የማይገባ ዋጋ አስከፍሎታል የሚሉት የተሃድሶ ሰልጣኝ ተመራቂዎቹ የአማራ ሕዝብ የሰላም ረፍት እንዲያገኝ የበኩላቸውን ድርሻ ለመወጣት መዘጋጀታቸውን ተናግረዋል።

የተበደለውን ሕዝብ ለመካስና ሠላምን ለማረጋገጥ እንሠራለን ብለዋል።

በምረቃው የተገኙት የሀገር ሽማግሌዎችም የሰላም ጥሪን የተቀበሉ ወጣቶች በሰራባ የስልጠና ማዕከል የተሃድሶ ስልጠና ወስደው በመመረቅ ወደ ሠላምና ልማት መመለሳቸው የሚበረታታና ለሌሎች ትምህርት የሚሰጥ ነው ብለዋል።

በስልጠና ማዕከሉ ለተሃድሶ ሰልጣኞች አስፈላጊው አቅርቦት ሲከናወን መቆየቱን ያነሱት የማዕከላዊ ጎንደር ዞን ትምህርት መምሪያ ምክትል ኃላፊና የስልጠና ማዕከሉ አስተባባሪ ነጋ ብርሃኑ ስልጠናው የሠልጣኞችን አቅም ለመገንባት ያስቻለ መሆኑን ገልጸዋል።

የርእሰ መሥተዳደር ጽሕፈት ቤት የሕዝብ ግንኙነት ኃላፊና የሰራባ ስልጠና ማዕከል አስተባባሪ አበባው አምባዬ የመንግሥትን የሠላም ጥሪ የተቀበሉ ታጣቂዎች የተሃድሶ ስልጠናቸውን በአግባቡ መውሰዳቸውን ገልጸዋል።

አስተባባሪው ሠልጣኞች የክልሉን ሕዝብና መንግሥት መካስ የሚያስችል ተግባር ለመከወን መዘጋጀታቸውንና ለዚህም መተማመን ላይ መደረሱን አስገንዝበዋል።

#አሚኮ

የመንግሥትን የሰላም ጥሪ ተቀብለው በቡርቃ የተሃድሶ ማዕከል ስልጠና የወሰዱ ታጣቂዎች ተመረቁ።

አማራ ፖሊስ፦ጥር 18/2017 ዓ.ም

የመንግሥትን የሰላም ጥሪ ተቀብለው በቡርቃ የተሃድሶ ማዕከል ስልጠና ሲወስዱ የቆዩት ታጣቂዎች በተሳሳተ መንገድ የበደልነውን ማኅበረሰብ ለመካስ ተዘጋጅተናል ብለዋል።

በክልሉ ከአንድ ዓመት በላይ በዘለቀው ግጭት ታጥቀው ወደ ጫካ የገቡ ታጣቂዎች ወደ ሰላም እንዲመጡ ሕዝብ እና መንግሥት ተደጋጋሚ የሰላም ጥሪ ሲያቀርቡ ቆይተዋል። በተለያዩ አካባቢዎች ሲንቀሳቀሱ የነበሩ በርካታ ታጣቂዎችም የሰላም ጥሪውን ተቀብለው ወደ ተሃድሶ ማዕከላት መግባታቸው ይታወሳል።

በአማራ ክልል ከሰሜን ወሎ፣ ከደቡብ ወሎ፣ ከሰሜን ሸዋ፣ ከዋግ ኽምራ ብሔረሰብ እና ከኦሮሞ ብሔረሰብ አስተዳደር ታጥቀው ሲንቀሳቀሱ የነበሩት ታጣቂዎች በቡርቃ የተሃድሶ ማሰልጠኛ ማዕከል በመግባት ስልጠናቸውን አጠናቅቀው ተመርቀዋል።

ታጣቂዎቹ የአማራን ሕዝብ ጥያቄዎች ለማስመለስ በሚል ወደ ጫካ መግባታቸውን ጠቅሰው የተከተሉት መንገድ ግን የተሳሳተ እንደ ነበር አመላክተዋል። በትጥቅ ትግሉ ምክንያት የመጀመሪያው ተጎጂ የክልሉ ሕዝብ በመኾኑ የሰላም መንገድን እንደመረጡም ተናግረዋል።

በስልጠና ቆይታችንም የሕዝብ ጥያቄ በዚህ ሁኔታ እንደማይመለስ ተገንዝበናል ብለዋል። በቀጣይ እስከዛሬ የበደልነውን ማኅበረሰብ ለመካስ ተዘጋጅተናል ያሉት ታጣቂዎቹ የክልሉ መንግሥት ስልጠናውን በማመቻቸት ላደረገላቸው ድጋፍም አመስግነዋል።

የአማራ ክልል ሰላም እና ፀጥታ ቢሮ ምክትል ኀላፊ ደጀኔ ልመንህ የክልሉን መንግሥት እና ሕዝብ የሰላም ጥሪ ተከትሎ በርካታ ታጣቂዎች ወደ ስልጠና ማዕከል እንዲገቡ እየተደረገ መኾኑን ገልጸዋል።

ስልጠናውን ያጠናቀቁ የቀድሞ ታጣቂዎችም በቀጣይ ወደ ማኅበረሰቡ ሲቀላቀሉ የሰላም አምባሳደር ኾነው እንዲሰሩ የሚደረግ መኾኑን ያነሱት ምክትል ቢሮ ኀላፊው በጫካ የሚገኙ ሌሎች የታጠቁ ወገኖችም የሰላም አማራጭን እንዲቀበሉ ጥሪ አቅርበዋል።

በስልጠናው ማጠቃለያ መርሐ ግብር ላይ የተገኙት በሀገር መከላከያ ሰራዊት የሰሜን ምስራቅ ዕዝ ዋና አዛዥ ሌተናል ጀኔራል አሰፋ ቸኮል በበኩላቸው ሰላምን መምረጥ የታላቅነት መገለጫ መኾኑን ጠቁመዋል።

ሌተናል ጄኔራል አሰፋ ቸኮል በጫካ የሚገኙ ሌሎች ታጣቂዎችም የሰላምን መንገድ መርጠው ለሕዝብ እፎይታ እንዲሰሩ መልዕክታቸውን አስተላልፈዋል።
#አሚኮ