ቅድሚያ ለተወሂድ

በየሰፈሩ ልጆችን በክረምት ቁርኣን ለምታስተምሩ መርከዞች
~
ቁርኣን ላልጨረሱ ልጆች ኪታብ ባታስቀሩ መልካም ነው። ልጆቹ አቅማቸው ገና ስለሆነ ኪታቡን አይዙትም። ለቁርኣን የሚሰጠውን ትኩረትም በእጅጉ ይቀንሰዋል። ቁርኣን መቅራት ያልቻለ ልጅ እንዴት ኪታብ መቅራት ይችላል? ስለዚህ በዚህ የአቅም ደረጃ ላይ ላሉ ህፃናት ሙሉ ትኩረት ለቁርኣን ቢሰጥ ነው የሚሻለው።
አንዳንድ መሰረታዊ ነገሮችን ማስጨበጥ ከተፈለገ በኪታቡ ፈንታ በጣም አሳጥሮ በቃል ብቻ ከእድሜያቸው ጋር የሚሄዱ ቀላል ነገሮችን ጣል ማድረግ በቂ ነው። ለምሳሌ የኢማንና የኢስላም ማእዘናት፣ የውዱእ አደራረግ፣ የሶላት አሰጋገድ፣ በጣም ቀላል አደቦችንና አጫጭር ዚክሮችን ቀለል ባለ መልኩ እየደጋገሙ ለማስያዝ መሞከር በቂ ነው።
ቁርኣን የጨረሱትን ደግሞ አቅማቸውን ባገናዘበ መልኩ ከቀላል ኪታብ ጀምሮ እየያዙ መሆናቸውን እየፈተሹ ቀስ አድርጎ መያዝ ያስፈልጋል። አስተማሪዎች አቀራረባችሁን እየገመገማችሁ አሻሽሉ። ማወቅ ብቻውን ለማስተማር ብቁ አያደርግም። ያወቀ ሁሉ ማስተማር ይችላል ማለት አይደለም። የልጆች አቅምም፣ ባህሪም፣ ትኩረትም አንድ አይደለም። ሁሉንም አንድ ዓይነት አያያዝ መያዝ ውጤማነቱን ይቀንሰዋል። ስለዚህ አቅም በፈቀደ እንደ ሁኔታው መያዝ ይገባል። የልጆቹን የአቀባበል አቅም ማጤን፣ ድክመታቸውን ለይቶ ለመፍታት መሞከር፣ እንዳስፈላጊነቱ ሞራልና ቁጣ፣ ምክርና ማሳሰቢያ መስጠት አስፈላጊ ነው።

Ibnu Munewor
=
የቴሌግራም ቻናል፡-
https://t.me/IbnuMunewor

ከ"ዘመናዊ" የጥንቆላ ወጥመዶች እንጠንቀቅ
~
በዚህ ዘመን ጥንቆላ መልኩን እየቀየረ እየመጣ እንደሆነ እያየን ነው። በእርግጥ የቀደመው ዓይነት ጥንቆላም ቢሆን ብዙም ገበያው አልቀዘቀዘም። የሺርክ እንቁላል የሚጥሉ በርካታ ጠንቋዮች ከገጠር አልፈው በየከተማው መሽገዋል። በሌላ በኩል "ለተማረው" እና ለሚያነበው የማህበረሰብ ክፍል ታልመው የሚቀርቡ የጥንቆላ ዓይነቶች መቅረብ ከጀመሩ ቆይተዋል። ጋዜጦችና መጽሔቶች እንዲሁም የሬዲዮ ፕሮግራሞች ሳይቀሩ ቁም ነገር አገኛለሁ ብሎ ለሚከታተላቸው ወገን ጥንቆላን ሲያቀርቡ ማየት የሚያሳዝን ነገር። ዛሬ ደግሞ እንደ ፌስቡክ ያሉ ፕላትፎርሞችን በመጠቀም የሰዎችን ህይወት፣ ሙያ፣ እድሜ፣ ጋብቻ፣ የኳስ ውድድር ውጤቶችን፣ ወዘተ ቀድመው "የሚተነብዩ"፣ የጥንቆላን ስራዎችን የሚያቀርቡ አካላት አሉ። እነዚህ ነገሮች በሸሪዐ ሚዛን እንደዋዛ መዝናኛ ተብለው የሚታለፉ አይደሉም። ውጤታቸውም ኢማንን የሚነካ ጥፋት ነውና መጠንቀቅ ይገባል። እነዚህን አፖችና ድረ ገፆች መጎብኘት ጠንቋይ ዘንድ እንደ መሄድ ነው። የሚያቀርቡትን "ትንበያ" ማመን ደግሞ ልክ በጠንቋይ ንግግር እንደማመን ነው።

ሃሳቤን ይበልጥ ግልፅ ለማድረግ በመፅሄቶች ላይ የሚቀርቡ ጥንቆላዎችን አስመልክቶ ሸይኽ ሷሊሕ ኣሊ ሸይኽ የተናገሩትን አቀርባለሁ። ሸይኹ እንዲህ ይላሉ፡-

“በዚህ ዘመን ብዙ ሰው ቢዘነጋውም በግልፅ ከኮከብ ቆጠራ ጥንቆላ ውስጥ የሚገባው በመፅሄቶች በብዛት የሚለቀቀው ኮከብ ቆጠራ (astrology) እየተባለ የሚጠራው ነው። ጋዜጦች ላይ አንድ ገፅ ወይም ከዚያ ያነሰ ይመድቡለታል። ሊዮ፣ እስኮርፒዮን፣ ታውረስ፣ ወዘተ እያሉ የአመቱን ኮከብ ንድፍ ይሰራሉ። ከእያንዳንዱ ኮከብ ፊት ይከሰታል ብለው የሚያስቡትን ይፅፋሉ። ይሄ የከዋክብትን እንቅስቃሴና ሁኔታ ተመልክቶ ምድር ላይ የሚደርሰውን ማወቅ ይቻላል የሚል ትምህርት ነው። ይሄ ከጥንቆላ አይነቶች አንዱ ነው። በመፅሄቶችና ጋዜጦች ላይ ይሄ ነገር ከኖረ ጥንቆላ አለባቸው ማለት ነው። ስለዚህ ሺርክ፣ የሩቅ እናውቃለን የሚል ሙግት፣ ጥንቆላና ኮከብ ቆጠራ ስለሆነ የያዘው ሊቃወሙት ይገባል። እያንዳንዱ ሙስሊም እንዲህ አይነቱን ነገር ከቤቱ ሊያስገባ አይገባም። ማንበብና መከታተልም የለበትም። ምክንያቱም ይህን ኮከብ ቆጠራና በውስጡ ያለውን መከታተል ማለት እንዲሁ ለማወቅ ብቻ ቢሆን እንኳን የተከለከለ ነው። ምክንያቱም ላይቃወም ጠንቋይ ዘንድ መሄድ ነውና።
የተወለደበትን ኮከብ ሊያውቅ ወይም ከሱ ጋር የሚሄደውን ኮከብ ሊያውቅ አስቦ የኮከብ ቆጠራ ያለበትን ገፅ ያነበበ ሰው ልክ ጠንቋይ እንደጠየቀ ነው። ስለዚህ አርባ ቀን ሶላቱ ተቀባይነት የለውም። በነዚህ የኮከብ ቆጠራ ውስጥ ያለውን ካመነ ደግሞ በሙሐመድ ﷺ ላይ በወረደው ያለጥርጥር ክዷል።” [ኪፋየቱል ሙስተዚድ፡ 193]
=
የቴሌግራም ቻናል፡-
https://t.me/IbnuMunewor

"አር ማረኝ"
~
ተውሒድን አጥብቀህ ተማር። ተውሒድ ለኣኺራ ብቻ አይደለም ፋይዳው። ለዱንያም መከበሪያህ ነው።
ተውሒድ ካልተማርክ

• ጉጉት ትፈራለህ፣
• አይጥ ትለማመጣለህ፣
• ውሻ አላዘነ ብለህ ትሸበራለህ፣
• የቁራ ድምፅ ከመንገድ ይመልስሃል፣
• እጅ ወይም አንገት ላይ በታሰረ እርባ ቢስ ክር ትተማመናለህ፣
• ዛፍ ላይ ክር ትተበትባለህ፣ ቅቤ ትቀባለህ፣
• እጅህን ስላሳከከህ ትደሰታለህ፣ (ሰዎች እጃቸውን ሲያሳክካቸው ምን እንደሚሉ አስታውስ።)
|
• ተውሒድ ካልተማርክ ከሶላት የተኳረፈ ገሪባ "ዐርሽ ላይ ነው የምሰግደው" እያለ ይጫወትብሃል። ጠንቋይና ወሊይ ይምታታብሃል።
• ሃያሉን ጌታ ጥለህ ሙታን ትማፀናለህ። (ይልቅ እነሱን መለመንህን ትተህ ለነሱ ዱዓእ አድርግላቸው።)
• ተውሒድ ካልተማርክ "ማርያም በሽልም ታውጣሽ"፣ "የማርያም መቀነት"፣ "የማርያም ፈረስ"፣ "ማርያም ስማህ ነው"፣… እያልክ ክርስትና ክርስትና የሚሸት ኹራፋት ታራምዳለህ።
• የአምስት ብር ጎመን የማያክል አረንጓዴ መርዝ (ጫት) መቶ ሁለት መቶ ብር ገዝተህ "የዱዓእ መሳሪያ" እያልክ ትጃጃላለህ።
• የሁለት አመት ህፃን "ካካ" ስትለው የሚፀየፈውን አፈር፣ "ቱራብ" እያሉ ከቀብር አካባቢ ቆንጥረው ሲሰጡህ በጥብጠህ ትጠጣለህ።
• አዎ ተውሒድ ካልተማርክ የተቀበረ ብር አገኛለሁ ብለህ ጠንቋይ እየቀለብክ በእጅህ ያለውን ገንዘብ ታጣለህ።
• ልጅህ ሲባልግ፣ ሲያፈነግጥ ዝም ብለህ ተውሒድ ሲማር፣ ሶላት ሲሰግድ፣ መስጂድ ሲያዘወትር፣ ጥሩ ጓደኛ ሲይዝ እሪ ትላለህ፣ (እንዲህ ነው የሸይጧን መጫወቻ መሆን።)
• ተውሒድ ካልገባህ ከሺርክ የሚያስጠነቅቁ ተቆርቋሪዎችን እንደ ጠላት እየቆጠርክና ጧት ማታ እያጠለሸህ ሶሐቦችን የሚያወግዙ፣ ቁርኣንን የሚያረክሱ ሺዐዎችን ታወድሳለህ። አልተማርክማ! እንዲሁ "ሲሉ ሰማሁ ብየ፣ እላለሁ ነብዬ" ብቻ!
• ተውሒድ ካልተማርክ ለቶንሲል ህመም "አር ማረኝ" እያልክ በአይነ ምድር ታሻርካለህ። ሰው እንዴት ካካውን ይማፀናል? ወላሂ ከእንዲህ አይነቱ ካካውን ዞሮ ከሚማፀን ጉደኛ ፍጡር፣ ካካውን የሚያቦካ የአእምሮ በሽተኛ ሺ ጊዜ ይሻላል።
ጎንበስ ብለህ ተውሒድህን ተማር። አካዳሚ ትምህርት ከሺርክ አያወጣህም። ስንት እንጨት፣ ላም፣ ድንጋይ፣ ሰው፣… የሚያመልኩ፣ ጠንቋይ ለጠንቋይ የሚርመጠመጡ ዶክተሮችና ፕሮፌሰሮች አሉ መሰለህ?
\=\

የቴሌግራም ቻናል
https://t.me/IbnuMunewor

ሚስት ከፈለክ ዲን ያላትን ሱኒዋን ቆንጆ ፈልግ!።
-------
በጣም የማምነው ጓደኛዬ መጥፎ ሚስት አግብቶ የሚከተለውን ብሎኛል ይላሉ አል-ኢማሙ አሽ-ሻፊዒይ፦
"تزوجت لأصون ديني ، فذهب ديني
ودين أمي ودين جيراني. "
ዲኔን ለመጠበቅ ብዬ አገባሁኝ: ግን የኔም ዲን የናትም ዲን የጎረቤቴም ዲን ጠፋ!"
[መናቂቡ ሻፊዒይ ሊል በይሀቂይ 2/192]

ልብ በሉ! የራሱም ዲን የእናቱም ዲን የጎረቤቱም ዲን የመበላሸት ትልቁ ምክንያት እርሱ: በስነ-ምግባሯም በዲኗም የወረደቺን ደካማ ሴት በመምረጡ ምክንያት ነው። እናም ሚስት ስፈልጉ ዲን ያላትን ሱኒዏን ቆንጆ ይሁን!!!።

ሚስቱ የናቀቺውና ሁሌም የምታዋረደው የሆነ ግለሰብ ነበር። የሚስቱን ንቀት መቋቃም ሲያቅተው ወደ ሱፍያን ኢብኑ ዑየይናህ ስሞታ ሊያቀርብ መጣና ስሞታውን አቀረበ። ሱፍያን ኢብኑ ዑየይናህም: እርሷን መጀመሪያ የመረጥካት ልቅናን ፈልገህ ነበርዴ? ‹አሉት› ሰውየውም አዎን ልቅናን ፈልጌ ነበር አሏቸው። ሱፍያን ኢብኑ ዑየይናህም የሚከተለውን አሉ ፦
من ذهـب إلى العز ابتلي بالـذل ،
ومن ذهـب إلى المال ابتلي بالفقـر ، و من ذهب إلى الـدين يجمع الله له العز و المال مع الـدين "
ልቅናን ፈልጎ የሄዴ፣ በውርደት ይፈተናል። ገንዘብን ፈልጎ የሄደ በድህነት ይፈተናል። ዲንን ፈልጎ የሄደ ልቅናውንም ገንዘቡንም ከዲኑጋር አሏህ ይሰበስብለታል!።
[ሒልየቱል አውሊያኧ 7/289]

ልብ በሉ!። የዲኗን ጎን ሳታይ ገንዘቧን ብቻ ከሆነ አላማህ አሏህ በድህነት ሊያቆራምዳቹህ ይችላል። ልቅናን ብቻ ፈልገህ ከሆነ አሏህ በውርደት ሊሸብብህ ይችላል። ስለዚህ ዲን ያላትን ጭምቷን ምረጥ!።

✍አብደረህማን አማን
t.me/abdu_rheman_aman

ቁርኣን ወይም ኪታብ በማስተማር ላይ የተሰማራሀው ወገኔ ሆይ! እራስህን ለመቻልና ከሰው እጅ ላለመጠበቅ የምትችለውን ሰበብ አድርስ። አላህ ካገራልህ የማንንም እጅ ሳታይ ተብቃቅተህ አስተምር። ኑሮህን ለመደጎም፣ ቤተሰብህን ለማኖር የምትቸገር ከሆነ ህዝብ ለማስተማር የምታውለውን ጊዜ ቀንሰህ ስራ ላይ ተሰማራ። አዎ ቀንሰው። ሳምንቱን ሙሉ ታስተምር ከነበረ ሁለት ቀን፣ ሶስት ቀን አድርገው። ሶስት፣ አራት ሰዓት ታስተምር ከነበረ አንድ፣ ሁለት ሰዓት አድርገው። ምክንያቱም ከጥገኝነት መውጣት አለብህ። ያለበለዚያ ይሄ ከዲን ጋር ሲነፃፀሩ እዚህ ግባ ለማይባሉ ነገሮች አእላፍ የሚመነዝር ወገን ከሰፈር ነዋሪ በጣር አጠራቅሞ ለሚሰጥህ ሳንቲም በምላስ ጦር ይወጋሃል። በነፃ አታስተምር ነገር አትችል። በክፍያ ስታስተምር ነገሩ መከራ። "ለቁርኣን እያስከፈሉ" እያለ ባደባባይ ሲወቅስ ትንሽ እንኳን አይሰቀጥጠውም። አንተም እንደሱ ህይወት፣ ቤተሰብ እንዳለህ ሊያስብ አይፈልግም።
ሆድ እንዲብስህ አይደለም የማወራህ። ከማስተማር ራቅ እያልኩህም አይደለም። ለአላህ ብለህ የምትሰራውን ስራ "ምን አገባኝ?!" ልትል አይገባም። ይሄ ፈፅሞ መሆን የለበትም። ብቻ በየትም በየትም ብለህ ከሰው ጥገኝነት ለመውጣት ጥረት አድርግ። ይሄው ነው።
የብዙ ኡስታዞችን ህይወትና የህዝባችንን ሁኔታ በማሰብ ነው የፃፍኩት። መነሻ የሆነኝ እያስከፈሉ የሚያስተምሩ ወንድሞችን የሚወቅሱ ሰዎችን ማየቴ ነው። ወይ ራሳቸው በነፃ አያስተምሩ፤ ወይ የሚያስተምሩትን አያግዙ። እንዲሁ የሚሰሩትን ማሰናከል ብቻ!! ቆይ እንዴት ሆነው እንዲኖሩ ነው የምንጠብቀው?! ወላሂ በዚህ አያያዛችን ወደፊት አስተማሪ እንዳናጣ ያሰጋል። ሱብሓነላህ!!
=
የቴሌግራም ቻናል፡-
https://t.me/IbnuMunewor