YeneTube

የቻይናው ፕሬዝዳንት በትራምፕ በዓለ ሲመት ላይ እንደማይታደሙ ተገለጸ

ትራምፕ ከ10 ቀን በኋላ በሚደረገው በዓለ ሲመታቸው ላይ ባልተለመደ መልኩ የውጭ ሀገራት መሪዎች እንዲታደሙ ጥሪ አቅርበው እንደነበር ይታወሳል

የቻይናው ፕሬዝዳንት ሺ ዢንፒንግ በአሜሪካው ፕሬዝዳንት ዶናልድ ትራምፕ በዓለ ሲመት ላይ እንዳማይታደሙ ተገለጸ፡፡

ትራምፕ ምርጫውን ማሸነፋቸው ከታወቀበት ህዳር ወር በኋላ ባሉት ጥቂት ቀናት የቻይናው ፕሬዝዳንት በበዓለ ሲመታቸው ላይ እንዲታደሙ ጥሪ አቅርበው ነበር።

ትራምፕ በበዓለ ሲመታቸው ላይ የቻይናው ፕሬዝዳንት እንዲታደሙ ጥሪ አቀረቡ
በወቅቱ ከቻይናው ፕሬዝዳንት ቢሮ ምንም አይነት ምላሽ ሳይሰጥ ቢቆይም ፋይናንሻል ታይምስ ዛሬ ይዞት በወጣው ዘገባ ሺ ዢንፒንግ በዝግጅቱ ላይ እንደማይገኙ እና በምትካቸው ከፍተኛ ልዑክ እንደሚልኩ ዘግቧል፡፡

ዘገባው ከምንጮቹ አገኘሁት ባለው መረጃ መሰረት አንዳንድ ጊዜ በተለያዩ ስነ ስርአቶች ሺ ዢንፒንግን ወክለው የሚቆሙትን ምክትል ፕሬዚዳንት ሃን ዜንግ ወይም የውጭ ጉዳይ ሚኒስትር ዋንግ ዩ በበዓለ ሲመቱ ላይ ይታደማሉ ተብለው የሚጠበቁ ከፍተኛ ባለስልጣናት ናቸው፡፡

አንዳንድ የትራምፕ አማካሪዎች ከምክትል ፕሬዝዳንቱ እና ከውጭ ጉዳይ ሚኒስትሩ በበለጠ የፕሬዝዳንቱ ቀኝ እጅ ናቸው የሚባሉት የፖሊት ቢሮ ቋሚ ኮሚቴ አባል ካይ ኪ እንዲሳተፉ ጥያቄ ሳያቀርቡ እንደማይቀሩ ጋዜጣው አስነብቧል፡፡

ተመራጩ ፕሬዝዳንት ዶናልድ ትራምፕ በበዓለ ሲመት ስነስርአቱ ላይ የቻይናው መሪ እንዲገኙ ሲጋብዙ የተለያዩ የፖለቲካ ምሁራን አጋጣሚውን “የፖለቲካ ትያትር” ሲሉ ጠርተውታል፡፡

ባሳለፍነው ሰኞ ጋዜጣዊ መግለጫ የሰጡት ትራምፕ ከሺ ጋር በተወካዮች በኩል ሲነጋገሩ መቆየታቸውን እና በሁለተኛው የስልጣን ዘመናቸው ከፕሬዝዳንቱ ጋር ተግባብተው እንደሚሰሩ ገልጸዋል፡፡

ያም ሆኖ ትራምፕ በመጪው አስተዳደራቸው ቁልፍ ቦታዎች ላይ የውጭ ጉዳይ ሚኒስትር ማርኮ ሩቢዮን ጨምሮ በቻይና ላይ ጠንካራ አቋም የሚያጸባርቁ ሰዎችን እየሾሙ ነው፡፡
 ይህም ከመጀመሪያ የስልጣን ዘመናቸው የበለጠ በሁለቱ ሀገራ መካከል ውጥረትን ሊያስከትል እንደሚችል ስጋትን ጭሯል፡፡
ከቻይናው ፕሬዝዳንት ባለፈ የዩክሬን እና የሀንጋሪ ፕሬዝዳንት በበአለ ሲመቱ ላይ እንዲታደሙ ጥሪ ከቀረበላቸው መሪዎች መካከል ይጠቀሳሉ፡፡

Via:- Al Ain
@Yenetube @Fikerassefa