GhionMagazine ግዮን መጽሔት

Misrak Terefe ን አገኘኋት።
በቀድሞ አጠራሩ 3ኛ፤ አሁን አዲስ አበባ ፖሊስ ኮሚሽን የሚባለው ውስጥ፦ እስረኛ ሆና አገኘኋት።

ለመጨረሻ ጊዜ የተገናኘነው የመንበረ ፀባኦት ቅድስት ስላሴ ካቴድራል ምርቃት እለት ነበር። ያኔ፤ እሷ ያሳተመችውን "ምጥቀት በቅኔ አክናፍ" መፅሐፍ በስጦታ አበረከተችልኝ። እና ተጨዋውተን፣ ተሳስቀን፣ ተፎጋግረን ተለያየን።

ዛሬ መታሰሯን አላመንኩም። ከጠዋቱ 3፡ 30 ነው አዲስአበባ ፖሊስ የተገኘሁት።

አላመንኩም ነበር ታሰረች መባሏን። ማታ/ለሊት ያውቋታል ወደምላቸው ሰዎች ስልክ መታሁ። መታሰሯን ማረጋገጥ አልቻልኩም።

እዚያ 3ኛ ግቢ ውስጥ ሳገኛት ነው እርግጠኛ የሆንኩት።

ሳስጠራት እየሳቀች መጣች።
"ቦታ ተቀያየርን አይደል?!" አለችኝ።
"እቅጩን በሃያ ዓመት" አልኳት።

የዛሬ ሀያ ዓመት እኔ እስረኛ ነበርኩ፤ እሷ ደግሞ ጠያቂዬ። አሁን የተገላቢጦሽ እሷ እስረኛ ነበር።

"የእናንተ ጊዜ መጨባበጥ ይቻል ነበር" አለችኝ እየሳቀች።

በመሃላችን ከሁለት ሜትር ርቀት ቢኖርም፣ በ "ነፃነት" አወራን፤ ምክንያቱም እኔ እና እሷ ብቻ ነበርን ተጠያያቂዎች።

"ፖሊሶች የጠየቁኝ አርትስ ቲቪ ላይ ቀርበው በነበሩ፣ ነገር ግን ሰሞኑን በቲክቶክ ላይ ተቆራርጠው በብዛት ሲዘዋወሩ በነበሩ ቪዲዮዎች ነው" አለች።
ገረመኝ።

"ለማንኛውም ፖሊስ የማጣራው ነገር አለ፤ የጊዜ ቀጠሮ 14 ቀን ይሰጠኝ ብሎ ነበር። ፍርድ ቤት ጥያቄውን ውድቅ አድርጎ 7 ቀን ብቻ የሰጠው"
"ወከባ ምናምን አለ?"
"የለም፤ በጥሩ ሁኔታ ነው የያዙኝ፤ አድናቂዎቼ ሳይሆኑ አይቀሩም" አለችኝ እየሳቀች።

እንዲህ እንዲህ እያልን ለብዙ ደቂቃ አወራን።
ወሬ ሲያልቅብኝ "በቃ ቻው፤ ሰባት ቀን ምን አላት?፤ የዛሬ ሳምንት ስትወጪ ቀጨኔ አበቅየለሽ ቤት እጋብዝሻለሁ" አልኳት።
በዚሁ ተሰነባበትን።

በአጭሩ፤ ምስራቅ ተረፈ ብትታሰርም ከነ ሙሉ ፈገግታዋ ናት።

ከወሰንሰገድ ገ/ኪዳን

የአሜሪካ ተራድኦ ድርጅት በመንግስት ስር ሆኖ እንደገና ሊደራጅ ነው ተባለ

የዓለማችን ልዕለ ሀያል ሀገር የሆነችው አሜሪካ በመላው ዓለም የረድኤት ስራዎችን የሚያግዝ የአሜሪካ ተራድኦ ድርጅት ወይም ዩኤስኤይድ የተሰኘውን ዓለም አቀፍ ተቋም ካቋቋመች ከ60 ዓመት በላይ ሆኗታል፡፡

ይህ ድርጅት ኢትዮጵያን ጨምሮ በመላው ዓለም የሰብዓዊ ድጋፍ ለሚፈልጉ ዜጎች መሰረታዊ ድጋፎችን በማድረግም ይታወቃል፡፡

ከሁለት ሳምንት በፊት ወደ ስልጣን የመጡት ፕሬዝዳንት ዶናልድ ትራምፕ ይህ የረድኤት ድርጅት የመንገስትን ወጪ ከሚያንሩ ተቋማት መካከል አንዱ ነው በሚል ከአስቸኳይ የሰብዓዊ እርዳታዎች ውጪ ሌሎች ወጪዎችን ለሶስት ወራት እንዳያወጣ አግደዋል፡፡

በአሜሪካ ትቅደም ፖሊሲያቸው የሚታወቁት ፕሬዝዳንት ዶናልድ ዩኤስኤይድ የግብር ከፋይ አሜሪካዊያንን ገንዘብ እያባከነ ነው የሚል አቋም አላቸው፡፡

በዩኤስኤይድ ላይ የተጣለው እገዳ ኢትዮጵያን ጨምሮ በበርካታ ሀገራት የተሰማሩ ድርጅቶችን ህልውና ከመፈታተኑ ባለፈ አገልግሎት ሲያገኙ የነበሩ ዜጎችንም እንደጎዳ ተገልጿል፡፡

ሮይተርስ እንደዘገበው ከሆነ የዶናልድ ትራምፕ አስተዳድር ዩኤስኤይድን አሁን ካለበት ነጻ ዓለም አቀፍ ተቋምነት ይልቅ በአሜሪካ መንግስት ስር ሆኖ እንዲቀጥል የሚያስችል ውሳኔ ለማስተላለፍ አቅደዋል፡፡

ድርጅቱ በአሜሪካ መንግስት ስር ሆኖ ከተደራጀ አሁን ያለበትን አቅም ለማስቀጠል የሚቸገር ሲሆን ከዚህ በፊት በተቋሙ ስር ሆነው አገልግሎት ሲያገኙ የነበሩ ዜጎችንም ለከፋ ጉዳት ሊዳርግ ይችላል ተብሏል፡፡

ዩኤስኤይድ በመላው ዓለም ለሚያካሂዳቸው የሰብዓዊ ድጋፍ አገልግሎት ለመስጠት በዓመት ከ70 ቢሊዮን ዶላር በላይ ወጪ በማድረግ ላይ ነበር፡፡

የዶናልድ ትራምፕ አዲስ የዩኤስ እቅድ ተፈጻሚ የሚሆነው በሀገሪቱ ህግ አውጪ ምክር ቤት ቀርቦ በአብላጫ ድምጽ ከጸደቀ ሲሆን ጉዳዩ ዋነኛ የመከራከሪያ አጀንዳ እንደሚሆንም ይጠብቃል፡፡

አብን በቀጣዩ ምርጫ ላይሳተፍ ይችላል ተባለ

የአማራ ብሔራዊ ንቅናቄ (አብን) 300 የሚደርሱ ቅርንጫፍ ጽሕፈት ቤቶቹ በሥራ ላይ ባለመኾናቸው በቀጣዩ ጠቅላላ ምርጫ የመሳተፍ አቅም አይኖረውም ሲሉ አባላቶቹ መናገራቸው ተሰማ።

ከፓርቲው አባላት የተወሰኑት መንግሥትን ለመግልበጥ ሙከራ አያደረጋችኋል ተብለው ለ6 ወራት ከታሠሩ በኋላ፣ ባለፈው ሳምንት እንደተፈቱ ተነግሯል። አብን መጋቢት 11 ቀን፣ 2014 ዓ፣ም በባሕርዳር ከተማ ያካሄደውን ጠቅላላ ጉባኤ በምርጫ ቦርድ ተቀባይነት ባለማግኘቱ ጉባኤው በድጋሚ እንዲካሄድ ቦርዱ ቢያዝም፣ እስካኹን ድረስ ፓርቲው ጉባኤውን ማካሄድ አልቻለም።

የፓርቲው አመራሮች ከምርጫ ቦርድ ጋር ያላቸው ንግግር በግልጽ የማይታወቅ መኾኑ፣ የፓርቲውን ሕልውና አሳሳቢ እንዳደረገው አባላቱ ገልጸዋል። የአብን አባላት በፓርቲው ወቅታዊ ቁመና ዙሪያ ላነሱት ቅሬታ፣ የፓርቲው አመራሮች ምላሽ እንዲሠጡ ቢጠየቅም አለመሳካቱን ዋዜማ ዘግባለች።

የግጭት ዳፋ ባገረሸበት ሰላሌ የነዋሪው ሰቆቃ

በኦሮሚያ ክልል ግጭት ከከፋባቸው አከባቢዎች አንዱ የሆነው ሰላሌ በግጭቱ ምክንያት የነዋሪዎች ሕይወት ለአደጋ መጋለጡን እየተናገሩ ነዉ።ነዋሪዎቹ እንደሚሉት እገታ፣ ማስፈራሪያና ቅሚያ ከጊዜ ወደ ጊዜ እየተባበሰ ነዉ።

አንድ የሰሜን ሸዋ ዞን የደብረጽጌ ከተማ ነዋሪ እንደሚሉት የመንግሥት ፀጥታ አስከባሪዎችና አማፂያን ሠላም እንደሚያወርዱ የአካባቢዉ ህዝብ በተደጋጋሚ በአደባባይ ሠልፍ ጭምር ጠይቋል። ተደጋጋሚዉ ጥያቄና ተማጽዕኖ መና ቀርቶ ታጣቂዎች የሚያደርሱት አስገድዶ ስወራ፣ እገታና ዘረፋዉ ቀጥሏል። የአከባቢው ነዋሪዎች እንደሚሉት ገበያ ለመሔድና እና ለቅሶ ለመድረስ እንኳን እየሠጉ ነዉ። 

ከአንድ ሳምንት በፊት ከደብረሊባኖስ አከባቢ ለገበያ በመኪና ሲጓዙ የነበሩ 50 ያክል ነጋዴዎች ሳዲኒ ብዮ በሚባል የያያ ጉሉለ ወረዳ ታፍነው እንደተወሰዱ ሌላዉ ነዋሪ አስታዉቀዋል።

የያያ ጉሌሌ ፊታል ከተማ አስተያየት ሰጪ አክለዉ እንዳሉት የፀጥታ ችግሩ ፋታ አይሰጥም።መኪና ሙሉ ሰዎች መወሰዳቸዉ የችግሩን ክፋት እንደሚያሳይ ነዋሪዉ ገልፀዋል።

ይህ ቦታ ከአንድ ወር ግድም በፊት አምስት የዞን ባለስልጣናትን ጨምሮ የመንግስት ሰራተኞች የተገደሉበት አካባቢ ነው፡፡ነዋሪዉ እንደሚሉት ባለፈው ሳምንት ማክሰኞ የተወሰዱት ወደ 50 የሚሆኑ ገበያተኞች እስካሁን አልተመለሱም፤ «የመኪናዉ ሾፈርም አብሮ እንደተወሰደ ነው” ብለዋል፡፡

በቅርቡ ከዞን የመጣው የመንግስት ሠራዊትም ዘመቻ መክፈቱን ባስታወቀ በጥቂት ጊዜ ዉስጥ ከአካባቢዉ በመልቀቁ ምንም ለውጥ አልታየም፡፡ «ከዚህ ከተማ ውጪ ታጣቂዎች የማይገኙበት ሥፍራ የለም» ይላሉ ነዋሪዎቹ።

“ተቸግረናል፡፡ ከተማ ውስጥ እንኳ ቢሆን ተኝቶ የሚያድር ሰው አታገኝም፡፡ ሰው እየተደበቀ ከቦታ ቦታ እየተንቀሳቀሰ ነው ቀን የሚገፋው፡» ይላሉ። ነዋሪዉ እንደሚሉት ሁለቱ ተፋላሚዎች ብዙ ጊዜ ፊትለፊት ሲዋጉ አታይም፡፡

«የመንግስት ጦር ሲመጣ ጫካ ያለው በደፈጣ ነው የሚጠብቀው፡፡ ሁለቱ ተፋላሚዎች ተነጋግረው መግባባት ስላልቻሉ በመሃል የመጨረሻ ስቃይ እያየን ነዉ» አከሉ ነዋሪዉ።

የመንግስት የጸጥታ ሃይልም፣ አማጺዎችም የነዋሪዉን ሥልክ ሥለሚወስዱ መረጃ  መለዋወጥ እንኳን አዳጋች ሆኖ ህዝቡ ከዚህ በፊት ሲኖር ከነበረው ሃምሳ ኣመት ወደ ኋላ ተመልሶ እየኖረ ነው ብለዋል፡፡የአዲስ አበባዉ ወኪላችን ስዩም ጌቱ ሥለ ህዝቡ ሮሮ  የዞኑን ዋና አስተዳዳሪ አቶ ከፋለ አደሬን በስልክ ለማነጋገር ቢደዉልም መልስ ግን አላገኘም።
Dw Amharic